فوتو: senate.parlam.kz
سەناتور 2018 جىلدان 2022 جىلعا دەيىن حالىقارالىق دەرەكتەر بازاسىنىڭ قىزمەتىن تولەۋگە مەملەكەت بيۋدجەتىنەن 5,2 ملرد تەڭگە جۇمسالعانىن اتاپ ءوتتى. بىراق Scopus دەرەكتەر بازاسى بويىنشا قازاقستان عالىمدارى ماقالاسىنىڭ جاھاندىق اۋقىمداعى ۇلەسى از دەڭگەيدە قالىپ كەلەدى.
«عىلىمي ماقالالاردى جاريالاۋعا بايلانىستى پروبلەمالىق نەگىزگى ماسەلەگە نازارلارىڭىزدى اۋدارعىم كەلەدى. عىلىمي جۇمىستاردى جاريالاۋداعى قيىندىق كۇشتى باسەكەلەستىك پەن رەتسەنزيانىڭ قاتاڭ تالابىنا, سونداي-اق قارجى كەدەرگىسىنە بايلانىستى. حالىقارالىق بازالار بارلىق عىلىمي سالانى بىردەي قامتي المايدى, بۇل كەيبىر مامانداندىقتاعى زەرتتەۋشىلەردى قولايسىز جاعدايعا دۋشار ەتەدى. ءبىزدىڭ عالىمداردىڭ ءوسىپ-وركەندەۋى جالعىز باعالاۋعا بايلانىستى بولۋى مۇمكىن ەمەس. ول حالىقارالىق بازادا ماماندىعى تانىمال ەمەس نەمەسە كوپشىلىكتى قىزىقتىرمايتىن ادامدارعا ادىلەتسىز بولىپ وتىر. بۇل اكادەميالىق ادىلەتتىلىك ماسەلەسى», دەدى قايرات تاستەكەەۆ.
قايرات تاستەكەەۆ وسىعان بايلانىستى حالىقارالىق بازالارداعى ماقالاسىمەن شەكتەلمەي, ديسسەرتاتسيالىق جۇمىستاردىڭ ساپاسىن باعالاۋ ولشەمشارتتارىن قايتا قاراۋدى ۇسىندى. دەپۋتات حالىقارالىق دەرەكتەر بازاسىنا ەنگىزۋ ءۇشىن ولاردىڭ دەڭگەيىن ارتتىرۋعا ىقپال ەتەتىن ساپالى ۇلتتىق عىلىمي جۋرنالداردى دامىتۋ مەن قولداۋدىڭ ماڭىزدىلىعىن اتاپ ءوتتى. سەناتور سونىمەن قاتار جاس عالىمداردى ءوز جۇمىستارىن حالىقارالىق جۋرنالداردا جاريالاۋعا قولداۋ كورسەتۋ ءۇشىن ارنايى گرانتتاردىڭ بولۋىن ماڭىزدى دەپ سانايدى.
«حالىقارالىق عىلىمي بازالارعا قول جەتكىزۋ جانە اكادەميالىق جازۋ بويىنشا ترەنينگتەردى قامتاماسىز ەتۋمەن قوسا زەرتتەۋلەردىڭ ساپاسىن ارتتىرۋ جونىندە كەشەندى باعدارلامالار ازىرلەۋ كەرەك», دەدى سەنات دەپۋتاتى.
