فوتو: وقۋ-اعارتۋ مينيسترلىگى
عاني بەيسەمباەۆ وتكەن جىلى مەملەكەت باسشىسىنىڭ قاتىسۋىمەن وتكەن استانانى دامىتۋ ماسەلەلەرىنە ارنالعان كەڭەستەن كەيىن وقۋ-اعارتۋ مينيسترلىگى مەن استانا اكىمدىگى ەلوردانىڭ ءبىلىم جۇيەسىن دامىتۋدىڭ 2029 جىلعا دەيىنگى جول كارتاسىن قابىلداعانىن ەسكە سالدى. ول قۇجات ناقتى تۇيتكىلدەردى, سونىڭ ىشىندە ءۇش اۋىسىمدى وقىتۋ ماسەلەسىن شەشۋدى قامتيدى.
ء«بىزدىڭ باستى مىندەتىمىز – بالالارىمىزعا بارىنشا قاۋىپسىز ءارى قولايلى جاعداي جاساۋ. بۇل ماسەلەدە ەلوردانىڭ ءبىلىم بەرۋ جۇيەسى وزگە وڭىرلەرگە ۇلگى بولۋى ءتيىس. مينيسترلىك ءوز تاراپىنان نەگىزگى مىندەتتەردى شەشۋدە اكىمدىككە قولداۋ كورسەتۋدى جالعاستىرۋعا دايىن. بىرلەسكەن جۇمىستىڭ ارقاسىندا وتكەن جىلى عانا 12 جاڭا مەكتەپ اشىلدى. ونىڭ 10-ى مينيسترلىكتىڭ قولداۋىمەن پايدالانۋعا بەرىلدى. بيىل تاعى 27 مەكتەپ سالىنادى. ينفراقۇرىلىمدى دامىتۋمەن قاتار جوعارى بىلىكتى كادرلارمەن قامتاماسىز ەتۋ ماسەلەسى شەشىلۋدە. ەلوردالىق 18 پەداگوگ كادر رەزەرۆىنە كىردى, 7 پەداگوگ باسشىلىق لاۋازىمدارعا تاعايىندالدى», دەپ اتاپ ءوتتى عاني بەيسەمباەۆ.
بۇگىندە ەلوردادا 175 جالپى ءبىلىم بەرەتىن مەكتەپ, 550 بالاباقشا جانە 33 كوللەدج جۇمىس ىستەيدى. مينيستر ولاردىڭ جۇمىسىمەن تانىسىپ, بالالارمەن سويلەستى. ساباقتارعا قاتىسىپ, پەداگوگتەرمەن كەزدەسۋلەر وتكىزدى.
ارىپتەستەرىنە ارناعان سوزىندە عاني بەيسەمباەۆ پەداگوگتەردى قولداۋ شارالارى الداعى ۋاقىتتا دا جالعاساتىنىنا توقتالدى. اتاپ ايتقاندا, پەداگوگتەردىڭ دەنساۋلىعىن نىعايتۋىنا, بىلىكتىلىگىن ارتتىرۋ ءۇشىن شەتەلدە تاجىريبە الماسىپ, تاعىلىمدامادان وتۋىنە ەرەكشە نازار اۋدارىلادى.
