قاۋىمداستىق پرەزيدەنتى ازيزا شوجەەۆانىڭ ايتۋىنشا, بىلتىردان بەرى ءىت-Aiel جوباسى ىسكە اسىرىلىپ, قولونەرشىلەردى ەلەكتروندىق كوممەرتسياعا بەيىمدەۋ, ايەلدەردىڭ IT-ستارتاپ قوزعالىسىنا قولداۋ كورسەتۋ شارالارى قولعا الىندى. كاسىپتە تابىسقا جەتكەن جاننىڭ ءبىرى – دانا بليەۆا. كورپوراتيۆتىك سەكتورداعى ەڭبەك ءوتىلى 30 جىلدان اسادى. «Baiterek Venture Fund» اق-نىڭ تاۋەلسىز ديرەكتورى.
– العاشقى ينۆەستيتسيا جىلجىمايتىن م ۇلىكتەن باستالىپ ەدى, – دەپ ەسكە تۇسىرەدى ول وتكەن شاقتى, – لوندونداعى بالامالى قور بيرجاسىندا ورنالاستىرىلعان, ۇڭعىمالاردى قايتا ىسكە قوسۋدان كەيىن اكتسيالارى 13 ەسە وسكەن شاعىن مۇناي-گاز كومپانياسىنىڭ سەرىكتەسى بولدىم. بۇل وزىنشە ستارتاپ. قاراجاتتى جىلجىمايتىن م ۇلىككە جانە قور نارىعىنا ينۆەستيتسيالادىم.
دانا 2012 جىلى Facebook IPO-سىنا جانە باسقا دا ينۆەستيتسيالىق باستامالارعا قاتىسىپ, ءوزىنىڭ تەحنولوگيالىق ستارتابىن قۇرۋعا ارەكەتتەگەن. 2014 جىلى ينۆەستيتسيالىق جوبالارعا جەر قويناۋىن پايدالانۋشىلاردى تارتۋ ءۇشىن Techgarden-دە جۇمىس ىستەپ, جاڭا تەحنولوگيالار, نەيروندىق جەلىلەر, جاساندى ينتەللەكت, بلوكچەين, كريپتوۆاليۋتالار, بالامالى ەنەرگيا كوزى تۋرالى ءبىلىمىن جەتىلدىرگەن. كومپيۋتەرلىك عىلىمدار (ينفورماتيكا) بويىنشا PhD-گە وقۋعا ءتۇسىپ, كۇردەلى فيزيكالىق ۇدەرىستەردىڭ ماتەماتيكالىق مودەلدەۋىن زەرتتەگەن.
«سوڭعى جىلدارى «TechnoWomen» قاۋىمداستىعىندا قىز-كەلىنشەكتەرگە IT مەن STEM-دە وزدەرىنىڭ ستارتاپتارىن دامىتۋعا, ينۆەستيتسيالاردى تارتۋعا كومەكتەسىپ كەلەمىن. الداعى ۋاقىتتا ءبىلىمدى, ينتەللەكتۋالدى ۇلت رەتىندە بولاشاعى جارقىن ەل بولارىمىزعا سەنىمدىمىن», دەيدى دانا نازاربايقىزى.
«Acvee Finance» كومپانياسىنىڭ تەڭ قۇرىلتايشىسى ءارى باس ديرەكتورى, سونىمەن قاتار «TechnoWomen» قاۋىمداستىعى كەڭەسىنىڭ مۇشەسى اياۋلىم اياعانوۆا دا تابىستى كاسىپكەر. ول باسشىلىق ەتەتىن «AcveeFinance» كومپانياسى كراۋدفاكتورينگپەن اينالىسادى. كراۋدفاكتورينگ – B2B سەكتورىنداعى تاۋار جەتكىزۋشىلەردىڭ نەمەسە كاسساداعى قولما-قول اقشانىڭ جەتىسپەۋشىلىگىن قارجىلاندىراتىن ۇيىم.
«كومپانيامدى اشپاي تۇرىپ, شىعىس قازاقستان وبلىسىنىڭ قارجى باسقارماسىندا جۇمىس ىستەدىم. وندا مەملەكەتتىك بيۋدجەت قاراجاتىن وبلىس پەن وزگە ايماقتارعا ءبولۋ جۇمىستارىن جۇرگىزدىم. سول ۋاقىتتا مەملەكەتتىك سەكتور مەن ۇيىمداردى قالاي قارجىلاندىرۋ كەرەكتىگىنەن حاباردار بولعانمىن. اتالعان سالادا قىزمەت ەتپەس بۇرىن ءوز بيزنەسىممەن اينالىسىپ, قۇجاتتاما الۋ, PQS تاپسىرۋ, تەندەرگە قاتىسۋ بويىنشا كەڭەس بەردىم. BI Group, Kazzink, گەولوگيا جانە جەر قويناۋىن پايدالانۋ كوميتەتىندە قىزمەت اتقارىپ, 10 جىل بويى جيناقتالعان تاجىريبەمنىڭ ارقاسىندا ستارتاپ پەن جىلجىمايتىن م ۇلىككە قىزىعۋشىلىق تانىتا باستادىم. العا قويعان ماقساتىم دا ايقىن ەدى. بىراق وكىنىشكە قاراي, 20 ميلليون تەڭگەدەن استام شىعىنعا ۇشىراعان جاعدايعا تاپ بولىپ, سودان سوڭ AR\VR سالاسىندا جەكە ستارتاپ قۇرۋدى شەشتىم», دەيدى اياۋلىم.
بۇگىندە شاعىن جانە ورتا بيزنەس (شوب) سۋبەكتىلەرىنىڭ 30%-ى عانا كوپتەگەن ناقتى پروتسەدۋرادان وتكەننەن كەيىن عانا نەسيە الادى. بىراق شوب-قا اقشا ءدال ۋاقىتىندا قاجەت. وسىلايشا, اقشا بەرەتىن ادامدار شاعىن ورتا بيزنەستى قارجىلاندىرۋ ارقىلى ءپاسسيۆتى كىرىس الادى.
«استانا» حالىقارالىق قارجى ورتالىعىنا كومپانيانى تىركەدىم. ونداعى قاتىناس اعىلشىن قۇقىعىمەن رەتتەلىپ, جەكە تۇلعالاردىڭ زاڭدى تۇلعالارعا ينۆەستيتسيا سالۋىنا جاعداي جاساپ وتىر. ءبىزدىڭ زاڭنامادا مۇنداي باعىت قاراستىرىلماعان. تەك بانك اشقان جاعدايدا عانا قارجىلاندىرا الاسىڭ. ال بانك اشۋ ءۇشىن ۇلكەن جارعىلىق كاپيتال, قۇجاتتار مەن ليتسەنزيالار قاجەت. ءبىزدىڭ كاسىپ قاراپايىم جەكە تۇلعانىڭ ءوز اقشاسىن 50 000 تەڭگەدەن باستاپ سالۋىنا مۇمكىندىك بەرەدى, ال ءپاسسيۆتى كىرىسى – جىلىنا 25-30 پايىز ارالىعىندا. دەپوزيتپەن سالىستىرعاندا بۇل 8-13 پايىزعا ارتىق. وسىلايشا, سەرىكتەسىم ەكەۋمىز كراۋدفاكتورينگ قۇرۋدى شەشتىك. فاكتورينگ – جەتكىزۋشىلەردىڭ تاۋارى مەن قىزمەتىن قارجىلاندىرۋ. نارىقتا ءبىرازدان بەرى بار, بىراق بانكتەردە وتە سيرەك قولدانىلادى. كوپتەگەن كاسىپورىن بۇل قىزمەت تۋرالى بىلمەيدى. ويتكەنى بانكتەرگە جەكە ءونىمدى قارجىلاندىرۋدان گورى اينالىم قاراجاتىنا نەسيە بەرگەن تيىمدىرەك. ءبىزدىڭ كومپانيا تاۋارلاردى قارجىلاندىرۋدى قامتاماسىز ەتەدى. بۇل رەتتە ءبىز بيزنەسكە تىكەلەي قاراجات بەرمەيمىز, بىراق تاۋاردى تىكەلەي ساتۋشىعا تولەيمىز, وسىلايشا, تاۋەكەلدەردى مينيمۋمعا دەيىن ازايتامىز. بارلىق سكورينگ پروتسەدۋرالارىنان وتكەننەن كەيىن جارتى جىلعا بيزنەسكە نەسيە ءليميتىن اشامىز. بۇل مودەلدى تولىعىمەن ءوزىمىز ازىرلەدىك جانە ونى ءساتتى جۇزەگە اسىرىپ جاتىرمىز. جەتكىزۋشىنىڭ وزىنەن, ساتۋشىدان باستاپ سوڭعى ساتىپ الۋشىعا دەيىن مامىلەنىڭ بارلىق قاتىسۋشىلارىن تەكسەرەمىز. قارجىنى ماقساتتى پايدالانۋدى, جوعارى اينالىمدى, سول ارقىلى تاۋەكەلدەردى ازايتۋدى, جوعارى تابىستى قامتاماسىز ەتۋدى ۇسىنامىز», دەيدى.
اياۋلىم «TechnoWomen» قاۋىمداستىعىن تەحنولوگيالىق يندۋستريانى دامىتۋ بويىنشا ستراتەگيالىق ماڭىزدى ۇيىم دەيدى.
«TechnoWoman-عا ينۆەستيتسيا سالۋ – الەۋمەتتىك جاۋاپكەرشىلىك قانا ەمەس, سونىمەن قاتار ينۆەستورلار ءۇشىن جوعارى بىلىكتى جانە تالانتتى كاسىپكەرلىككە قول جەتكىزۋ مۇمكىندىگى. مۇنداي باستامالاردى قولداۋ تابىستى ءارى يننوۆاتسيالىق تەحنولوگيا كومپانيالارىن قۇرۋعا جاعداي جاسايدى», دەيدى كاسىپكەر.
