فوتو: ج. جۇمابەكوۆ, ءماجىلىستىڭ ءباسپاسوز قىزمەتى
«قازاقستان گرۋزيامەن جان-جاقتى ىنتىماقتاستىقتى ودان ءارى نىعايتۋعا ۇلكەن ءمان بەرەدى. بۇگىنگى كەزدەسۋ پارلامەنتارالىق ارىپتەستىكتى ودان ءارى دامىتۋ ماسەلەلەرىن كەڭىنەن تالقىلاۋعا مۇمكىندىك بەرەدى. پرەزيدەنت قاسىم-جومارت توقاەۆتىڭ باستاماسىمەن ەلىمىزدە اۋقىمدى ساياسي جانە ەكونوميكالىق رەفورمالار جۇزەگە اسىرىلىپ جاتىر. ساپار بارىسىندا وسى وزگەرىستەرمەن كەڭىرەك تانىساسىز دەپ ويلايمىن. اتالعان رەفورمالار بيلىكتىڭ بارلىق تارماقتارىنىڭ جۇمىسىن تولىعىمەن قايتا جانداندىردى جانە قوعامنىڭ ساياساتقا ارالاسۋىن ارتتىردى», دەدى ءماجىلىس سپيكەرى.
كەزدەسۋ كەزىندە ەرلان قوشانوۆ كونستيتۋتسيالىق رەفورما, پرەزيدەنت پەن پارلامەنت سايلاۋلارىنىڭ قورىتىندىلارى جانە كونستيتۋتسيالىق سوتتىڭ قىزمەتى تۋرالى اقپارات بەردى. سونىمەن قاتار جاڭارعان ءماجىلىستىڭ زاڭنامالىق قىزمەتىمەن تانىستىردى.
ءوز كەزەگىندە گرۋزيا پارلامەنتىنىڭ توراعاسى قازاقستان تاراپىنا قوناقجايلىعى ءۇشىن العىسىن ءبىلدىرىپ, بۇل رەسمي ساپار پارلامەنتارالىق قاتىناستىڭ دامۋىنا تىڭ سەرپىن بەرەتىنىنە سەنىم ءبىلدىردى.
«ارينە, پارلامەنتتەردە اتقارۋشى بيلىكتىڭ تەتىكتەرى جوق, بىراق ولاردىڭ قولىندا ەكى ماڭىزدى قۇرال بار. ءبىرىنشىسى – ەلدىڭ دامۋ ساياساتىن ايقىنداۋ, ەكىنشىسى – وسى ساياساتتى ىسكە اسىرۋ ءۇشىن قۇقىقتىق بازا قۇرۋ. ۇكىمەتتەرىمىز ەكىجاقتى ىنتىماقتاستىقتى تابىستى دامىتۋى ءۇشىن ءبىز – دەپۋتاتتار كوپ نارسە جاساي الامىز», دەدى شالۆا پاپۋاشۆيلي.
گرۋزيا دەلەگاتسياسىنىڭ باسشىسى قازاقستان وڭىرلەرىندەگى سۋ تاسقىنىن تەز ارادا ەڭسەرۋگە تىلەكتەستىك ءبىلدىردى.
تاراپتار گەندەرلىك تەڭدىك, ايەلدەر مەن بالالاردىڭ قۇقىقتارىن قورعاۋ, بيۋدجەت جانە سالىق زاڭناماسىن رەفورمالاۋ, ساۋلەت-قۇرىلىس قىزمەتى سياقتى ماسەلەلەر بويىنشا ەكى ەل پارلامەنتتەرىنىڭ كۇن ءتارتىبىنىڭ ۇقساس ەكەنىن اتاپ ءوتتى. سپيكەرلەر وسى باعىتتاردا ءتيىستى كوميتەتتەردىڭ دەپۋتاتتارى اراسىندا تاجىريبە الماسۋعا كەلىستى.
«ارىپتەس رەتىندە ءسىز زاڭنامانى جاڭارتۋ ۋاقىت تالابى ەكەنىن جاقسى تۇسىنەسىز. ال دەپۋتاتتاردىڭ مىندەتى – ءتۇرلى سالادا بولىپ جاتقان وزگەرىستەرگە دەر كەزىندە زاڭنامالىق تۇرعىدا نازار اۋدارۋ», دەدى ءماجىلىس سپيكەرى.
تاراپتار قازاقستان مەن گرۋزيا اراسىنداعى ەكونوميكا, اگروونەركاسىپ, كولىك-ترانزيت, تۋريزم جانە مادەني-گۋمانيتارلىق سالالارداعى ىنتىماقتاستىقتى كەڭەيتۋ پەرسپەكتيۆالارىن تالقىلادى. سونىمەن قاتار ەرلان قوشانوۆ گرۋزيالىق سەرىكتەستەردى ىنتىماقتاستىقتى نىعايتۋدىڭ ءبىر مۇمكىندىگى رەتىندە «استانا» حالىقارالىق قارجى ورتالىعىنىڭ جۇمىسىمەن مۇقيات تانىسۋعا شاقىردى جانە قازاقستانداعى گرۋزين ينۆەستيتسيالارىنىڭ قۇقىقتىق تۇرعىدا قورعالاتىنىنا سەندىردى.
