فوتو: ن.بايبۋلين
سەنات سپيكەرىنىڭ ايتۋىنشا, ەل پرەزيدەنتىنىڭ تاپسىرماسى بويىنشا مۇمكىندىگى شەكتەۋلى ازاماتتاردى قولداۋ جانە كەدەرگىسىز ورتا قۇرۋ باعىتىندا اۋقىمدى جۇمىس اتقارىلىپ, بەرىك ينستيتۋتسيونالدىق نەگىز قالىپتاسىپ كەلەدى, ەلىمىزدە ەرەكشە قاجەتتىلىكتەرى بار ەرەسەكتەر مەن بالالاردىڭ ورتاعا بەيىمدەلۋىنە, ولاردىڭ ساپالى ءبىلىم مەن مەديتسينالىق قىزمەت الۋىنا, سپورتپەن شۇعىلدانۋىنا جانە جۇمىسپەن قامتىلۋىنا قاجەتتى جاعداي جاسالىپ جاتىر.
«سونداي-اق پارلامەنت سەناتى دا مۇگەدەكتىگى بار ازاماتتاردىڭ قۇقىقتارىن قورعاۋدى كۇشەيتۋ جانە تۇرمىس ساپاسىن جاقسارتۋ سالاسىندا ءتيىستى شارالار قابىلداپ جاتىر», دەگەن ماۋلەن اشىمباەۆ پالاتا جانىنان مۇمكىندىگى شەكتەۋلى جاندارعا قولداۋ كورسەتۋ ماقساتىمەن قۇرىلعان ينكليۋزيا جونىندەگى كەڭەستىڭ قىزمەتىنە توقتالىپ ءوتتى.
كەزدەسۋ بارىسىندا سەناتورلار ەستۋ, سويلەۋ, كورۋ, اۋتيزم سپەكترى جانە باسقا دا اۋىتقۋلارى بار بالالاردى وقىتۋدىڭ ارنايى جوبالارىمەن جانە مامانداندىرىلعان ادىستەمەسىمەن تانىستى. وسى رەتتە ورتالىقتا ينتەراكتيۆتى بولمەلەر, ارنايى ازىرلەنگەن دامىتۋشى جابدىقتارى بار سەنسورلىق-ديناميكالىق زالدار جۇمىس ىستەيتىنىن اتاپ وتكەن ءجون.
ورتالىق باسشىلىعىنىڭ ايتۋىنشا, قازىرگى ۋاقىتتا ورتالىقتىڭ ەسەبىندە 200 بالا جانە پسيحونەۆرولوگيالىق پاتولوگياسى بار 42 ەرەسەك ادام بار. مەكەمەنىڭ نەگىزگى مىندەتتەرىنىڭ ءبىرى – بالالاردىڭ وزىنە-ءوزى كومەكتەسۋ داعدىلارىن قالىپتاستىرۋ جانە ولاردىڭ جان-جاقتى دامۋىنا ىقپال ەتۋ. وسىعان بايلانىستى ەستۋ قابىلەتى بۇزىلىسقا ۇشىراعان 20-عا جۋىق ادام, ودان بولەك, مۇمكىندىگى شەكتەۋلى بالا تاربيەلەپ وتىرعان اتا-انالاردىڭ وزدەرى ورتالىقتا اسپاز, تاربيەشىنىڭ كومەكشىسى بولىپ ەڭبەك ەتەدى. بۇل الەۋمەتتىك بەيىمدەلۋ مەن دامۋ ءۇشىن قولايلى اتموسفەرا قالىپتاستىرۋعا ىقپال ەتەدى.
ورتالىقتىڭ ۇجىمىن جانە تاربيەلەنۋشىلەرىن ناۋرىز مەيرامىمەن قۇتتىقتاعان ماۋلەن اشىمباەۆ بۇگىنگى «19 ناۋرىز جاڭارۋ كۇنى» – تابيعاتتىڭ جاڭارۋىمەن قاتار تۇتاس قازاقستان قوعامىنىڭ جاڭعىرۋىن دا بىلدىرەتىنىن اتاپ ءوتتى.
