فوتو: adyrna.kz
بۇگىندە ۇلتتىق ۆولونتەرلەر جەلىسى جەدەل شتابىنىڭ جۇمىسى اياسىندا ەلىمىزدەگى 20 ايماقتا وڭىرلىك ۆولونتەرلەر فرونت-كەڭسەسى بازاسىندا Call center قۇرىلدى. وعان قوسا گۋمانيتارلىق كومەك جيناۋ پۋنكتتەرى ۇيىمداستىرىلعان. كومەك جيناۋ پۋنكتتەرىنە 20 مىڭ ۆولونتەر جۇمىلدىرىلىپتى. ولار كۇندەلىكتى ساۋدا ورىندارىن ارالاپ, جومارت جۇرەك كاسىپكەرلەر تەگىن بەرگەن زاتتاردى وبلىستىق جاستار رەسۋرستىق ورتالىعىنا جەتكىزىپ جاتىر. سول جەردە سۇرىپتاپ, قوراپ نەمەسە قاپشىققا سالادى.
– پۋنكت ازىرگە توقتاۋسىز جۇمىس ىستەيدى. رەسپۋبليكالىق چاتىمىز بار. ءبىز ولارمەن تىكەلەي بايلانىستامىز. قانداي زاتتار كەرەك ەكەنى سول چاتتا ايتىلادى. بۇل جەردە جاڭا تۋعان پەرزەنتتەن باستاپ, ۇلكەن ادامعا دەيىن ارنالعان كيىمدەر تاپسىرىلىپ جاتىر. اياقكيىم, ءارتۇرلى سومكە, كانتسەلياريالى تاۋارلاردى دا قابىلدايمىز, – دەدى ماڭعىستاۋ وبلىستىق جاستار رەسۋرستىق ورتالىعىنىڭ باسشىسى گۇلميرا بۇرحاندينوۆا.
جالپى سالماعى ەكى توننادان اساتىن گۋمانيتارلىق كومەك تاياۋ كۇندەرى كورشى وبلىستارعا تەمىرجولمەن جىبەرىلەدى. قالا حالقى دا ساۋاپتى ىستەن قالىس قالماي, جۇك قابىلداۋ پۋنكتىنە گيگيەنالىق بۇيىمدار مەن تازا كيىمدەردى اكەلىپ جاتىر.
