فوتو: primeminister.kz
ۇكىمەت باسشىسى تەپليچنوە جانە كوجەۆەننايا اۋىلدارىنداعى قورعانىش ۇيىندىلەرىنىڭ جاعدايىن قاراپ, 2017 جىلعى سۋ تاسقىنىنان كەيىن جۇرگىزىلگەن جۇمىستاردىڭ ەسەبىن تىڭدادى.
قازىرگى ۋاقىتتا سەرگەەۆ سۋ قويماسىنداعى سۋ دەڭگەيىنىڭ جوعارىلاۋىن ەسكەرە وتىرىپ, قولدانىستاعى بوگەتتەردى نىعايتۋ جانە ولاردىڭ ۇزىندىعى مەن بيىكتىگىن ارتتىرۋ بويىنشا جۇمىستار جۇرگىزىلىپ جاتىر. جالپى, قارعىن سۋدى وتكىزۋ ءۇشىن اۆتوجولداردا جول توسەمىن ارشۋ جۇمىستارى 6 رەت جۇرگىزىلدى. بالامالى باعىت قاراستىرىلىپ, بەلگىلەر قويىلىپ, كەزەكشىلىك ۇيىمداستىرىلعان. سۋ تاسقىنى كەزەڭى باستالعالى بەرى ەلدى مەكەندەردىڭ كوشەلەرى مەن اۋلا اۋماقتارىنان 440 مىڭ م3 سۋ سورىلدى. 165 شاقىرىمنان استام ارىق تازارتىلدى, 2.7 شاقىرىم كانالدار كەڭەيتىلىپ, تەرەڭدەتىلدى.
ولجاس بەكتەنوۆ سۋ تاسقىنىنان زارداپ شەككەندەردى قولداۋ شارالارى مەن جۇرگىزىلىپ جاتقان جۇمىستار تۋرالى تۇرعىندار سۇراقتارىنا جاۋاپ بەردى, ەرىكتىلەر مەن ساراپشىلارعا كورسەتكەن كومەكتەرى مەن قولداۋلارى ءۇشىن العىسىن ءبىلدىردى.
ۇكىمەت باسشىسى تارتىلعان قوسىمشا كۇشتەر مەن تەحنيكانى ەسكەرە وتىرىپ, بوگەتتەردى نىعايتۋ جۇمىستارىنىڭ قارقىنىن جەدەلدەتۋ, ونىڭ ىشىندە بيىكتىگىن ارتتىرۋ قاجەتتىگىن اتاپ ءوتتى.
«جۇمىسقا جەكە قۇرام مەن ۇلتتىق ۇلان جۇمىلدىرىلدى. پولك تە كۇشەيتىلەدى. قورعانىس مينيسترلىگى قوسىلدى, سوندىقتان كۇش جەتكىلىكتى بولۋى كەرەك. قازىر كۇش بىرىكتىرۋىمىز قاجەت. الداعى 2-3 كۇندە اۋىر زارداپتاردىڭ الدىن الۋ ءۇشىن كوپ جۇمىس ىستەۋ كەرەك. ەڭ الدىمەن ادامدار زارداپ شەكپەۋى ماڭىزدى», دەپ اتاپ ءوتتى ولجاس بەكتەنوۆ.
قازىرگى تاڭدا سۋ تاسقىنىنا قارسى ءىس-شارالارعا اكىمدىكتىڭ, پد, ۇلتتىق ۇلان بولىمشەسىنىڭ جانە جەكە ۇيىمداردىڭ 1432 قىزمەتكەرى, 1200 ەرىكتى قاتىسىپ جاتىر. پرەمەر-ءمينيستردىڭ تاپسىرماسى بويىنشا بۇگىن قورعانىس مينيسترلىگىنىڭ 300 اسكەري قىزمەتشىسى كەلدى. وسىلايشا بارلىعى 3000-عا جۋىق ادام جۇمىلدىرىلدى.
سولتۇستىك قازاقستان وبلىسىنداعى سۋ تاسقىنى جاعدايى ەرەكشە باقىلاۋعا الىندى. پرەمەر-ءمينيستردىڭ ءبىرىنشى ورىنباسارى رومان سكليار دا وسىندا. جەدەل شتابتار تاۋلىك بويى جۇمىس ىستەيدى.
