فوتو: senate.parlam.kz
«ق.توقاەۆ «Egemen Qazaqstan» گازەتىنە بەرگەن سۇحباتىندا: «مەن «زاڭ جانە ءتارتىپ» قاعيداتىن نىعايتۋدى جاقتايمىن, وتباسىلىق-تۇرمىستىق زورلىق-زومبىلىق ءۇشىن جازانى قاتاڭداتۋدى قولدايمىن», دەدى. مەملەكەت باسشىسىنىڭ ۇستانىمى ايقىن: زاڭنىڭ ۇستەمدىگىن بەلگىلەۋ جانە زاڭ نورمالارى ساقتالاتىن ادىلەتتى قوعام قۇرۋ. زاڭ مەن ءتارتىپتى ورناتۋ ونىڭ سايلاۋالدى باعدارلاماسىنىڭ نەگىزى دەۋگە بولادى. پرەزيدەنت ۇسىنعان «زاڭ جانە ءتارتىپ» قاعيداتى بارلىق ماسەلەلەر قۇقىقتىق سالادا شەشىلۋى كەرەك دەگەندى اڭعارتادى. بۇل قاعيداتتىڭ ەكى قىرى بار. ءبىرىنشىسى - «زاڭ بار جەردە ءتارتىپ بار». ەكىنشىسى - «زاڭ بۇزىلماعان جەردە ءتارتىپ بار». دەمەك, قىلمىستىڭ الدىن الۋ اسا ماڭىزدى», دەپ جازدى نۇرتورە ءجۇسىپ Facebook جەلىسىندە.
پرەزيدەنت «قر-نىڭ كەيبىر زاڭنامالىق اكتىلەرىنە ايەلدەر قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى», «قر-نىڭ اكىمشىلىك قۇقىق بۇزۋشىلىق تۋرالى كودەكسىنە ايەلدەر قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدارعا قول قويعانى ءمالىم.
«قۇجات مەملەكەت باسشىسىنىڭ ايەلدەر مەن بالالارعا قاتىستى زورلىق-زومبىلىقتىڭ كەز كەلگەن كورىنىسى ءۇشىن جاۋاپكەرشىلىكتى قاتاڭداتۋ, وتباسى ينستيتۋتىن نىعايتۋ جانە كامەلەتكە تولماعانداردىڭ قاۋىپسىزدىگىن قامتاماسىز ەتۋ, ونىڭ ىشىندە بالا قۇقىقتارى جونىندەگى ۋاكىلدىڭ قىزمەتىن ودان ءارى جەتىلدىرۋ جونىندەگى تاپسىرمالارىن ىسكە اسىرۋعا باعىتتالىپ وتىر. زاڭ شىعارۋشى ورگان قوعامنىڭ سۇرانىسىنا سايكەس جازا تۇرلەرىن انىقتادى. قاتاڭ جازا – قىلمىستىڭ الدىن الۋدىڭ جانە قوعامدى قاۋىپتى قىلمىسكەرلەردەن قورعاۋدىڭ ءتيىمدى ءادىسى», دەپ جازدى ن.ءجۇسىپ.
سەناتور اتالعان زاڭنىڭ نەگىزگى ماقساتى جازالاۋ ەمەس, الدىن الۋ سيپاتىنا يە ەكەنىن ايتىپ, ەنگىزىلگەن تۇزەتۋلەر بالالاردىڭ قۇقىقتىق ساناسىن قالىپتاستىرۋعا ارنالعانىن, بالالاردى قورقىتۋ جانە كيببەربۋلينگ ءۇشىن اكىمشىلىك جاۋاپكەرشىلىك ەنگىزىلگەنىن, كۇندەلىكتى ومىردە كامەلەتكە تولماعاندار اراسىندا بۋللينگ ءجيى كەزدەسەتىنىن تىلگە تيەك ەتتى.
«وسىعان بايلانىستى ءبىلىم بەرۋ ۇيىمىندا ۇزاق ۋاقىت بويى بۋللينگكە قارسى تۇرۋدىڭ زاڭدى تەتىكتەرى بولعان جوق. ولار تەك پروفيلاكتيكالىق سويلەسۋمەن جانە مەكتەپىشىلىك ەسەپكە الۋمەن شەكتەلۋگە ءماجبۇر بولدى», دەپ جازعان سەناتور.
«زاڭ كامەلەتكە تولماعانداردىڭ بۋللينگ ءۇشىن جاۋاپكەرشىلىگىن قاراستىرمايدى, بىراق اتا-انالارعا بالالارىنىڭ ارەكەتتەرى ءۇشىن ناقتى جازا تاعايىندايدى, بۇل تەجەۋ مەحانيزمى بولۋى كەرەك. ماسەلەن, ەگەر بۇل ارەكەتتى 12 جاستان 16 جاسقا دەيىنگى كامەلەتكە تولماعاندار جاساسا – ەسكەرتۋ نەمەسە 10 اەك ايىپپۇل اتا-انالارىنا نەمەسە ولاردى الماستىراتىن ادامدارعا سالىنادى. مۇنداي جاۋاپكەرشىلىكتىڭ پايدا بولۋى بالالارعا دا, اتا-انالارعا دا, بۇكىل قوعامعا دا بۇل ماسەلەگە بايىپتى قاراۋعا مۇمكىندىك بەرەدى. زاڭ جۇمىس ىستەۋى كەرەك. ول ءۇشىن ەلدە جاپپاي ءتارتىپ ورنىعۋى ءتيىس!», دەپ تۇيىندەدى سەنات دەپۋتاتى.
