ارقالىقتا وتكەن جەدەل شتاب وتىرىسىندا وبلىس اكىمى قۇمار اقساقالوۆ ۇلىتاۋ جاقتان تاعى سۋ كەلۋى مۇمكىن ەكەنىن, سوندىقتان قازىردەن باستاپ سۋ تاسقىنىنىڭ ەكىنشى تولقىنىنا دايىندىق شارالارى باستالعانىن ايتتى.
« ۇلىتاۋ جاقتا قار كوبەسى ءالى سوگىلە قويعان جوق. وعان تىكۇشاقپەن قاۋىپتى ايماقتارداعى ادامداردى قۇتقارۋ شارالارى بارىسىندا اۋەدەن بارلاۋ ارقىلى كوز جەتكىزدىك. دەمەك, بۇل – تاسقىننىڭ ەكىنشى تولقىنى بولادى دەگەن ءسوز. وسىعان بايلانىستى, ساقتىق شارالارىن ابدەن كۇشەيتە ءتۇسۋىمىز قاجەت. قاۋىپتى جەردە ورنالاسقان ەلدى مەكەندەردەگى تۇرعىندار ەرتەرەك قاۋىپسىز جەرلەرگە جەتكىزىلسىن. بارلىق دەپارتامەنت باسشىلارى ارقالىق قالاسىنا شوعىرلانىپ, توتەنشە جاعداي جويىلعانشا ارقايسى ءوز سالالارى بويىنشا سۋ تاسقىنىنان زارداپ شەككەن حالىققا ءتيىستى كومەكتەرىن بەرۋلەرى كەرەك», دەدى جەدەل شتاب توراعاسى قۇمار اقساقالوۆ.
قاۋىپتى ايماقتاردا سۋ قارقىنى باسەڭدەگەن. الايدا ۇلىتاۋ جاقتان كەلەتىن سۋدىڭ قارقىنى, اۋقىمى قانداي بولاتىنى بەيمالىم. سينوپتيكتەر الداعى كۇندەرى كۇن جىلىپ, سىناپ باعاناسى جوعارىلاي تۇسەدى دەگەن بوجام ايتىپ وتىر.
وبلىس اكىمدىگىنىڭ باسقارما, دەپارتامەنت باسشىلارىنىڭ ءبارى تاسقىن سۋدىڭ قاۋپى سەيىلگەنشە ارقالىقتا جۇمىس ىستەپ جاتقان جەدەل شتابتىڭ باسى-قاسىندا بولادى.
قوستاناي وبلىسى
