فوتو: سەناتتىڭ ءباسپاسوز قىزمەتى
سەنات توراعاسىنىڭ ورىنباسارى, قازاقستاننىڭ ەكپا-داعى پارلامەنتتىك دەلەگاتسياسىنىڭ باسشىسى ولگا پەرەپەچينا قازاقستان پارلامەنتى مەن ەكپا اراسىنداعى ىنتىماقتاستىق تۋرالى كەلىسىمگە قول قويىلعان ساتتەن باستاپ 20 جىلدا ءوزارا ءىس-قيمىل تولىق ءوزارا تۇسىنىستىك شەڭبەرىندە دامىپ كەلە جاتقانىن اتاپ ءوتتى.
ول پارلامەنتتىك اسسامبلەيانىڭ باسشىسىن ەلىمىزدەگى ادىلەتتى قازاقستان قۇرۋعا وراي جۇرگىزىلىپ جاتقان اۋقىمدى ساياسي جانە دەموكراتيالىق وزگەرىستەرمەن تانىستىردى.
تەودوروس رۋسوپۋلوس قازاقستانعا دەموكراتيالىق مەملەكەت قۇرۋعا جان-جاقتى جاردەم بەرۋدى جالعاستىرۋعا, قر پارلامەنتىمەن تۇراقتى بايلانىستا بولۋعا جانە ءوز مانداتى بويىنشا ەلىمىزگە بارۋ مۇمكىندىگىن قاراستىرۋعا دايىن ەكەنىن ءبىلدىردى.
ۇلتتىق دەلەگاتسيالاردىڭ باسشىلارى – دەپۋتاتتار جولت نەمەت (ماجارستان), كيممو كيليۋنەن (فينليانديا), بەرتران بۋي (فرانتسيا), رۋبەن رۋبينيان (ارمەنيا), ەليزابەتتا گارديني, (يتاليا), ەمانۋەليس زينگەريس (ليتۆا) - قازاقستان پارلامەنتشىلەرىمەن بايلانىستاردى جانداندىرۋدى جانە پارلامەنتارالىق ديپلوماتيانى نىعايتۋدى جاقتادى.
ولار قازاقستانداعى كونستيتۋتسيالىق وزگەرىستەر, ءولىم جازاسىن جويۋ, پارلامەنتتە ايەل ادامداردىڭ سانىن كوبەيتۋ, ادام قۇقىقتارى جونىندەگى ۋاكىل ينستيتۋتىن كۇشەيتۋمەن قوسا ەلىمىزدىڭ دەموكراتيالىق باعىتىنا قولداۋ ءبىلدىردى.
قازاقستان سەناتورلارى ساپار بارىسىندا ەۋروپالىق كونسەرۆاتورلار مەن دەموكراتيالىق اليانس توپتارىنىڭ, سونداي-اق بىرىككەن ەۋروپالىق سولشىلداردىڭ وتىرىستارىندا ءسوز سويلەدى.
دەپۋتاتتار 18 ساۋىردە ەۋروپا كەڭەسىنىڭ شتاب-پاتەرىندە ىنتىماقتاستىق تۋرالى كەلىسىمگە قول قويىلۋىنىڭ 20 جىلدىعىنا ارنالعان «قازاقستان مەن ەكپا اراسىنداعى ىنتىماقتاستىق تاجىريبەسى مەن بولاشاعى» تاقىرىبىنداعى جارناما سايت شاراسىنا قاتىستى.
ەۋروپا كەڭەسىنىڭ پارلامەنتشىلەرى كوكتەمگى سەسسيا شەڭبەرىندە «قازاقستاننىڭ ادام قۇقىقتارى, دەموكراتيا جانە ەۋروپا كەڭەسىمەن ىنتىماقتاستىق سالاسىنداعى ىلگەرىلەۋى» اتتى جازباشا دەكلاراتسيا قابىلدادى. وندا ادىلەتتى جاڭا قازاقستاندى قۇرۋدىڭ اجىراماس بولىگى رەتىندە دەموكراتيالىق جانە ساياسي رەفورمالاردى ىسكە اسىرۋداعى ەلىمىزدىڭ ەلەۋلى جەتىستىكتەرى اتاپ ءوتىلدى.
