فوتو: ن.بايبۋلين
پالاتا توراعاسى گرۋزيادان كەلگەن ارىپتەسىنە ءىلتيپات ءبىلدىرىپ, ونىڭ ساپارى ەكى ەل ىنتىماقتاستىعىنا تىڭ سەرپىن بەرەتىنىن ايتتى.
«گرۋزيا – قازاقستاننىڭ وڭتۇستىك كاۆكاز وڭىرىندەگى ماڭىزدى سەرىكتەسى. ءسىزدىڭ ساپارىڭىز پارلامەنتارالىق ءوزارا ءىس-قيمىلىمىزدى, سونداي-اق, ەلدەرىمىز اراسىنداعى ىنتىماقتاستىقتى ودان ءارى دامىتۋعا تىڭ سەرپىن بەرەدى دەپ سەنەمىن. سوڭعى جىلداردا ساۋدا-ەكونوميكالىق سالاسىندا بەلگىلى ءبىر ناتيجەگە قول جەتكىزدىك. ءتۇرلى باعىتتاعى ىنتىماقتاستىقتى نىعايتۋ جولىنداعى مىندەتتەردى ىسكە اسىرۋعا پارلامەنتتەر تاراپىنان دا ىقپال ەتە الامىز», دەدى ماۋلەن اشىمباەۆ.
كەزدەسۋدە سونداي-اق تۋريستىك, كولىكتىك-لوگيستيكالىق جانە باسقا سالالارداعى ىنتىماقتاستى ارتتىرۋ ماسەلەلەرى تالقىلاندى.
سەنات سپيكەرى مەملەكەت باسشىسىنىڭ باستاماسىمەن قازاقستاندا ىسكە اسىرىلىپ جاتقان كەشەندى الەۋمەتتىك-ەكونوميكالىق جانە ساياسي رەفورمالارعا, سونداي-اق, سەناتتىڭ زاڭ شىعارۋ قىزمەتىنە دە توقتالدى. اتاپ ايتقاندا, جاڭا ەكونوميكالىق ۇلگى قالىپتاستىرۋعا جانە ەلدىڭ ينۆەستيتسيالىق احۋالىن جاقسارتۋعا ارنالعان شارالار تۋرالى ءسوز بولدى.
ءوز كەزەگىندە شالۆا پاپۋاشۆيلي كوپجاقتى قاتىناستاردى دامىتۋعا مۇددەلى ەكەنىن ءبىلدىرىپ, قازاقستانداعى ساياسي ترانسفورماتسيانىڭ تيىمدىلىگىن تىلگە تيەك ەتتى.
