فوتو: senate.parlam.kz
ەكىنشى قۇرىلتاي دا ەل باسشىسىنىڭ نۇسقاۋىمەن قازاق حاندارىنىڭ استاناسى بولعان قاسيەتتى تۇركىستاندا ءوتتى. مۇنداعى كوتەرىلگەن ىرگەلى ماسەلەلەر دە جۇزەگە اسا باستاعانىن كوز كورىپ, قۇلاق ەستىپ وتىر. جاڭا قازاقستاننىڭ ەرەكشە سيپاتى بولىپ تابىلاتىن, حالىقتىق پارلامەنت سانالاتىن ۇلتتىق قۇرىلتاي بۇل جولى ەجەلگى اتىراۋ وڭىرىندە شاقىرىلدى. وسىنداعى كونە سارايشىق قالاسى قاسىم حاننىڭ تۇسىندا قازاق ورداسىنىڭ استاناسى بولعان. بۇل قۇرىلتايدا دا ەلدىك ەلەۋلى ماسەلەلەر كوتەرىلدى.
قۇرىلتايدىڭ اتىراۋدا ءوتۋىنىڭ تاريحي-تانىمدىق جاعىنان ماڭىزى وتە زور. ويتكەنى قازىرگى كۇردەلى گەوساياسي جاعدايدا قازاقستاننىڭ مەملەكەتتىلىگى, بولاشاعى, كەلەشەگى, كۇن تارتىبىنە قويىلىپ جاتقان كەزدە پرەزيدەنتتىڭ وسىنداي قادامعا بارۋى تاريحي وقيعاعا اينالادى.
سونىمەن قاتار مەملەكەت باسشىسى ءوز سوزىندە ءبىلىم مەن عىلىم ماسەلەرىنىڭ ماڭىزدىعىلىعىن اتاپ ءوتتى.
ەل پرەزيدەنتى قۇرىلتايدىڭ كەزەكتى وتىرىسىن كوكشەتاۋدا وتكىزۋدى ۇسىندى. ونىڭ دا وزىندىك سەبەپتەرى بار. سەبەبى كوكشەتاۋ ءان مەن جىردىڭ ورداسى عانا ەمەس, ابىلاي حان تۋىن تىككەن قاسيەتتى حان ورداسى بولعان مەكەن. وسى جەردەن قازاقتىڭ سوڭعى حانى كەنەسارى دا تاۋەلسىزدىك ءۇشىن اتويلاپ اتقا مىنگەن. ەل پرەزيدەنتىنىڭ بۇل شەشىمىن ريزاشىلىقپەن قۇپتايمىز.
الەۋمەتتىك, مادەني ماسەلەلەردى شەشۋگە قۇرىلتاي وڭ سەرپىن بەرمەك. بيىلعى جيىندا بار باسىمدىق الەۋمەتتىك سالاعا ءبولىندى. ياعني, ەكونوميكا ءارتاراپتانىپ, وزگە ەلدەرمەن الىس-بەرىس, بارىس-كەلىس قايتا جاندانا تۇسپەك, مادەنيەت, تۋريزم سالالارى قايتا تۇرلەنەدى. ساراپشىلار سونداي-اق تاريحي سانانىڭ جاڭعىرۋى مەن قازاقى قۇندىلىقتاردى الەمدىك برەندكە اينالدىرۋ باعىتىندا دا ناقتى شەشىمدەر قابىلداناتىنىنا سەنىمدى.
