26 ناۋرىز كۇنى ورال قالاسىندا جانە وبلىستىڭ 9 اۋدانىندا توقتاۋسىز جاڭبىر جاۋىپ, قىسقى قاردى ەرىتىپ جىبەردى. ناتيجەسىندە اقجايىق, ءبورلى, بايتەرەك, قازتالوۆ, قاراتوبە, سىرىم, تاسقالا, تەرەكتى جانە شىڭعىرلاۋ اۋداندارىندا تاسقىن سۋ باسۋ قاۋپى تۋدى. قار مەن جاڭبىر سۋى ارىقتار مەن كارىزدەرگە تولىپ, 3 الەۋمەتتىك نىساننىڭ جانە كوپقاباتتى 5 ءۇيدىڭ جەرتولەسىنە قۇيىلىپ, 298 جەكە ءۇيدىڭ اۋلاسىن باستى. قاۋىپ تونگەن ايماقتارعا قۇم سالىنعان قاپشىق جەتكىزىلىپ, سۋدى سورۋ جۇمىسى ۇيىمداستىرىلعان.
باتىس قازاقستان وبلىسىنىڭ اكىمى ناريمان تورەعاليەۆ ورال قالاسىنىڭ زاشاعان كەنتىندەگى سۋ باسۋ قاۋپى بار شاعىن اۋداندارعا, ساراتوۆ تاسجولىنداعى سۋ ارناسى جۇيەسىنە, سونداي-اق, ورال قالاسىنىڭ ەسكى ورتالىق كوشەلەرىنە بارىپ, جاعدايدى كوزىمەن كوردى. توتەنشە جاعدايلار دەپارتامەنتىنە, قالا اكىمدىگىنە جانە كوممۋنالدىق قىزمەت سالاسىنىڭ ماماندارىنا – قار, جاڭبىر سۋلارىن ۋاقتىلى شىعارۋ, جولداردى بوگەۋ, قاپشىقتارمەن قۇم توسەۋ, سۋ ارنالارى مەن قۇبىرلاردى تازالاۋدى تاپسىردى.
قازىر سۋ تاسقىنىنىڭ الدىن الۋ بويىنشا ارنايى وبلىستىق شتاب تاۋلىك بويى جۇمىس ىستەپ جاتىر. «112» جانە «109» تەلەفوندارىنا سوڭعى ءبىر تاۋلىك ىشىندە 1104 قوڭىراۋ ءتۇسىپتى. وسىنىڭ ىشىندە 792 ءوتىنىش بويىنشا ناقتى ءىس-شارا جاسالسا, 312 ءوتىنىش باقىلاۋعا الىنعان. بۇدان بولەك, جەدەل جەلىگە دە 56 قوڭىراۋ ءتۇسىپتى. بۇلاردىڭ ءبىر دە ءبىرى نازاردان تىس قالمايدى.
قارعىن سۋ اۆتوكولىك جولدارىنا دا قاۋىپ ءتوندىرىپ جاتىر. كۇرە جولداردىڭ 19 جەرىندە وسىنداي جاعداي تىركەلگەن. رەسپۋبليكالىق جانە وبلىستىق دارەجەدەگى 2 جولدىڭ, اۋداندىق دارەجەدەگى 17 جولدىڭ ۇستىنەن سۋ ءوتىپ كەتكەن. اقجايىق, جانىبەك, تەرەكتى, سىرىم جانە قاراتوبە اۋداندارىنداعى سۋ باسقان جولدارعا كەزەكشىلىك, ارنايى بەلگىلەر ورناتىلعان. «ازىرگە ەلدى مەكەندەرگە قاۋىپ جوق» دەيدى توتەنشەلىكتەر. جەرگىلىكتى اكىمدىكتەردىڭ 45 قىزمەتكەرى مەن 13 تەحنيكاسى, پوليتسيا دەپارتامەنتىنىڭ 6 قىزمەتكەرى مەن 3 كولىگى, «ورال جولدارى» مەكەمەسىنىڭ 4 وكىلى مەن 1 كولىگى قاۋىپتى ايماقتاردا كەزەكشىلىكتە تۇر.
تۇنگى ساعات 12:00-دە وبلىستىق جەدەل شتاب باستىعى, وبلىس اكىمىنىڭ ورىنباسارى قاليار ايتمۇحامبەتوۆتىڭ توراعالىعىمەن جيىن ءوتىپ, اۋدان باسشىلارىنىڭ سۋ تاسقىنىنىڭ الدىن الۋ بويىنشا ەسەبى تىڭدالدى. جوعارىدا ايتىلعان الەۋمەتتىك مەكەمەلەر مەن تۇرعىن ۇيلەردىڭ جەرتولەسىنە كىرگەن سۋ توقتاتىلىپ, تونگەن قاۋىپتىڭ بەتى قايتقان.
قاراتوبە مەن سىرىم اۋداندارىندا قالىپتاسقان كۇردەلى جاعدايعا بايلانىستى قوسىمشا كۇش جۇمىلدىرىلىپ جاتىر.
«قازگيدرومەت» مەكەمەسىنىڭ مالىمەتىنە قاراعاندا تاسقالا اۋدانىندا ەكىنشى شەجىن جانە دەركول وزەنىندەگى سۋ دەڭگەيى كوتەرىلگەنى بايقالعان. جول-جونەكەي قوسىلعان سۋلاردىڭ اسەرىنەن وزەن كەمەرىنەن اسىپ كەتۋى مۇمكىن. ەكىنشى شەجىننىڭ قاۋىپتى دەڭگەيى 780 سم بولسا, قازىر ول 739 سم-گە جەتىپ قالعان. جەرگىلىكتى اكىمدىك 5000 دانا قاپشىق, 100 توننا ينەرتتى ماتەريال دايارلاپ, ساقاداي ساي وتىر. اۋىلدا قاۋىپتى جاعداي تۋسا, تۇرعىنداردى كوشىرىپ ورنالاستىرۋ ءۇشىن 2 بەكەت ازىرلەنگەن.
ء«وڭىر بويىنشا جاعداي كۇردەلى, بىراق بارلىق دەڭگەيدە ساقتىق شارالارى جاسالعان, جەدەل شتاب جۇمىس ىستەپ وتىر, جەرگىلىكتى بيلىك ورىندارى, ازاماتتىق قورعانىس قىزمەتى جەدەل كومەك كورسەتۋگە ءازىر», دەپ حابارلادى توتەنشە جاعدايلار دەپارتامەنتىنىڭ ءباسپاسوز قىزمەتى. جوعارىدا ايتىلعانداي, وبلىس اكىمىنىڭ بۇيرىعىمەن بارلىق ماڭىزدى قىزمەت ورىندارى تاۋلىك بويى جۇمىس رەجىمىنە كوشكەن.
سوڭعى مالىمەتتەرگە قاراعاندا وبلىس اۋماعىندا 131616 م3 سۋ سورىلىپ, قۇم سالىنعان قاپشىقتىڭ 5730 داناسى قاۋىپتى جەرلەرگە توسەلگەن. ءبىر مەزگىلدە ءتۇرلى قىزمەتتەن 990 ادام, 222 تەحنيكا, 153 موتوسورعى تاسقىننىڭ بەتىن قايتارۋعا جۇمىلىپ جاتىر. ايتا كەتەيىك, قۇتقارۋ جۇمىستارىنىڭ العى شەبىندە اسكەري ءبولىم ساربازدارى دا ءجۇر.
كەي جەردە اۆتوجولداردىڭ ۇستىنەن سۋ وتكەنىن ايتقان ەدىك. ولار اقجايىق اۋدانى, قۋرايلىساي اۋىلدىق وكرۋگىندەگى اتىبەك قىستاعى ماڭىنان وتەتىن «جۇبان-سايقۇدىق» اۆتوجولىنىڭ 7-ءىنشى شاقىرىمى, جانىبەك اۋدانى, جاقسىباي اۋىلدىق وكرۋگىندەگى «جانىبەك-تالوۆكا-كىشى وزەن» اۆتوجولىنىڭ 3 ويپاتتى ۋچاسكەسى, تەرەكتى اۋدانى, شالقار اۋىلدىق وكرۋگىندەگى ءسارىومىر اۋىلىنان 9 شاقىرىم جەردە, ء«سارىومىر-دۋانا» اۆتوجولىنىڭ 2 ويپاتتى ۋچاسكەسى, وسى اۋداننىڭ اڭقاتى اۋىلدىق وكرۋگىندەگى قاندىق اۋىلى ماڭىنداعى ء«سارىومىر-اڭقاتى» اۆتوجولى جانە «تەرەكتى-اقساي» اۆتوجولىنىڭ 19 شاقىرىمى. قازىر دۋانا اۋىلىمەن كولىك بايلانىسى جوق. قالعان ەلدى مەكەندەرگە اينالما جولدار بار, تۇرعىندارعا قاۋىپ تونبەگەن. جولدىڭ قاۋىپتى تۇستارىنا ارنايى بەلگى ورناتىلىپ, كەزەكشى قويىلعان.
باتىس قازاقستان وبلىسى
