فوتو: اikyn.kz
2000 جىلعى 7 شىلدەدەگى قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى ازاماتتاردىڭ ءوزارا ساپارلارىنىڭ شارتتارى تۋرالى كەلىسىمگە وزگەرىستەر ەنگىزۋ تۋرالى حاتتاماعا مەملەكەت باسشىسىنىڭ تاشكەنت قالاسىنا ساپارى شەڭبەرىندە 2022 جىلعى 22 جەلتوقساندا قول قويىلعان.
زاڭنىڭ ماقساتى ەكى مەملەكەت اراسىنداعى دوستىق قاتىناستاردى ودان ءارى دامىتۋ, ولاردىڭ ازاماتتارىنىڭ ساپارلارىن رەتتەۋ, سونداي-اق ءبىر مەملەكەت ازاماتتارىنىڭ ەكىنشى مەملەكەتتىڭ اۋماعىندا بولۋى ءۇشىن قولايلى جاعدايلار جاساۋ ءۇشىن قۇقىقتىق نەگىز قۇرۋ بولىپ تابىلادى.
«قازاقستان مەن وزبەكستان مەملەكەتتەرى اراسىندا بەرىك باۋىرلاستىق قارىم-قاتىناس قالىپتاسقان. ەلدەرىمىز قول قويعان ماڭگىلىك دوستىق تۋرالى جانە وداقتاستىق تۋرالى شارتتار سونىڭ ايقىن دالەلى. بۇگىن قارالعان حاتتاما ەكى ەل ازاماتتارىنا ءوزارا ساپارلارىن جۇزەگە اسىرۋدا قوسىمشا وڭتايلى قۇقىقتىق جاعدايلار ورناتۋدى كوزدەيدى. جالپى ماقۇلدانعان زاڭ تاتۋ كورشىلىك قارىم-قاتىناستى ودان ءارى نىعايتۋعا ءوز ۇلەسىن قوسادى دەپ سەنەمىز», دەدى سەنات توراعاسى ماۋلەن اشىمباەۆ.
حاتتامادا, ەگەر تاراپتار مەملەكەتتەرى (قازاقستان مەن وزبەكستان) ازاماتتارىنىڭ بولۋ كەزەڭى تاراپ مەملەكەتىنىڭ مەملەكەتتىك شەكاراسىن كەسىپ وتكەن كەزدەن باستاپ كۇنتىزبەلىك 30 كۇننەن اسپايتىن بولسا, قۇزىرەتتى ورگانداردا تىركەۋسىز ولاردىڭ اۋماقتارىندا بولۋىنىڭ وڭايلاتىلعان ءتارتىبى كوزدەلەدى. وسىلايشا, ەكى مەملەكەت تە ءوز ازاماتتارىنىڭ ەكىنشى تاراپ مەملەكەتىنىڭ اۋماعىندا بولۋىنىڭ ءوزارا مەرزىمىن ۋاقىتشا تىركەۋسىز كۇنتىزبەلىك 5 كۇننەن 30 كۇنگە دەيىن ۇلعايتتى.
