اقتوعاي اۋدانى اكىمىنىڭ ورىنباسارى ەرمەك ماشرىقوۆ جالاۋلى ەلدى مەكەنىندە جالپى سانى 14 ءۇي سۋ استىندا قالىپ قويعانىن جەتكىزدى. جاعدايدىڭ كۇردەلەنۋىنە بايلانىستى اتالعان اۋىلدا جەرگىلىكتى اۋقىمداعى تابيعي سيپاتتاعى توتەنشە جاعداي جاريالاندى.
«جالاۋلى اۋىلى ويپاڭ جەردە ورنالاسقاندىقتان, جاعداي كۇردەلى بولىپ تۇر. اۋىلعا ەرىگەن قار سۋى ءالى دە كىرىپ جاتىر. سۋ سورۋ جۇمىستارى ۇزدىكسىز جۇرگىزىلۋدە. 14 ءۇيدىڭ تۇرعىندارىنا كومەكتەسىپ, ولاردى ۋاقىتشا تۋىستارىنىڭ ۇيلەرىنە ورنالاستىردىق. مالدار قۇرعاق جەرگە ايداپ شىعارىلدى. ارنايى كوميسسيا ازاماتتاردىڭ باسپانالارىن تەكسەرۋگە شىقتى, كەلتىرىلگەن زالالدى باعالايتىن بولادى», دەيدى ول.
پاۆلودار وبلىسى اكىمىنىڭ ءباسپاسوز قىزمەتىنەن حابارلاعانداي, قازىرگى ساتتە اقسۋ قالاسىندا, اقتوعاي, ۋسپەن, ەرتىس, شارباقتى جانە تەرەڭكول اۋداندارىندا قارعىن سۋ بويىنشا 10 ۋچاسكە باقىلاۋدا تۇر. قىزىل سۋ جۇرە باستاعالى جانە وتكەن اپتا سوڭىندا جاۋعان نوسەر جاڭبىردىڭ سالدارىنان 18 تۇرعىن ءۇيدى سۋ باسقان. قازىرگى ۋاقىتتا 8 ۇيدەن سۋ شىعارىلدى, ال اقتوعاي جانە ۋسپەن اۋداندارىندا 10 ءۇي بويىنشا سۋدى جىرۋ, سورۋ جۇمىستارى جالعاسىپ جاتىر.
«بۇگىن ارنايى كوميسسيا بارلىق سۋ باسقان ۇيلەرگە كەلتىرىلگەن زالالدى باعالاۋ جۇمىستارىنا كىرىستى. كوميسسيا جۇمىسىنىڭ قورىتىندىسى بويىنشا بارلىق زارداپ شەككەندەرگە وبلىس بيۋدجەتىنىڭ رەزەرۆىنەن جانە بيۋدجەتتەن تىس قاراجات ەسەبىنەن كومەك كورسەتىلەتىن بولادى», دەپ مالىمدەدى ءباسپاسوز قىزمەتىنەن.
وڭىرلىك توتەنشە جاعدايلار دەپارتامەنتى باستىعىنىڭ ورىنباسارى ولەگ ترەششەۆتىڭ ايتۋىنشا, قارعىن سۋ قازىرگى ۋاقىتتا وبلىستىڭ وڭتۇستىك ايماقتارىنا قاراي ويىسا تۇسكەن. سوڭعى كۇندەرى توپىراقتاعى توڭنىڭ بەتى ءجىپسىپ, سۋ جاقسى سىڭە باستاعان. ايتسە دە, سولتۇستىكتەگى, رەسەي فەدەراتسياسىمەن شەكارالاس اۋىلدارعا قاۋىپ ءتونۋى مۇمكىن. بۇل وڭىرلەردە قار ءالى تولىق ەري قويماعان. ەلدى مەكەندەردەن قار شىعارىلىپ, ارىقتار قازىلىپ جاتىر.
«اقمولا وبلىسىنداعى سۋ قويمالارىنان سۋ بوساتىلىپ جاتىر. جىبەرىلىپ جاتقان سۋ نورماداعىدان ارتىق, سوعان وراي وبلىستا تاعى قوسىمشا ۋچاسكەلەردى سۋ باسۋى ىقتيمال. دەيتۇرعانمەن ءبىزدىڭ كۇشتەرىمىز قاۋىپتىڭ بەتىن قايتارۋعا قاۋقارلى», دەيدى دەپارتامەنت وكىلى.
وبلىس بويىنشا سۋ تاسقىنىنا قارسى ءىس-شارالارعا 399 ادام, 130 بىرلىك تەحنيكا, 44 موتوپومپا, 2 ءجۇزۋ قۇرالى جۇمىلدىرىلعان. سوڭعى ءۇش تاۋلىك ىشىندە 1,7 ملن تەكشە مەتردەن استام سۋ سورىلدى, 7,5 مىڭ توننا ينەرتتى ماتەريال توگىلىپ, 8 مىڭنان استام قاپشىق توسەلگەن.
