فوتو: senate.parlam.kz
ەل پرەزيدەنتى تاسقىن سۋدان زارداپ شەككەن ازاماتتارعا شۇعىل تۇردە كومەك كورسەتۋدى تاپسىرعانىن, سەنات دەپۋتاتتارى ۇكىمەتكە جانە وڭىرلەرگە تاسقىن سۋدىڭ زارداپتارىمەن كۇرەستە قاجەتتى قولداۋ كورسەتىپ جاتقانىن تىلگە تيەك ەتكەن دەپۋتات: «وڭىرلەردە ازاماتتارمەن كەزدەسۋلەردە تۇرعىندار تابيعي جانە تەحنوگەندىك سيپاتتاعى توتەنشە جاعداي تۋىنداعان كەزدە مەملەكەتتىك ورگانداردىڭ ءىس-ارەكەتىندەگى سايكەسسىزدىك تۋرالى ايتتى», دەدى.
ولگا بۋلاۆكينا توتەنشە جاعدايلاردىڭ الدىن الۋعا جانە ۋاقتىلى دەن قويۋعا, ادامداردىڭ ءومىرىن ساقتاپ قالۋعا جانە زالالدى بارىنشا ازايتۋعا ىقپال ەتەتىن ءتيىستى حاتتامانى ازىرلەي وتىرىپ, ءاربىر مەملەكەتتىك ورگاننىڭ توتەنشە جاعداي كەزىندەگى ءىس-ارەكەتى ءۇشىن جاۋاپكەرشىلىگىن زاڭنامالىق تۇرعىدان بەكىتۋدى ۇسىندى. سەناتور سونىمەن قاتار تاسقىن سۋدىڭ اگرارلىق سەكتورعا كەرى اسەرىن اتاپ ءوتتى.
«ونداعان شاقىرىم قۇنارلى جەر سۋ استىندا قالدى. تاسقىن سۋدىڭ اۋىل شارۋاشىلىعىنا كەلتىرگەن زالالى ءالى باعالانبادى. اۋىل شارۋاشىلىعى القاپتارى مەن مال شارۋاشىلىعىنا اۋقىمدى زالال كەلدى, وسىمدىك شارۋاشىلىعى ءۇشىن ەلەۋلى زارداپتار ەلدىڭ ازىق-ت ۇلىك قاۋىپسىزدىگىنىڭ ناشارلاۋىنا, ال جايىلىم جەرلەرىنىڭ باتپاقتانۋى جەم-ءشوپ بازاسىنىڭ جەتىسپەۋشىلىگىنە اكەلۋى مۇمكىن. بۇل كەيىننەن مال باسى سانىنا اسەر ەتەدى. تاسقىن سۋدان كەيىن توپىراقتىڭ قۇنارلىلىعىن قالپىنا كەلتىرۋ, تاسقىن سۋدىڭ وسىمدىك شارۋاشىلىعىنا زياندى اسەرىن ازايتۋ بويىنشا عىلىمي زەرتتەۋلەرگە نەگىزدەلگەن كەشەندى باعدارلاما ازىرلەۋگە كومەكتەسەتىن شۇعىل شارالار قابىلداۋ قاجەت», دەپ اتاپ ءوتتى ولگا بۋلاۆكينا.
سەناتور وسىعان بايلانىستى ۇكىمەت باسشىسىنان اۋىل شارۋاشىلىعى, ساۋدا جانە ينتەگراتسيا, دەنساۋلىق ساقتاۋ, ەڭبەك جانە الەۋمەتتىك قورعاۋ مينيسترلىكتەرىنە, بارلىق دەڭگەيدەگى اكىمدەرگە جەدەل ارەكەت ەتۋدى جانە ەل ازاماتتارىنا ۋاقتىلى كەشەندى كومەك كورسەتۋدى تاپسىرۋدى سۇرادى.
