اتالعان ءبىلىم ورداسىندا ستۋدەنتتەرگە عالي ورمانوۆ كىتاپحاناسىنان جاڭا قۇرىلعىلارمەن جابدىقتالعان ۇلكەن بولمە قولدانىسقا بەرىلدى. سالتاناتتى جيىنعا وقىتۋشىلار مەن بىلىمگەر جانە «Huawei» كومپانياسىنىڭ وكىلدەرى قاتىستى. اۋەلى جۋ-ءدىڭ رەكتورى ەرمەك بورىباەۆ پەن «Huawei Technologies Kazakhstan» كومپانياسى باس ديرەكتورىنىڭ ورىنباسارى Xu Hai ءبىلىم وشاعى مەن كومپانيا اراسىندا ىنتىماقتاستىق ورناتۋ جونىندەگى مەموراندۋمعا قول قويىپ, الداعى اتقارىلار جوبالارعا باعا بەردى.
مەموراندۋم اياسىندا ەكى تاراپ بىرلەسىپ, IT جانە تەلەكوممۋنيكاتسيا سالاسىندا جوعارى بىلىكتى مامانداردى دايارلايدى. سونداي-اق بىرلەسكەن ءبىلىم باعدارلامالارىن ازىرلەپ, عىلىمي زەرتتەۋلەر جۇرگىزۋگە ۋاعدالاستى. وعان قوسا يننوۆاتسيالىق ونىمدەر جاساۋ كوزدەلگەن.
«ستۋدەنتتەر ءۇشىن قازىر مۇمكىندىك كوپ. ولار كىشكەنتاي عانا تەرەزەدەن ءبىلىمنىڭ قاينار كوزىن تاۋىپ, سونى ءتيىمدى پايدالانا الۋلارى ءتيىس. ولاردىڭ ءبىلىم الۋىنا ءبىز بارلىق جاعدايدى جاسايمىز. ءتۇرلى تەحنولوگيانى پايدالانىپ, ءوز بىلىمدەرىن شىڭداۋ كەرەك. بىلىمدە شەكارا جوق. جاستار وسى مۇمكىندىكتى ورنىمەن پايدالانسا, جەتىستىككە جەتەتىنى انىق», دەيدى Xu Hai.
«Huawei» ورتالىعى زاماناۋي تەلەكوممۋنيكاتسيالىق قۇرىلعىلارىمەن جانە باعدارلامالىق ونىمدەرىمەن تولىق قامتىلعان. اكادەميادا جەتىسۋ ۋنيۆەرسيتەتىنىڭ ستۋدەنتتەرى, IT سالاسىنىڭ ماماندارى اقپاراتتىق تەحنولوگيالار مەن تەلەكوممۋنيكاتسيا بويىنشا ءبىلىم الىپ, بىلىكتىلىگىن ارتتىرادى.
«بۇگىن ءبىر ۇلكەن جاڭالىقتىڭ كۋاگەرى بولىپ وتىرسىزدار. «Huawei» كومپانياسىنىڭ قولداۋىمەن ۇلكەن اكادەميا اشىلىپ جاتىر. بۇل وقۋ ورداسى بىلىمگەرلەرىنىڭ ساندىق بىلىمدەرىن دامىتۋعا باعىتتالعان. وسى اكادەميا وبلىستىڭ وركەندەۋىنە جاقسى جاڭالىقتار الىپ كەلەدى دەپ ويلايمىز. مۇندا ساباق بەرەتىن مۇعالىمدەر اكادەميانىڭ بازاسىندا تولىق وقۋدان ءوتتى, ەندى العان بىلىمدەرىن ستۋدەنتتەرگە ۇيرەتۋگە دايىن. ءبىز «Huawei» كومپانياسىمەن ءالى دە بىرلەسىپ جۇمىس ىستەپ, ورتالىقتى دامىتۋعا كۇش سالامىز», دەدى ۋنيۆەرسيتەت رەكتورى ە.بورىباەۆ.
ەندى ۋنيۆەرسيتەت وقىتۋشىلارى مەن ستۋدەنتتەرى «Huawei» كومپانياسىنىڭ بولىمدەرىندە تاعىلىمدامادان, وندىرىستىك جانە عىلىمي زەرتتەۋ تاجىريبەلەرىنەن وتە الادى.
جەتىسۋ وبلىسى
