ۇلتتىق سانا قۋاتى
بيىلعى قۇرىلتايدىڭ جاڭا فورماتتا تويلانا باستاعان ۇلىستىڭ ۇلى كۇنىنە ورايلاستىرىلىپ وتكىزىلۋى دە تەگىن ەمەس. ءداستۇرىمىز جاڭعىرىپ, ۇلتتىق قۇندىلىقتارىمىز دارىپتەلىپ جاتقان شاقتا تاريحي مانگە يە كونە شاھار سارايشىقتىڭ ماڭىندا وتكەن باسقوسۋدىڭ ساناعا تۇسىرگەن ساۋلەسى مول.
تاريحي سانا نەگىزىندە قالىپتاساتىن ۇلتتىق سانا اداستىرماس تەمىرقازىعىمىز ىسپەتتى. ال ۇلتتىق سانا – ۇلت رەتىندە ساقتاپ قالاتىن ەڭ ۇلى قۋات. ۇرپاققا كەشەگى تاريحتان ساباق بولىپ, تۇلعالار تاعىلىمىمەن ءورىلىپ جەتىپ وتىرادى. سونىڭ ارقاسىندا ەل بىرلىگىن ساقتاپ, ىرگەسىن بۇتىندەپ كەلدى. بۇگىنگىدەي قۇندىلىقتار الماسىپ جاتقان كۇردەلى كەزەڭدە مەملەكەتىمىزدىڭ تۇتاستىعىن ساقتاۋدا ۇلتتىق بىرەگەيلىگىمىزدى نىعايتىپ, تاريحي-مادەني قۇندىلىقتارىمىزدى جاڭعىرتۋ اسا ماڭىزدى.
مەملەكەت باسشىسى اتىراۋداعى قۇرىلتايدىڭ ءۇشىنشى جيىنىندا ۇلتتىق قۇندىلىقتارعا باسىمدىق بەرىپ, ەلىمىزدىڭ رۋحاني-يدەولوگيالىق باعدارىن ايقىنداپ بەردى. رۋحى بيىك ۇلتتىڭ عانا جاھاندانۋ داۋىرىندە ءوزىن وزگەلەرگە مويىنداتا الاتىندىعى انىق. وسى ورايدا پرەزيدەنت قازاقستاننىڭ بولاشاق بەينەسىنىڭ باياندى بولۋى ۇشتاعان ۇعىمعا بايلانىستى ەكەندىگىن اتاپ ءوتتى. ونىڭ نەگىزگى تۇسىنىكتەرى – ادىلەتتى قازاقستان, ادال ازامات جانە وزىق ويلى ۇلت.
ادىلەتتى قازاقستان ۇعىمىن اركىم ءوزىنىڭ ادىلەتتىلىك تۋرالى پاراسات-پايىم بيىگىنەن قاراپ, كەي تۇستا سىناپ جۇرسە دە, ورتاق ماعىناسى – قۇقىقتىق زاڭناما مەن تارتىپكە نەگىزدەلگەن مەملەكەت اكسيوماسى. ياعني مەملەكەتتىك زاڭنامانىڭ ءتۇپ نەگىزىندە ادام قۇقىقتارى جانە الەۋمەتتىك مارتەبەسىنە قاراماي زاڭ الدىندا ءبارىنىڭ تەڭ بولۋى دەگەن قاعيدا تۇرادى. ونىڭ نەگىزىندە زاڭدى قۇرمەتتەيتىن, ءتارتىپ ساقتايتىن قوعام قۇرىلادى. دەمەك ادام قۇقىعى, زاڭنىڭ سالتانات قۇرۋى جانە قوعامدىق ءتارتىپ – كەز كەلگەن حالىقتىڭ وركەنيەتتىلىگىنىڭ ماڭىزدى جانە جارقىن نىشانى, قوعامنىڭ ەگەمەن ءارى اۆتونومدى مادەني ينستيتۋتى.
دامۋشى ەلدەردىڭ باعدارى سانالاتىن وركەنيەتتى مەملەكەتتەردەگى الەۋمەتتىك قۇندىلىقتارعا قاراساق, ولاردىڭ شىڭ باسىندا – تۇلعا ەركىندىگى مەن دەموكراتيا, ماتەريالدىق باقۋاتتىلىق, قوعامدىق ءتارتىپ پەن تۇراقتىلىق ەكەنىن بايقايمىز. مەملەكەتتىڭ بولاشاق باعدارى دەموكراتيا مەن ادام قۇقىعىن قورعاۋ, ەل ازاماتتارىنىڭ ءال-اۋقاتىن جاقسارتۋ جانە ادىلەتتى قوعام قۇرۋعا بەت الىسىن ودان ءارى دامىتۋعا باعىتتالعانى قۇرىلتايداعى نەگىزگى مەسسەندجەردىڭ ءبىرى رەتىندە قابىلداندى.
ادال ازامات – فيلوسوفيالىق تانىم
پرەزيدەنت ايتقان ەكىنشى تاعان – ادال ازامات. «اتاڭنىڭ بالاسى بولما, ادامنىڭ بالاسى بول» دەگەن گۋمانيستىك يدەياعا نەگىزدەلگەن ءتول مادەنيەتىمىزدە ادال ازاماتتىڭ سيپاتى تاڭسىق ەمەس ەكەنى ايان. ابايدىڭ «كەمەل ادام, تولىق ادام» فيلوسوفيالىق تانىمى – وسىنىڭ ايعاعى. ادال اس ءىشىپ, تابىسقا كەنەلۋ, بەس اسىق پەن بەس قاشىق قاسيەتتەردى ءبىلۋ, ءۇيىنىڭ عانا ەمەس, ۇلتىنىڭ دا ۇپايىن تۇگەندەيتىن تۇلعانى دارىپتەۋگە پرەزيدەنت اسا ءمان بەرىپ وتىر.
ينفوگرافيكانى جاساعان – زاۋرەش سماعۇل ,«EQ»
سونىمەن قاتار ادال ازامات تۇسىنىگى اياسىندا ق.توقاەۆ اتاپ وتكەن قوعامداعى كەسەلدى, كولەڭكەلى تۇستار تۋرالى دا قاراستىرعان ءجون. سەبەبى تۇلعا ءوزىنىڭ رۋحاني عانا ەمەس, دەنە-بىتىمىنە, دەنساۋلىعىنا جانە مەنتالدى ساۋلىعىنا دا امانات رەتىندە قاراپ, ادالدىق ساقتاۋى كەرەك. ينتەرنەتتى جانە الەۋمەتتىك جەلىلەردەگى پوپۋليستىك جانە حايپ ماقساتىن كوزدەيتىن ارزان كونتەنتتى تالعامسىز پايدالانۋ, ءدىني نەوفيت كوزقاراس, ءداستۇر مەن ءتول مادەنيەتكە دەگەن نيگيليزم, قىز الىپ قاشۋ, ناسىباي اتۋ سىندى توزعان سالت-سانا مەن اتاۆيزم, ناشاقورلىق پەن ويىنقۇمارلىق, تۇرمىستىق زورلىق-زومبىلىق, وركەنيەتكە قارسى ۆانداليزم, ىسىراپشىلدىق – ادامنىڭ ادال تابيعاتىنان الىستاتىپ, قۇردىمعا اپارار قامىتتىڭ ءبىر پاراسى عانا. اتالعان كەساپاتتاردان جاستاردى اراشالاۋ ءۇشىن مەملەكەتتىك دەڭگەيدە زاڭدارعا وزگەرىس ەنگىزىپ, وقۋ ورىندارىندا تاربيەلىك جۇمىستارعا ءجىتى ءمان بەرۋ تۋرالى ايتىلعان ۇسىنىستار قۇرىلتايدان كەيىن پارلامەنتتەگى وتىرىستاردا بىردەن قولعا الىنا باستادى.
وزىق ويلى ۇلت بولۋدىڭ العىشارتى
پرەزيدەنت ايتقان تاعى ءبىر فيلوسوفيالىق كاتەگوريا – وزىق ويلى ۇلت ۇعىمى ەجەلدە تورتكۇل دۇنيەنىڭ ءبىلىمپازدارى ءىلىم ىزدەپ كەلەتىن اقىل-وي مەن عىلىم ورداسى بولعان ورتالىق ازيا جەرىندە, ونىڭ ىشىندە قازاق دالاسىندا ىلكىدەن قالىپتاسقانى حاق. ءابۋ-ناسىر ءال-فارابي «ىزگى قالا تۇرعىندارى» تراكتاتىندا «قايىرىمدى قالا كەرەمەت, ساۋ دەنەگە ۇقسايدى, ۇلى ىستەر كىشىگىرىم جاقسى ارەكەتتەردەن, ال كەرەمەت قايىرىمدى ورتا جەكە تۇلعالاردان باستاۋ الادى» دەگەن وي ايتادى. وزىق ويلى ۇلت بولۋ ءۇشىن ءار ازاماتى سايدىڭ تاسىنداي مىقتى, بىرلىگى بەكەم, ەكونوميكاسى مىعىم بولۋى شارت.
وسى ورايدا پرەزيدەنت ەلدىڭ دامۋى ءۇشىن ۇلتتىق بۋرجۋازياعا زور مىندەت جۇكتەلەتىنىنە نازار اۋداردى. «باتىر بولساڭ جاۋىڭا نايزاڭ ءتيسىن, باي بولساڭ حالقىڭا پايداڭ ءتيسىن» دەيدى بابالارىمىز. قولىندا بارىمەن ءبولىسىپ, ەلىنىڭ ەرتەڭىنە الاڭداعان ۇلتتىق بۋرجۋازيا قالىپتاسقاندا عانا مەملەكەتتىڭ مەرەيى ۇستەم بولماق. كەشەگى الاش زامانىندا دا ەل بولۋ ىسىنە ەنشى ءبولىپ, بەلسەنە ارالاسقان تۇلعالاردى بىلەمىز. بۇل ءداستۇر بۇگىن دە بار. جارقىن بولاشاق الدىنداعى جاۋاپكەرشىلىكتى جانىمەن سەزىنگەن ءاربىر ادام – ەڭ باستى بايلىعىمىز. دامىعان ەلدەردىڭ بارلىعى دا ىسكەر ازاماتتارىنا ارقا سۇيەپ, حالىقتىڭ الەۋەتىن ارتتىرىپ كەلەدى.
سونداي-اق قاسىم-جومارت توقاەۆ قۇرىلتايدا وزىق ويلى ۇلت بولۋدىڭ ەڭ توتە جولى – كىتاپ وقۋ ەكەندىگىنە ەرەكشە توقتالدى. كىتاپ – سارقىلماس قازىنا. كىتاپ وقيتىن ۇرپاق قانا ەلىنىڭ ەرتەڭىن ويلايدى. مۇحتار اۋەزوۆ «ەل بولام دەسەڭ, بەسىگىڭدى تۇزە» دەپ كورەگەندىكپەن ايتقان. بولاشاعىن ويلاعان ەل ۇرپاق تاربيەسىنە, بىلىمىنە ءجىتى ءمان بەرەدى. وسى رەتتە كىتاپ وقۋعا قىزىعۋشىلىقتى ارتتىرۋ ءۇشىن كىتاپ وقۋ مۇمكىندىگىن تۇتىنۋشىعا جاقىنداتۋ تۇرعىسىنان قاراستىرعان دۇرىس. ياعني قازىرگى سول ءىرى قالالاردا تۇرعىزىلىپ جاتقان تۇرعىن-ءۇي كەشەندەرىندە كىشىگىرىم كىتاپحانالار مەن اعارتۋ جەلىسىن اشۋ وزەكتى. بۇل ادامداردىڭ زاماناۋي تۇرمىس-تىرشىلىگىنە وڭ كەلەتىن دۇنيە بولار ەدى.
ۇلت ۇستازى احمەت بايتۇرسىن ۇلىنىڭ ء«بىز باي, ءبىلىمدى, ءارى كۇشتى بولۋىمىز كەرەك. باي بولۋ ءۇشىن – كاسىپ, ءبىلىمدى بولۋ ءۇشىن وقۋ كەرەك. ال كۇشتى بولۋ ءۇشىن بىرلىك كەرەك» دەگەن ءسوزى بار. وسى ورايدا, مەملەكەت باسشىسىنىڭ ۇلتتىق قۇرىلتايدا سويلەگەن سوزىندە ايتىلعان ەلدىگىمىزدىڭ ءتورت قۇبىلاسى تۋرالى ويعا اۋىسساق.
ءتورت قۇبىلاڭ تەڭ بولسىن!
قازاق دانالىعىندا ء«تورت قۇبىلاڭ تەڭ بولسىن» دەگەن ءتامسىل بار. قۇبىلا الەمنىڭ ءتورت جاعى – باتىس, شىعىس, وڭتۇستىك, سولتۇستىك. ءدال وسى مەتافورانى قازاق مەملەكەتىنىڭ ءتورت قۇبىلاسى دەگەن پايىمدا قولدانساق, پرەزيدەنتتىڭ قۇرىلتايدا ايتقان كەلەسىدەي دۇنيەلەردى باعامداي الامىز.
ءبىرىنشى قۇبىلا – تاۋەلسىزدىك. اتا-بابالاردىڭ سان عاسىرلىق ارمانى بولعان ەگەمەندىك – ەلدىڭ ساياسي, ەكونوميكالىق, الەۋمەتتىك جانە يدەولوگيالىق تاۋەلسىزدىگى. قاي باعىتتا داميتىنىڭدى, كىممەن سەرىكتەس-دوس بولاتىنىڭدى, تۇرمىس-تىرىشىلىگىڭدەگى تاڭداۋدى ەشكىمنىڭ نۇسقاۋىنسىز, ەركىن تاڭداي الاتىن تاريحي مۇمكىندىك. قۇداي بۇيىرتقان, قان مەن تەر ارقىلى كەلگەن تاۋەلسىزدىكتى كوزدىڭ قاراشىعىنداي ساقتاۋىمىز كەرەك ەكەنى اقيقات. ونىڭ نەگىزگى ۇستىنى – تىنىشتىق پەن بىرلىك-ىنتىماق. وسى تۇرعىدا مەملەكەت باسشىسى ء«بىز «بىرلىگىمىز – ارالۋاندىقتا» دەگەن قاعيدانى بەرىك ۇستانىپ, ەلىمىزدەگى بەيبىتشىلىك پەن كەلىسىمدى ساقتايتىن بولامىز», دەپ شەگەلەپ ايتتى.
ەكىنشى قۇبىلا – ءتىل. قازاقستاننىڭ مەملەكەتتىك ءتىلى – قازاق ءتىلىنىڭ مارتەبەسىن وركەنيەتتى ەۆوليۋتسيالىق جولمەن دامىتۋ, ونىڭ قولدانىس اياسىن بيزنەس, تەحنولوگيا مەن عىلىم سالالارىندا كەڭەيتە ءتۇسۋ مەملەكەتتىك ساياساتتىڭ باسىم باعىتى ەكەندىگى ايتىلدى. ءتىلدىڭ ءتىرى اعزا ەكەندىگىنە باسا ءمان بەرىلىپ, ەشكىمدى ماجبۇرلەمەي, وعان دەگەن قاجەتتىلىكتى ارتتىرۋ ارقىلى قازاق ءتىلىنىڭ دىڭگەگىن بەرىك ەتە تۇسۋگە ءمان بەرىلىپ وتىر. قازىرگى ۋاقىتتا ەلىمىزدەگى قازاق تىلىندە ءبىلىم الۋشىلاردىڭ سانىنىڭ ارتۋى, قازاق تىلىندەگى عىلىمي ادەبيەتتىڭ دامۋى, ءبىلىم دەڭگەيىنىڭ جاقسارۋى, IT جانە جاساندى ينتەللەكت سالالارىندا قازاق ءتىلى اۋقىمىنىڭ كەڭەيۋى ءتىل ماسەلەسىنىڭ كەشەندى تۇردە دامۋىنىڭ كەپىلى بولا الادى.
ءۇشىنشى قۇبىلا – تاريح پەن مادەنيەت. الەمگە ايگىلى كلاسسيك شىڭعىس ايتماتوۆتىڭ «بوراندى بەكەت» رومانىنداعى ماڭگۇرت وبرازىنداعىداي, وتكەنىن بىلمەگەن ادامنىڭ بولاشاعى جوق, ونىڭ يەسى كەز كەلگەن باسقا مادەنيەت بولا الادى. سول سياقتى حالىقتار, ۇلتتار ءوز تاريحىن ۇمىتسا نەمەسە ب ۇلىڭعىر بىلسە, بولاشاعى دا نەعايبىل. سوندىقتان, وتكەنگە وكشە تىرەي وتىرىپ قانا قازىرگى ءسات پەن بولاشاققا جوسپار قۇرۋعا بولادى.
قۇرىلتايدا ەل پرەزيدەنتى جوشى ۇلىسىنىڭ ەۋرازيا كەڭىستىگىندەگى تاريحي, ساياسي, ەكونوميكالىق ۇدەرىستەردىڭ وزگەرۋىنە تىكەلەي اسەر ەتكەن تاريحي فەنومەن ەكەندىگىنە جانە ونىڭ قازاق ۇلتىنىڭ مەملەكەتتىلىك داستۇرىندە ايرىقشا ورىن الاتىنىنا توقتالدى.
جوشى ۇلىسى – ۇلى دالادا نەگىزىن قالاعان ىرگەلى مەملەكەت. دۇنيەنى تۇلپارىنىڭ تۇياعىمەن دۇبىرلەتكەن كوشپەلىلەر ءداۋىرىن تانۋ ارقىلى تاريحي سانامىزدى جەتىلدىرىپ, اسقاق رۋحىمىزدى وياتامىز. سول ارقىلى ءبىز قازاق حاندىعىنىڭ مەملەكەتتىك تاريحىن تەرەڭدەتەمىز.
ۇلىق ۇلىستىڭ جاۋىنگەرلىك قۇرىلىمى, ەل باسقارۋداعى ەرەكشەلىكتەرى ەرىكسىز ءبىزدى ءتانتى ەتەدى. ۋاقىت كەرۋەنى الىستاعان سايىن تابيعاتپەن ۇندەسە عۇمىر كەشىپ, جاراتىلىستىڭ تىلسىم سىرىنا بويلاعان ولاردىڭ سان عاسىرلىق قۇپياسى اشىلا تۇسكەندەي. التىن وردانىڭ زاڭدى مۇراگەرى رەتىندە ەلىمىز ەندى تىزگىندى قولعا الىپ, جوشىنىڭ ءبىر كەزدە حاندىق قۇرىپ, بۇگىندە ماڭگىلىك مەكەنىنە اينالعان قازاق توپىراعىنا الەم نازارىن اۋدارتۋعا ءتيىس. مەملەكەت باسشىسى بۇل باعىتتا اۋقىمدى جۇمىستار اتقارىلىپ جاتقانىن, الداعى ۋاقىتتا تاريحي فيلم تۇسىرىلەتىنىن ايتتى. وتكەنىن بىلگەن حالىقتىڭ بولاشاعى جارقىن بولماق. جاستاردىڭ تاريحقا دەگەن جاڭاشا كوزقاراسىن قالىپتاستىرۋ ەڭ قۇندى دۇنيە.
رۋحاني كەمەلدەنۋ پروگرەسكە باستايدى
ءتورتىنشى قۇبىلا – ءدىن مەن ءدىل. عاسىرلار قاتپارىنان, تاريح تەزگىسىنەن, ءداستۇر مەن سانا سۇزگىسىنەن ۇرپاقتان-ۇرپاققا جەتكەن ءداستۇرلى اتا-بابا ءدىنى – يسلامنىڭ سۋننيتتىك باعىتتاعى حانافي مازحابى. كەڭەس وداعى كەزەڭىندە تەپكىگە ءتۇسۋى از بولعانداي, تاۋەلسىزدىك العاننان كەيىن دە 90-جىلدارداعى يدەولوگيالىق ۆاكۋمنىڭ كەسىرىنەن پايدا بولعان دەسترۋكتيۆتى اعىمداردىڭ شابۋىلىنا دا جەم بولعان ءداستۇرلى ءدىنىمىز قازىرگى قولايلى تاريحي كەزەڭدە بوي كوتەرىپ, ءوزىنىڭ قازاق حالقىمەن بىرگە ومىرشەڭدىگىن كورسەتەدى دەگەن سەنىمدەمىز. وعان تولىق نەگىزدەر جاسالىپ جاتىر. ەكسترەميستىك-راديكالدى كوزقاراستاعى ءدىني توپتاردىڭ وزدەرىنىڭ نەوفيتتىك تانىمدارىن تەلىپ, سالت-داستۇرگە قايشى «قارا جامىلۋ», جاس كەزىندە ساقال قويۋدى مىندەت ساناۋ, ماتەريالدىق دۇنيە ءبىلىمىن يگەرمەۋ, مەديتسيناعا قارسى شىعۋ سىندى ورەسكەل قىلىق كورسەتۋىنە حانافي مازحابىنداعى ءداستۇرلى ءدىنىمىز ءتيىمدى توسقاۋىل بولاتىنى انىق.
بۇل ماسەلە تۋراسىندا پرەزيدەنت: ء«بىز باتىستىڭ, يا بولماسا باسقا دا كوزقاراس يەلەرىنىڭ ىقپالىمەن ءتول مادەنيەتىمىزگە جات ءارى الەمنىڭ دۋاليستىك نەگىزىنە كەرەعار قۇندىلىقتاردى ناسيحاتتاۋشىلاردىڭ جەتەگىنە ەرىپ كەتە المايمىز, كەتپەيمىز دە!», دەپ كەسىپ ايتتى. وسى ورايدا مەملەكەت باسشىسى ايرىقشا اتاپ وتكەندەي, ياساۋي ءىلىمى – دەشتى-قىپشاق جەرىنىڭ مادەني كودتارىن, گەوگرافياسى مەن رۋحاني ءومىرىن باسا نازارعا الا وتىرىپ, يسلام ءدىنىنىڭ سينتەزدەلگەن فورماتىن ۇسىنعان فەنومەنالدى زياتكەرلىك ءونىم.
ياساۋي تاريقاتىنىڭ ەرەكشەلىگى دۇنيەگە ورتاعاسىرلىق ءدىني دوگمامەن ەمەس, اقىل-پاراساتپەن قاراۋ جانە ەركىن ويلاۋ قاعيداتتارىن نەگىزگى پوستۋلات رەتىندە قولدانۋىندا جاتىر. وعان سايكەس, ءدىننىڭ سىرتقى فورماسى ەمەس, رۋحاني كەمەلدەنۋ جانە قوعامنىڭ دامۋى سىندى پروگرەسسيۆتى قۇندىلىقتارى اسا ماڭىزدى.
زياتكەرلىك كوزقاراستار جۇيەسىندە كەز كەلگەن قوعامنىڭ مادەني-رۋحاني كەمەلدەنۋى تەحنولوگيالىق پروگرەسكە باستايتىنى تۋرالى پايىم بار. ونىڭ جارقىن مىسالى – ەۋروپاداعى قايتا ورلەۋ ءداۋىرى. سول سياقتى قازاقستاننىڭ جاڭاشا دامۋى ەلىمىزدەگى ءدىني-رۋحاني فاكتورعا دا بايلانىستى. وركەنيەت كوشىندە توزعان ەل ەمەس, وزعان ەل بولۋ ءۇشىن مادەني-تاريحي نەگىزى بار, قازاق دالاسىندا عانا ەمەس, تۇگەل ورتالىق ازيانىڭ دامۋىنا ىقپال ەتكەن ياساۋي جولىن تەرەڭ زەرتتەپ, سوپىلىق ءىلىمنىڭ زاماناۋي ومىرگە يكەمدىلىگىن ساراپتاپ, ارنايى جوبالار ازىرلەۋ ەل دامۋىنىڭ كەپىلى بولماق. الايدا بۇل قازاقستاننىڭ زايىرلى مەملەكەت قاعيداتىنا قايشى كەلمەۋى كەرەك. ەلىمىزدەگى ءدىني تولەرانتتىقتى ساقتاي وتىرىپ, قوعامنىڭ دامىعان, پروگرەسسيۆتى جانە پراگماتيكالىق تۇرعىداعى ەل بولۋىن كۇشەيتە ءتۇسۋ – مەملەكەتتىك ساياساتتىڭ باسىم باعدارى.
ۇلتتىق قۇرىلتايدا ايتىلعان قوعامدىق قۇندىلىقتار, بولاشاقتىڭ بەدەرى, اعا بۋىنعا ارتىلعان جاۋاپكەرشىلىك پەن جارقىن جاستارعا دەگەن سەنىم سىندى جالپىۇلتتىق دامۋ مەن مەملەكەتتىك مۇددەنىڭ مۇلتىكسىز ورىندالۋى – اسا ماڭىزدى فاكتورلار. بۇل مامىلەلەر ساياسي جانە كوزقاراستار ءپليۋراليزمىن ساقتاي وتىرىپ, كومپروميستىك «ورتاق» ۇستانىم قالىپتاستىرا الۋ مادەنيەتىن دامىتا تۇسۋمەن تىعىز بايلانىستى.
ىنتىماق قايدا بولسا, ىرىس پەن دامۋ سوندا. سوندىقتان دا, اعاسى مەن ءىنىسى داۋلاسقان, بەگى مەن قاراشاسى جاۋلاسقان ەمەس, ءانى مەن ءسانى كەلىسكەن بەيبىت ەل رەتىندە مىعىم بولساق, ءتۇپ اتامىز كۇلتەگىن اڭساعان تۇپ-تۇتاس, تەحنولوگياسى دامىعان, كاسىبى ورلەگەن, جاستارى تالانتتى, باي-باقۋاتتى الەمنىڭ وزىق ەلدەرىنىڭ قاتارىنان كورىنەرىمىز انىق. جيىندا مەملەكەت باسشىسى دا بۇل ءسوزدى سانامىزدا قايتا جاڭعىرتىپ, بىرىگىپ ادىلەتتى قازاقستاندى قۇرۋعا شاقىردى. قازاقستان ەلدىكتىڭ تەمىرقازىعىنان اينىماي باياندى دا بايسالدى مەملەكەت رەتىندە دامي بەرەدى دەپ سەنەمىز.
ابزال ساپاربەك ۇلى,
«وتانداستار قورى» كەاق پرەزيدەنتى
