فوتو: اقتوبە وبلىسى اكىمدىگىنىڭ ءباسپاسوز قىزمەتى
سونداي-اق ءىىم ۇلتتىق ۇلانىنا قاراستى 3656 استانالىق اسكەري ءبولىمنىڭ مي-171ە تىكۇشاعىنىڭ ەكيپاجى اۋەدەن تورعاي وزەنىنىڭ تاسۋىن باقىلاپ ءجۇرىپ, مامىر اۋلىنىڭ جانىندا سۋ ورتاسىندا قالعان ءبىر توپ ادامدى بايقاپ, جەدەل تۇردە قونىپ, ادامداردى قاۋىپسىز جەرگە كوشىرگەن. 12-13 ساۋىردە ۇلتتىق ۇلاننىڭ اسكەري-كولىكتىك تىكۇشاعى مەن 3مي-171ە تىكۇشاعى تورعاي وزەنى اياعىندا وتىرعان اۋىلداردان 1 200 ادامدى قۇتقاردى.
10 ساۋىردە تورعايدىڭ سۋى قوستانايمەن اراداعى شەكاراداعى مامىر اۋلىنا 2,5 مەتر بيىكتىكتە كوتەرىلە باستادى. قوستاناي وبلىسىنىڭ اقتوبەمەن شەكاراسىنداعى اقشىعاناق اۋلىنا سۋ كىرگەندە, بەرگى بەتتەگى مامىر تۇرعىندارى دا قامدانا باستاعان. اۋىل تۇرعىندارى سۋ جايىلاتىن جەردە توسقاۋىل جاساپ, قولدان بوگەسىن تۇرعىزىپ, ساقتىق شارالارىن جاساسا دا, قوستاناي جاعىنان تورعايدىڭ ەكپىندى مول سۋى كەلە قويادى دەپ كۇتپەدى. ويتكەنى ەكى ارادا قۇم اراسىندا قۇرعاپ كەتكەن وزەكتەر مەن جىلعالار, كولشىكتەر كوپ. تاسىپ كەلە جاتقان سۋ جول بويىنداعى كەپكەن ارنالاردى تولتىرعان سوڭ, اياعىنا جەتكەندە قارقىنى ازايىپ, باسەڭدەپ جەتەدى دەگەن وي بولدى. بيىلعى ناۋرىزدىڭ 26-27 كۇندەرى تاسىعان ىرعىز وزەنىنىڭ تالدىق, تەلعارا سالالارىنان كەلگەن مول سۋ نۇرا جانە ءتاۋىپ اۋىلدىق وكرۋگتەرى اۋماعىنداعى كىشىگىرىم كولدەرگە قۇيىلىپ, ارنالارىن تولتىرىپ تۇرعان. ىرعىز بەن تورعاي وزەندەرىنىڭ قوسىلار تۇسىندا وتىرعان تۇرعىلىقتى جۇرت وسىعان دەيىن تورعاي وزەنىنىڭ اياعىنا جەتەر تۇستا تەنتەك مىنەز تانىتقانىن كورگەن ەمەس. جىلدا تورعاي مامىردىڭ العاشقى ونكۇندىگىندە تاسيتىن. تاسيدى دەگەن اتى بولماسا, قۇمنان كەلگەن سۋ سىزدىقتاپ ارەڭ جەتەتىن دە, كەۋىپ كەتكەن كولدەردى تولتىرا المايتىن. مول سۋ كەلمەگەن سوڭ كولدەردىڭ ورنى قۇرعاپ, سور باسىپ, قۇستارى مەن بالىعى ازايعان. بيىلعى تاسقىن سۋ اۋىل ادامدارىنا جايسىزدىق اكەلسە دە, قۇرعاپ, سورعا اينالعان كولدەردى سۋعا تولتىرعانىن ايتپاي كەتپەۋگە بولماس. بۇل كۇندەرى تورعاي دالاسىنىڭ قىزبەل, ءتاۋىش, اقشىعاناق اۋىلدارىن دا سۋ باستى. جانگەلدين مەن ىرعىز اۋداندارىنىڭ مال باققان جۇرتى قىزىل سۋمەن وزدەرى الىسىپ جاتىر, اۋىل اراسىندا كولىك قاتىناسى ءۇزىلدى.
قازىر ىرعىز اۋدانىنىڭ ورتالىعىنداعى ءۇش مەكتەپ پەن سپورت كەشەنىندە اشىلعان ەۆاكۋاتسيالىق ورتالىقتا نۇرا اۋىلدىق وكرۋگىنىڭ 600 ادامى قالدى. بۇل جەرگە جاس بالاسى بار انالار, قارت كىسىلەر, مەكتەپ وقۋشىلارى كوشىرىلسە, بەلشەر, مامىر مەن نۇرانىڭ ەر ازاماتتارى اۋىلدارىندا قالىپ, مالىن قىرعا شىعارىپ, ۇيلەرىنە سۋ كىرمەۋ ءۇشىن بوگەسىندى بەكىتىپ جاتىر. قارعىن سۋمەن الىسىپ جاتقان ەر ازاماتتارعا سۋدىڭ الدىن بوگەيتىن جۇك تيەگىشتەر, تراكتورلار, جالپى اۋىر تەحنيكا كوپ كەرەك.
اقتوبە وبلىسى
