كەيدە ادىلەتتىڭ كوزى اعىپ كەتكەندەي كورىنەتىنى بار.
ە, نەگە؟
و, وعان مىڭداعان مىسال كەلتىرۋگە بولادى.
كوپ سويلەپ كوپىرمەي, ناقتىلاي-فاكتىلاي ايتساڭىز.
بوپتى.
قازاقتىڭ قادىرلى قالامگەرلەرى كوپ. شامامىز جەتكەنشە اقىن-جازۋشىلارىمىزدىڭ مەرەيىن ءوسىرىپ, مەملەكەتتىك دەڭگەيدە ماراپاتتاپ جاتامىز. ەل ءۇشىن ەتكەن ەڭبەكتىڭ ەلەنگەنىنە نە جەتسىن!
بىراق امىسە ولاي بولا بەرمەيتىنى جامان. مىسالى, بىزدە مەدەۋ سارسەكەدەي جانكەشتى جازۋشى بولعانىن جۇرتتىڭ ءبارى بىردەي بىلە بەرمەيدى. ويتكەنى ول ادەبيەتتەگى اتاق-داڭق الامانىنا ەشقاشان ات قوسقان ەمەس. ۇلتتىق باسپاسوزىمىزدە ۇلىقتالمادى. دارەجەسىنە لايىق دارىپتەلمەدى. شىعارماشىلىق جۇمىستىڭ قىزىعىنان گورى شىجىعىن كوبىرەك كوردى. ماقسات جولىندا ماڭدايى تالاي تاسقا تيسە دە, العان بەتىنەن قايتپادى. قانداي قيىندىقتار كەزدەسسە دە قاجىر-قايراتىن قارسى قويىپ, قولىنداعى قالامىن ەرىك-جىگەرىنە قايراق ەتتى.
جارىقتىق, جاقىندا عانا دۇنيەدەن ءوتتى. ونىڭ وقىرمان ولجاسىنا اينالعان كوركەم شىعارمالارىن بىلاي قويىپ, ۇلتىمىزدىڭ قانىش ساتباەۆ, ەۆنەي بوكەتوۆ, ەرمۇحان بەكماحانوۆ سەكىلدى ۇلى تۇلعالارى تۋرالى كەسەك تۋىندىلارىن ايتساق تا, اڭگىمەمىزدىڭ ءبىراز جەرگە بارارى انىق. اسىرەسە الاشتىڭ ارداقتى پەرزەنتى, اكادەميك قانىش ساتباەۆقا ارنالعان رومان-ەسسەسىنىڭ ادەبيەتىمىزدە الار ورنى ايرىقشا بولارى انىق. سوناۋ جەتپىسىنشى جىلدارى الكەي مارعۇلان, مالىك عابدۋللين سەكىلدى قازاق رۋحانياتىنىڭ قابىرعالى وكىلدەرىنىڭ وتىنىشىمەن باستالعان بۇل كىتاپتىڭ حيكاياسى ۇزاق جىلدارعا سوزىلدى. سول كەزدەگى رەسپۋبليكا باسشىلىعى اتالعان عۇمىرنامانىڭ جارىق كورۋىنە جانتالاسا قارسى تۇردى. مەملەكەتتىك ماشينا تەتىكتەرى ءبىر اينالىپ كەتسە, جولىنداعىسىن تەگىس جايپاپ وتەتىنى وزىنەن-ءوزى تۇسىنىكتى.
الايدا مەدەۋ اعامىز الدىنداعى اتتاي الماس الىپ تاستى اينالىپ ءوتتى. يدەولوگيا يتارشىلارىنىڭ قولدان جاساعان قياناتتارىنا مويىمادى. ەرۋگە-قارۋ قىلىپ تىعىرىقتان شىعۋعا تىرىستى. اقىرى امالىن تاپتى دا. قازاقستان ىسكە العىسىز قىلعان «ساتباەۆتى» ايدى اسپانعا شىعارىپ, ماسكەۋدە باستىردى. باسقا ەمەس, «مولودايا گۆارديا» باسپاسىنىڭ الەمگە ايگىلى «جزل» سەرياسىمەن شىعاردى. بۇل وسىنداي ايدارمەن جارياعا جەتكەن قازاقتىڭ ەكىنشى كىتابى-تۇعىن. ءبىرىنشىسى, بەلگىلى عالىم تۇرسىنبەك كاكىشەۆتىڭ «ساكەن سەيفۋللينى» بولاتىن.
ءبىر «قىزىعى», وداقتىڭ ورتالىعى باتاسىن بەرسە دە, قازاقشا نۇسقاسىنىڭ جولى بولماي-اق قويدى. اۆتور باسىن تاۋعا دا, تاسقا دا ۇرىپ ءجۇرىپ, كەيىن زامان تۇزەلە باستاعان كەزدە اۋپىرىمدەپ ارەڭ شىعارعانى امبەگە ايان. مۇنىڭ مۇڭلى تاريحىن مارقۇم «قۋدالانعان» «ساتباەۆ» اتتى ەسسەسىندە جان-جاقتى بايانداعان. «شابىت» باسپاسى, 1994 جىل.)
كسرو عىلىم اكادەمياسىنا مۇشە بولعان ەكى قازاقتىڭ ءبىرى (ەكىنشىسى اسقار قوناەۆ), عىلىمداعى اتاعى جەر جارعان عۇلاما عالىم قانىش يمانتاي ۇلى ساتباەۆقا كىمدەردىڭ ورتتەي ءوش بولعانىن ايتىپ, اۋزىمىزدى جازىقتى قىلماي-اق قويالىق. بەلگىلى جايت قوي, جۇرت ونسىز دا بىلەدى. اق-قاراسى ايىرىلا جاتار.
ايتپاقشى, اتوم جارىلىسىنان كوز اشپاعان سەمەي ءوڭىرىنىڭ تۇرعىندارى شەككەن زارداپتاردى تىزگەن شەرلى شەجىرە ىسپەتتى كولەمدى دۇنيەسى ءوز الدىنا ءبىر توبە.
ءبىزدىڭ بىلەتىنىمىز, قانداي قۇرمەتكە دە لايىق مەدەۋ سارسەكەنىڭ ەرەن ەڭبەگى ەسكەرۋسىز قالدى. اركىمدەردىڭ قانجىعاسىنا بايلانعان مارتەبەلى اتاقتار مەن بەدەلدى سىيلىقتار بۇل كىسىگە بۇيىرمادى.
اتتەڭ, دۇنيە-اي...
