فوتو: qazaqstan.tv
تۇرگەن – باتان اۋىلدارىن جالعايتىن اۆتوجولدىڭ 23-ءشى شاقىرىمىندا بولعان كوشكىننىڭ جالپى كولەمى 200 تەكشە مەترگە جۋىقتايدى. مامانداردىڭ مالىمەتىنشە, قيراعان نىساندار مەن زارداپ شەككەندەر جوق. قازىر جولدى تازالاۋ جۇمىستارى جۇرگىزىلىپ جاتىر.
توتەنشە جاعدايلار دەپارتامەنتىنىڭ ماماندارى كۇننىڭ كۇرت جىلىنۋىنا بايلانىستى تاۋلى ايماقتاردا قار كوشكىنى ءجۇرۋ قاۋپى جوعارى ەكەنىن العا تارتتى.
«الماتى وبلىسىنىڭ اۋماعىندا ىلە-الاتاۋدىڭ وڭتۇستىك بەتكەيلەرىندە, ياعني, ەڭبەكشىقازاق, تالعار جانە قاراساي اۋداندارىندا 55 قار كوشكىنى جۇرەتىن ۋچاسكەلەر انىقتالدى. نەگىزگى قار كوشكىنىنىڭ ءتۇسۋى اۋا تەمپەراتۋرا فونىنىڭ جوعارىلاۋىنان جانە جاڭبىر مەن قار ارالاس مول جاۋىن-شاشىننىڭ تۇسۋىنە بايلانىستى بولادى. سوندىقتان تاۋعا شىققاندا قاۋىپسىزدىك ەرەجەلەرىن قاتاڭ ساقتاۋلارىڭىزدى سۇرايمىز», دەيدى الماتى وبلىستىق تجد باسقارما باسشىسى داۋرەن ازاماتوۆ.
