فوتو: ا.بايجۇمانوۆ
كوميتەت توراعاسى ءالي بەكتاەۆ قازاقستان ءۇشىن اگروونەركاسىپ كەشەنى ەل ەكونوميكاسىنىڭ نەگىزگى سالاسى ەكەنىن اتاپ ءوتتى. جاڭا تەحنولوگيانى پايدالانۋ ارقىلى قايتا وڭدەلگەن ءونىمنىڭ ۇلەسىن ۇلعايتا وتىرىپ, ونى 70 پايىزعا جەتكىزۋ كەرەك. بۇل تاپسىرمانى مەملەكەت باسشىسى جۇكتەگەن ەدى.
«قازاقستان ءۇشىن اگروونەركاسىپ سەكتورى مەن قايتا وڭدەۋ ونەركاسىبى ازىق-ت ۇلىك قاۋىپسىزدىگىن قامتاماسىز ەتۋ جانە اۋىل شارۋاشىلىعى ونىمدەرىنە ىشكى سۇرانىستى قاناعاتتاندىرۋدا ماڭىزدى ءرول اتقارادى. ۇكىمەتتىڭ, بيزنەس-قوعامداستىقتىڭ جانە اۋىل تۇرعىندارىنىڭ بىرلەسكەن كۇش-جىگەرىمەن عانا اگروونەركاسىپ سەكتوردىڭ تۇراقتى دامۋىن قامتاماسىز ەتۋگە جانە ەلدىڭ يمپورتتىق ونىمدەرگە تاۋەلدىلىگىن تومەندەتۋگە بولادى», دەدى ءالي بەكتاەۆ.
سەناتور زاكيرجان كۋزيەۆ ۇكىمەت ساعاتىنىڭ قورىتىندىسى بويىنشا كوميتەت ءوز قۇزىرەتى اياسىندا مەملەكەتتىك ورگاندارعا 27 ۇسىنىس بەرگەنىن ەسكە سالدى. ونداعى 13 ۇسىنىم بويىنشا مەملەكەتتىك ورگاندار قاجەتتى شارالار قابىلدادى, 6 ۇسىنىم ورىندالمادى جانە 3 ۇسىنىم بويىنشا تالقىلاۋ جانە جوسپارلاۋ ساتىسىندا جۇمىس ءجۇرىپ جاتىر.
اۋىل شارۋاشىلىعى ءمينيسترىنىڭ ورىنباسارى باعلان بەكباۋوۆ ءوز سوزىندە وسى ۇسىنىستاردى ىسكە اسىرۋ ءۇشىن اگروونەركاسىپ كەشەنىن دامىتۋدىڭ 2021-2030 جىلدارعا ارنالعان تۇجىرىمداماسىنا ءتيىستى وزگەرىستەر ەنگىزىلگەنىن ايتتى. ولار قايتا وڭدەۋ كاسىپورىندارىن ءوندىرىس قۋاتىندا بارىنشا قامتاماسىز ەتۋ, اۋىل شارۋاشىلىعى شيكىزاتىن قايتا وڭدەۋ ۇلەسىن ۇلعايتۋ, سونداي-اق ىشكى جانە سىرتقى نارىقتاردا وتاندىق ءونىمنىڭ باسەكەگە قابىلەتتىلىگىن ارتتىرۋ ءۇشىن مەملەكەتتىك قولداۋدىڭ جۇيەلى شارالارىن جۇزەگە اسىرۋعا باعىتتالعان.
