ينۆەستيتسيالىق ىنتىماقتاستىق پەرسپەكتيۆالارى تالقىلاندى

وتكەن جىلى ەادب قازاقستاننىڭ ۇلتتىق ەكونوميكاسىنىڭ ءتۇرلى سەكتورلارىنداعى بىرقاتار ينۆەستيتسيالىق جوبانى قارجىلاندىردى. ولاردىڭ قاتارىندا پوليپروپيلەن شىعاراتىن زاۋىت, ماگيسترالدىق تەپلوۆوزدار ساتىپ الۋ, قوستاناي وبلىسىندا جەل ەلەكتر ستانتسيالارىن سالۋ جانە ت.ب. بار.

جىلدىق ينۆەستيتسيالارداعى قازاقستاننىڭ ۇلەسى 2022 جىلعى 48,5%-دان 2023 جىلى 59%-عا دەيىن ءوستى.

بيىل ەادب-نىڭ قازاقستان ەكونوميكاسىنا سالعان جاڭا ينۆەستيتسيالارى كەمىندە $1 ملرد-تى قۇرايدى. وسى جىلعا ارنالعان نەگىزگى جوبالار پۋلى كولىك, ونەركاسىپ, ەنەرگەتيكا جانە قورشاعان ورتانى جاقسارتۋ, اوك سالالارىن, سونداي-اق الەۋمەتتىك ينفراقۇرىلىمدى جۇرگىزۋ مەن جاڭعىرتۋدى قامتيدى.

پرەمەر-مينيستر مەملەكەت باسشىسىنىڭ جول جەلىسىن دامىتۋ, تۇرعىن ءۇي قۇرىلىسى, تكش-نى جاڭعىرتۋ جانە گازداندىرۋ سالاسىنداعى اۋقىمدى ينفراقۇرىلىمدىق باستامالارىن ىسكە اسىرۋعا ينۆەستيتسيالار تارتۋدىڭ ماڭىزدىلىعىن اتاپ ءوتتى.

«بانكتىڭ باسىم باعىتى ءىرى ينفراقۇرىلىمدىق جوبالاردى قارجىلاندىرۋ بولۋعا ءتيىس. ءبىز ءوزارا ءتيىمدى نەگىزدە بانكپەن ىنتىماقتاستىقتى كەڭەيتۋگە دايىنبىز», دەدى ولجاس بەكتەنوۆ.

ءوز كەزەگىندە ەادب باسقارما توراعاسى نيكولاي پودگۋزوۆ قارجى ينستيتۋتىنىڭ تۇراقتىلىعى تۋرالى حابارلادى. اتاپ ايتقاندا, قابىلدانعان شارالاردىڭ ناتيجەسىندە ەادب $125 ملن مولشەرىندە قارجىلىق وڭ ناتيجەگە قول جەتكىزدى. بانكتىڭ نەسيەلىك رەيتينگى قازاقستاننىڭ تاۋەلسىز رەيتينگى دەڭگەيىندە ساقتالدى: «BBB-» (S&P), سونداي-اق قىتاي نارىعىندا سسXI «ااا» ەڭ جوعارى رەيتينگى الىندى. سونىمەن قاتار پورتفەلدىڭ ساپاسى جاقسارىپ, كەشىكتىرىلگەن تولەمدەردىڭ ۇلەسى تومەندەدى.

كەزدەسۋگە قاتىسۋشىلار ەادب جىلدىق ينۆەستيتسيالارىنداعى وتاندىق ۇلەسىنىڭ ارتقانىنا توقتالىپ, بانكتىڭ ينۆەستيتسيالىق بەلسەندىلىگىن ودان ءارى نىعايتۋ الەۋەتىن اتاپ ءوتتى.