جاقىن كۇندەرى جايىق وزەنىنىڭ دەڭگەيى رەسەيدەن كەلەتىن سۋدىڭ اسەرىنەن قاتتى كوتەرىلۋى مۇمكىن. قازىر وزەن جايىلماسىنداعى ساياجايلاردا تۇراتىن تۇرعىنداردى كوشىرۋ قىزۋ ءجۇرىپ جاتىر. 9-ساۋىردە 77 ادام, ونىڭ ىشىندە 29 بالا قاۋىپسىز جەرگە جەتكىزىلدى.
وڭىردە قازىر سۋ قويمالارى ەرەكشە باقىلاۋعا الىنعان. بۇگىنگى تاڭدا «قازسۋشار» مەكەمەسىنە قاراستى سۋ قويمالارى ورتاشا العاندا 72%-عا تولىپ تۇر. بۇل سۋدىڭ كولەمى 399 ملن تەكشە مەتردى قۇرايدى.
ماماندار رەسەي فەدەراتسياسىنىڭ ورىنبور جانە ساراتوۆ وبلىستارىنىڭ سۋ شارۋاشىلىعى قىزمەتتەرىمەن كۇندەلىكتى اقپارات الماسىپ وتىر.
«رەسەيلىك ارىپتەستەردىڭ مالىمەتى بويىنشا, باتىس قازاقستان وبلىسىنىڭ اۋماعىنا پريۋزەن سۋ قويماسىنان قاراوزەنگە سەكۋندىنا 66 تەكشە مەتر سۋ كەلىپ جاتىر. وتكەندە سۋ تاسقىنىنىڭ شىڭى كەزىندە بۇل سەكۋندىنا 550 تەكشەمەترگە جەتكەن ەدى. قازىر مۇندا سۋ تاسقىنى اياقتالىپ قالدى. سارىوزەندە دە سۋ تاسقىنىنىڭ بەتى قايتتى. ءبىز قوس وزەنگە 400,0 ملن تەكشە مەتردەن استام سۋ الىپ ۇلگەردىك. ونىڭ ءبارى كولمەكتەرگە جانە تابيعي شابىندىقتارعا, سونداي-اق سۋ قويمالارى مەن كولدەردى تولتىرۋعا باعىتتالدى», دەيدى «قازسۋشار» مەكەمەسى وبلىستىق فيليالىنىڭ ديرەكتورى راۋان قۇسايىنوۆ.
قازىر شاعان سۋ قويماسىندا سۋ دەڭگەيى 29,40 مەتر بولىپ تۇر. سۋ قويماسىنىڭ بارلىق قاقپاسى 2023 جىلدىڭ كۇزىنەن باستاپ تولىق اشىق, تاسقىن سۋ يممارات ارقىلى ەركىن ءوتىپ, جايىققا قۇيىلىپ جاتىر. وزەن سۋى دەڭگەيىن ساقتاۋ ءۇشىن تاسقىن وتكەن سوڭ سۋ قاقپالارى جابىلادى. قازىر شاعان مەن دەركول وزەندەرىنىڭ بويىنداعى گيدروبەكەتتەر سۋ دەڭگەيى تومەندەپ جاتقانىن كورسەتتى.
ورىنبور وبلىسىندا ورنالاسقان يرەكلى سۋ قويماسىنان جايىق وزەنىنە سۋ تاستاۋ مولشەرى 9 ءساۋىر كۇنى ساعات 08:00-دە سەكۋندىنا 1670 تەكشەمەتر بولسا, ساعات 16:00-دە سەكۋندىنا 1342 تەكشە مەترگە ازايتىلدى. وسىدان بىرەر كۇن بۇرىن بۇل كورسەتكىش سەكۋندىنا 2170 تەكشەمەترگە جەتكەن ەدى.
جايىق وزەنى ءبىر تاۋلىكتە 7 سم قوسىپ, ورال قالاسىنىڭ تۇسىندا ساعات 9-ءساۋىر كۇنى تاڭعى ساعات 08:00-دە سۋ دەڭگەيى 710 سم بولدى. قاۋىپتى دەڭگەي - 850 سم.
جالپى, بيىلعى سۋ تاسقىنى باستالعالى بەرى وزەن دەڭگەيى 6 مەترگە كوتەرىلدى. ءساۋىر ايىنىڭ ەكىنشى جارتىسىندا ساقمار وزەنى مەن يرەكلى سۋ قويماسىنان كەلەتىن سۋدىڭ ەسەبىنەن جايىق سۋى 10 مەترگە دەيىن كوتەرىلۋى مۇمكىن دەيدى ماماندار.
قازىر جايىق وزەنىنەن جايىق-كوشىم ارناسىنا سەكۋندىنا 102 تەكشەمەتر سۋ قۇيىلىپ جاتىر. وزگە دە سۋ قويمالارىنا سۋ جينالۋدا. 8 ساۋىردەن باستاپ كولتاباندار مەن تابيعي شابىندىقتارعا سۋ بەرىلە باستادى.
باتىس قازاقستان وبلىسى
