جاعالاۋدا تۇسىرىلگەن ۆيدەو الەۋمەتتىك جەلىدە تاراپ جاتىر. كورسەتىلگەن كادرلارعا زەر سالساق, يتبالىقتاردىڭ كوزدەرىنە زاقىم كەلگەنىن بايقاۋعا بولادى.
ماڭعىستاۋ وبلىسى بويىنشا بالىق شارۋاشىلىعى ينسپەكتسياسى باسشىسىنىڭ مىندەتىن اتقارۋشى اندرەي رۋتسكي ارنايى قۇرىلعان كوميسسيا جاعالاۋدى تەكسەرىپ جاتقانىن ايتتى. بۇگىن, 29 ناۋرىزدا ۋرديۋك ءمۇيىسى مەن باۋتينسكايا شۇڭقىرىنان 40 يتبالىق ولەكسەسى تابىلدى.
مامانداردىڭ ايتۋىنشا, ولەكسەلەردەن فيزيكالىق زاقىم, جارالار نەمەسە زورلىق-زومبىلىقتىڭ بەلگىلەرى انىقتالعان جوق.
«داۋىلدان كەيىن ءبىزدىڭ ماماندار تەڭىز جاعالاۋىن ۇنەمى تەكسەرىپ وتىرادى. يتبالىقتار باسقا جەردە ولگەن, قىرىلۋ سەبەبىن مەديتسينالىق ساراپتاما انىقتايدى. ال ولاردىڭ كوزدەرى ولگەننەن كەيىن زاقىمدالسا كەرەك, بۇعان قۇستار سەبەپ بولۋى مۇمكىن», دەپ ءتۇسىندىردى رۋتسكي.
