فوتو: ۆيدەوسكرين
قارالى وقيعا 2023 جىلدىڭ تامىزىندا بولعان. ەرلى-زايىپتىلار اراسىندا TikTok الەۋمەتتىك جەلىسىنە بايلانىستى جانجال تۋىنداعان. كۇيەۋى ايەلىنىڭ الەۋمەتتىك جەلىگە ۆيدەو جۇكتەگەنىنە نارازىلىق ءبىلدىرىپ, «پىشاقتى وزىڭە سۇق» دەپ بۇيىرعان. اراداعى ۇرىس توبەلەسكە ۇلاسىپ, كىسى ولىمىمەن اياقتالدى. بۇل وقيعاعا ەرلى-زايىپتىلاردىڭ بالالارى كۋا بولعان.
قىلمىسىن جاسىرۋعا ارەكەتتەنگەن ايەل مارقۇمنىڭ دەنەسىن بولشەكتەپ تاستاعان ەكەن. ءمايىتتى بوشكەگە سالعان قىلمىسكەر كورشىسىنە ءوتىنىش جاساپ, كەلەس وزەنىنە بارعان. ايەلدىڭ ءتۇن ىشىندەگى بۇل ارەكەتىنەن سەسكەنگەن كورشى ءۇشىنشى كۇنى بوشكەنى اشىپ كورگەن.
وسىلايشا, قۇندىز مولدابەكوۆانىڭ قىلمىسى اشكەرە بولىپ, ەلدىڭ ۇرەيىن تۋعىزدى. بۇعان دەيىن ايەل ءمايىتتىڭ بولشەكتەنگەن ءۇش بولىگىن وزەنگە اعىزىپ ۇلگەرگەن ەدى. وعان قوسا جولداسىنىڭ كولىگىن 2 ميلليون 300 مىڭعا ساتىپ جىبەرگەن.
قىلمىسكەرگە 99-باپتىڭ 2-بولىگى (ادام ءولتىرۋ) جانە 190 باپتىڭ 1-بولىگى (الاياقتىق) بويىنشا ايىپ تاعىلىپ, سوت ۇكىمىمەن 15 جىلعا باس بوستاندىعىنان ايىرىلدى.
سوتتالۋشىنىڭ اناسى قايتىس بولعان ەر ادام بۇعان دەيىن دە ايەلىنە قول كوتەرىپ, قورلىق كورسەتكەنىن العا تارتتى.
«قىزىمنىڭ دا نەمەرەلەرىمنىڭ دە كورمەگەنى جوق. بالالارى: «مامامدى شەشىندىرىپ, جالاڭاش ايازعا شىعاراتىن» دەپ ءجيى شاعىمداناتىن. ءوزى تەمەكى شەگىپ, شوعىن قىزىمنىڭ كەۋدەسىنە باسقان, تەمىرمەن دە ۇرىپ-سوققان. قىزىم شىدادى, بىراق ءبارى جينالا-جينالا, اقىرى, قىلمىس جاسالدى», دەدى سوتتالۋشىنىڭ اناسى ءتىللايىم مولدابەكوۆا.
