زورلىق-زومبىلىقتىڭ بارلىق تۇرىنە جازا كۇشەيەدى - بيبىگۇل جەكسەنباي

سەناتور جازباسىندا بۇگىنگە دەيىن قىز-كەلىنشەكتەر اراسىنداعى كۇرمەۋلى ماسەلەنىڭ سەبەبى مەن سالدارىنا توقتالىپ, ەندىگى رەتتە تۇرمىستىق زورلىق-زومبىلىق ءۇشىن جازا كۇشەيەتىنىن تىلگە تيەك ەتكەن.

«وتباسى, وشاق قاسىنداعى وقيعالار كوبى­نە-كوپ «جابۋلى قازان جابۋلى كۇيىندە» قالاتىنىن قوعام قالىپتى جاعداي رەتىندە قابىلداپ كەلدى. الايدا, جىل سايىن «قورعاۋشىم, تىرەگىم, سەرىگىم» دەگەن ەڭ جاقىن ادامداردىڭ زورلىعى مەن قورلىعىنان ءدال ءبىزدىڭ ەلىمىزدە جۇزگە جۋىق قىز-كەلىنشەك مەرت بولىپ, قانشاماسى ءوز-وزىنە قول جۇمساۋعا دەيىن باردى. 

استانا قالاسىنان سوڭعى 5 ايدىڭ ىشىندە 2 مىڭنان استام جاننان قوڭىراۋ كەلىپ ءتۇسىپ, زورلىقتان قۇتقارۋدى وتىنگەن. وكىنىشتىسى, بىلەگىنىڭ كۇشىن نازىك جاندى ايەلىنە باتىرىپ, تاياقتاپ, باسسىزدىققا سالىنىپ بالاسىن سابايتىندار ەلىمىزدە كۇن ساناپ كوبەيىپ بارادى.

كەشە قازاقستان رەسپۋبليكاسىنىڭ پرەزيدەنتى ق.توقاەۆ «ايەلدەردىڭ قۇقىقتارىن جانە بالالاردىڭ قاۋىپسىزدىگىن قامتاماسىز ەتۋ تۋرالى» زاڭعا قول قويدى.

زاڭدى ءماجىلىس دەپۋتاتتارى 2023 جىلدىڭ قىركۇيەگىندە مەملەكەت باسشىسىنىڭ تۇرمىستىق زورلىق-زومبىلىققا جاۋاپكەرشىلىكتى كۇشەيتۋدى تاپسىرعان جولداۋىنان كەيىن بىردەن ازىرلەگەن بولاتىن.

ونى دايىنداۋعا بالا قۇقىقتارى جونىندەگى ۋاكىل دينارا زاكيەۆا, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەلەرى, سونداي-اق ۇلتتىق قۇرىلتايدىڭ مۇشەلەرى بەلسەنە اتسالىستى. ماجىلىستەگى تالقىلاۋلارمەن قاتار, سەنات قابىرعاسىندا عانا جيىرماعا جۋىق جۇمىس وتىرىستارى ءوتىپ, جان-جاقتى تالقىلاندى. سوندىقتان ءيىنى قانعان زاڭداردىڭ ءبىرى دەۋگە تولىق نەگىزى بار.

نەگىزگى زاڭنامالىق جاڭاشىلدىقتارعا توقتالساق,  تۇرمىستىق زورلىق-زومبىلىقتى كريميناليزاتسيالاۋ, بالالارعا قاتىستى زورلىق-زومبىلىقتىڭ بارلىق تۇرلەرى ءۇشىن جازانى كۇشەيتۋ جانە ونىمەن كۇرەسۋ بويىنشا الدىن الۋ شارالارىنىڭ تۇتاس كەشەنى بار.

ايەلدەر مەن بالالاردىڭ قۇقىقتارىن قورعاۋ - مەملەكەتتىك ساياساتتىڭ باسىم باعىتتارىنىڭ ءبىرى.  مەملەكەت باسشىسى بۇل ماسەلەگە باسا نازار اۋدارىپ كەلەدى.

ۇلتتىق قۇرىلتايدىڭ ءۇشىنشى وتىرىسىندا مەملەكەت باسشىسى تۇرمىستىق زورلىق-زومبىلىقپەن كەشەندى كۇرەس - ىزگىلىك جولىنداعى قوعام كەلەشەگىنىڭ كەپىلى ەكەنىن اتاپ ءوتتى.

تۇرمىستىق زورلىق-زومبىلىق پەن بۋللينگتەن زارداپ شەككەندەرگە كومەك كورسەتەتىن 111 سەنىم تەلەفونىنىڭ ىسكە قوسىلعانىنا جارتى جىل ءوتتى. ورتالىققا وسى كۇنگە دەيىن 10 مىڭنان استام ادام جۇگىنگەن ەكەن. مەملەكەت باسشىسى قول قويىپ, سياسى كەپپەگەن جاڭا زاڭ مۇنداي وكىنىشتى كورسەتكىشتىڭ كەمۋىنە كومەكتەسەدى دەپ ويلايمىز», دەپ جازدى بيبىگۇل جەكسەنباي.