وتىرىستى اشقان ەدىل جاڭبىرشين اتالعان زاڭ جوباسى 2023 جىلعى 19 ساۋىردە مەملەكەت باسشىسى قاسىم-جومارت توقاەۆتىڭ ەلىمىزدىڭ الەۋمەتتىك-ەكونوميكالىق دامۋ ماسەلەلەرى جونىندەگى كەڭەيتىلگەن كەڭەسىندە بەرىلگەن تاپسىرماسىنا سايكەس ءماجىلىس دەپۋتاتتارىنىڭ باستاماسىمەن ازىرلەنگەنىن ەسكە سالدى.
جيىندا زاڭ جوباسىنا باستاماشىلىق جاساعان دەپۋتاتتاردىڭ ءبىرى سامات مۇساباەۆ بايانداما جاسادى. دەپۋتاتتىڭ پىكىرىنشە, زاڭ جوباسىن ازىرلەۋگە بۇرالقى يتتەر مەن قاراۋسىز قالعان جانۋارلاردى رەتتەۋدە قولدانىستاعى زاڭنىڭ ناقتى ناتيجە بەرمەۋى نەگىز بولعان.
«قوعامدا كوپتەگەن قوردالانعان رەزونانستى جاعداي ورىن الىپ وتىر. اتاپ ايتسام, بۇرالقى يتتەر جانە قاراۋسىز قالعان جانۋارلاردىڭ ادامدارعا, ونىڭ ىشىندە بالالارعا اگرەسسيا كورسەتىپ, دەنساۋلىقتارىنا نۇقسان كەلتىرگەن. سايلاۋشىلاردىڭ دەپۋتاتتارمەن كەزدەسۋلەرىندە قولدانىستاعى زاڭدى قايتا قاراۋ جونىندەگى تالاپتارى دا بار. سونىمەن قاتار باق وكىلدەرىنىڭ جانە الەۋمەتتىك جەلىلەردە قوعامنىڭ بۇرالقى جانە قاراۋسىز قالعان يتتەردىڭ ماسەلەسىن ءجيى كوتەرۋى سەبەپ بولىپ وتىر. مەملەكەت باسشىسى اتاپ وتكەندەي, ءبىز جانۋارلارعا قامقورلىق جاساۋىمىز كەرەك, بىراق ولاردىڭ ادامدارعا, اسىرەسە, بالالارعا قاتىستى اگرەسسياسىنا جول بەرمەۋ كەرەكپىز», دەدى س.مۇساباەۆ.
وسىعان بايلانىستى, دەپۋتاتتار تاراپىنان زاڭ جوباسىنا ءبىرشاما ۇسىنىس ەنگىزىلگەن.
«بىرىنشىدەن, جانۋارلاردى ەسەپكە الۋدىڭ بىرىڭعاي ەلەكتروندىق بازاسىن ورتالىقتاندىرۋ. ەكىنشىدەن, جانۋاردى ۋاقىتشا ۇستاۋ ورنىنا ورنالاستىرعانعا دەيىن جانۋاردىڭ يەسىنە ودان باس تارتۋعا تىيىم سالۋدى بەلگىلەۋ, سونداي-اق جانۋاردىڭ يەسىنە ونى دالاعا تاستاماي, ۋاقىتشا ۇستاۋ ورنىنا وتكىزۋدى مىندەتتەۋ. ۇشىنشىدەن, جانۋارلار اگرەسسيا تانىتىپ, شابۋىلداعان جاعدايلاردا جەرگىلىكتى اتقارۋشى ورگانداردىڭ وسىنداي وقيعالارعا شۇعىل دەن قويۋ شارالارىن ۇيىمداستىرۋ مىندەتىن بەلگىلەۋ. تورتىنشىدەن, اۋرۋعا شالدىققان, اگرەسسيا كورسەتەتىن, زووقورعاۋ ۇيىمدارى مەن وزگە دە تۇلعالار تاراپىنان ورناستىرىلماعان جانە تالاپ ەتىلمەگەن جانۋارلاردىڭ سانىن رەتتەۋ ءۇشىن, ەگەر ولار بۇرالقى يتتەر بولسا 15 كۇن ىشىندە, ال ەگەر ولار قاراۋسىز قالعان جانۋارلار بولسا 60 كۇن ىشىندە ەۆتانازيا قولدانۋ سەكىلدى نورمالار قاراستىرىلعان», دەلىنگەن ءماجىلىس ءباسپاسوز قىزمەتى تاراتقان حابارلامادا.
وتىرىس بارىسىندا ءماجىلىس دەپۋتاتتارى مەن قوعام وكىلدەرى قىزۋ پىكىر الماسىپ, سۇراقتارىن قويدى. اتاپ ايتقاندا, ءماجىلىس دەپۋتاتى مارحابات جايىمبەت ۇلى, «Animal Law پيۋك «KazBar» كوميتەتىنىڭ باسشىسى ولگا چەنتسوۆا, ۇلىتاۋ وبلىستىق ءماسليحاتىنىڭ تۇراقتى كوميسسياسىنىڭ توراعاسى بودىقوۆ ەركەبۇلان, پاۆلودار وبلىستىق ءماسليحاتىنىڭ دەپۋتاتى امانگەلدى ۇلى ماحامبەت جانە تاعى باسقالار بۇرالقى يتتەر ماسەلەسىنە قاتىستى ويلارىن تارقاتتى.
