وسىدان ءۇش جىل بۇرىن سەنات جانىنداعى جاس ساراپشىلار كلۋبىنىڭ باستاماسىمەن جانە پالاتا توراعاسى ماۋلەن اشىمباەۆتىڭ قولداۋىمەن قولعا الىنعان «تالداۋ مەكتەبى» قوعامدىق جوباسى وتاندىق جانە حالىقارالىق ساراپشىلار تاراپىنان جوعارى باعا الدى. ءۇشىنشى كەزەڭنىڭ قورىتىندى ءدارىسى مەن ترەنينگكە بۇۇ-نىڭ قازاقستانداعى تۇراقتى ۇيلەستىرۋشىسى ميكاەلا فريبەرگ-ستوري ارنايى مەيمان رەتىندە قاتىستى.
وسى جولى ەلىمىزدىڭ وڭىرلەرىنەن كەلگەن جاس ساراپشىلار بەلسەندى قاتىستى. بۇل ءۇشىنشى كەزەڭدەگى ەرەكشەلىكتەردىڭ ءبىرى بولدى. ولار ەكى اي بويى اناليتيكالىق ماتەريال دايىنداۋ بويىنشا ءبىلىم الىپ, وسى باعىتتاعى داعدىلارىن جەتىلدىردى. وسىلايشا, اتالعان الاڭ وتاندىق جانە شەتەلدىك بىلىكتى ساراپشىلارمەن بىرلەسىپ جۇمىس ىستەۋدىڭ جاڭا مۇمكىندىكتەرىنە جول اشتى.
الدىڭعى جىلدارداعىداي بۇل كەزەڭدە دە وقىتۋ كۋرسى تەوريالىق جانە تاجىريبەلىك باعىتتا جۇرگىزىلدى. بەلگىلى وتاندىق جانە شەتەلدىك ساراپشىلار ءدارىس وقىدى. ولار ءتۇرلى اناليتيكالىق ادىستەر مەن تاسىلدەر تۋرالى ايتىپ, شەبەرلىك ساباقتارى مەن ترەنينگتەر وتكىزدى. سونداي-اق مەكتەپ قاتىسۋشىلارى مينيسترلەرمەن جانە ورتالىق مەملەكەتتىك ورگانداردىڭ باسشىلارىمەن ىسكەرلىك لانچ فورماتىندا كەزدەستى.
سەنات توراعاسى كوماندالىق جوبالاردى قورىتىندىلاي كەلە باياندامالاردىڭ جوعارى دەڭگەيدە ازىرلەنگەنىنە, ولاردىڭ وزەكتىلىگىنە, قورىتىندىلار مەن ۇسىنىمداردىڭ جۇيەلىلىگى مەن مازمۇنىنا ەرەكشە نازار اۋداردى. ماۋلەن اشىمباەۆ اتاپ وتكەندەي, بۇل رەتتە تالداۋ مەكتەبىنىڭ كوماندالارىمەن جۇمىستى ۇتىمدى ۇيلەستىرە بىلگەن تالىمگەرلەر ماڭىزدى ءرول اتقاردى.
«بيىل جوبانىڭ بىرقاتار ەرەكشەلىگى بولدى. ولاردىڭ ءبىرى قاتىسۋشىلاردىڭ جوعارى دەڭگەيدەگى بەلسەندىلىگى مەن ۇيلەسىمدى كوماندالىق جۇمىس ەكەنى انىق. بۇل – ءار قاتىسۋشى مەن مەنتوردىڭ قاجىرلى ەڭبەگىنىڭ ناتيجەسى. تالىمگەرلەر وزدەرىنە ارتىلعان جاۋاپكەرشىلىكتى سەزىنىپ, اپتاسىنا كەمىندە 15 ساعات ۋاقىت ءبولدى. ولار وزدەرىنىڭ بىلىمدەرىمەن, تاجىريبەلەرىمەن ءبولىستى, كەزدەسۋلەر ۇيىمداستىرۋعا قولداۋ كورسەتتى جانە باياندامالار دايىنداۋ ءۇشىن باعدار بەردى. تالىمگەرلىك دەگەنىمىز – وقىتۋ جانە كاسىبي داعدىلاردى ارتتىرۋ باعىتىنداعى ماڭىزدى ينستيتۋت. سىزدەرمەن 24 تاجىريبەلى دارىسكەر جانە 13 تالىمگەر جۇمىس ىستەدى. ولاردىڭ كاسىبي بىلىكتىلىكتەرىنىڭ قانداي دەڭگەيدە ەكەنىنە وزدەرىڭىز دە كوز جەتكىزدىڭىزدەر», دەگەن ماۋلەن اشىمباەۆ جوباعا قاتىسقان مەنتورلارعا العىس ءبىلدىردى.
كۋرس 7 نەگىزگى ءمودۋلدى قامتىدى. كوماندالاردىڭ قورىتىندى جۇمىستارى كەدەيلىكتى جويۋ, دەنساۋلىق ساقتاۋ جانە ءال-اۋقاتتى ارتتىرۋ, ساپالى ءبىلىم بەرۋ, تازا سۋ جانە سانيتاريا, لايىقتى جۇمىس, سونداي-اق ەكونوميكالىق ءوسۋ سياقتى تاقىرىپتاردى قامتيتىن ورنىقتى دامۋدىڭ بەس ماقساتىنا ارنالدى. ماۋلەن اشىمباەۆ بۇل ماقساتتار قازاقستاندا ەرىكتى شولۋ اياسىندا جۇرگىزىلگەن ساۋالناما ناتيجەسىندە باسىم مىندەتتەر رەتىندە انىقتالعانىن جانە ول بۇۇ-دا تانىستىرىلعانىن اتاپ ءوتتى.
سونىمەن قاتار بيىل قاتىسۋشىلاردىڭ, تالىمگەرلەردىڭ جانە ساراپشى-دارىسكەرلەردىڭ ءوزارا ءىس-قيمىلىنا قىزىعۋشىلىقتىڭ ارتۋىنا بايلانىستى ساباقتاردىڭ ۇزاقتىعى ەكى ەسەگە ۇلعايتىلدى.
«ەكى اي وتە قارقىندى ءوتتى. الداعى ۋاقىتتا سەنات جانىنداعى جاس ساراپشىلار كلۋبىمەن بىرلەسە وتىرىپ, سىزدەردىڭ باياندامالارىڭىزدىڭ جيناعىن شىعارامىز. باسقا دا بىرقاتار جوبالارىمىز بار. وسى رەتتە بارلىق باياندامانىڭ مازمۇنى جوعارى دەڭگەيدە ەكەنىن اتاپ وتكىم كەلەدى. ولار ءبىر جيناقتا جاريالانىپ, جۇمىس ءۇشىن سەنات دەپۋتاتتارىنا جانە سالالىق مەملەكەتتىك ورگاندارعا بەرىلەدى», دەگەن ماۋلەن اشىمباەۆ قاتىسۋشىلاردى كۋرستىڭ ءساتتى اياقتالۋىمەن قۇتتىقتاپ, پارلامەنتتىڭ زاڭ شىعارۋ قىزمەتى اياسىندا ءوزارا ءىس-قيمىل جالعاسا بەرەتىنىن ايتتى.
ءۇشىنشى كەزەڭنىڭ سوڭعى كۇنىندە نازارباەۆ ۋنيۆەرسيتەتىنىڭ اقىلدى جۇيەلەر جانە جاساندى ينتەللەكت ينستيتۋتىنىڭ ديرەكتورى حۋسەين اتاكال ۆارول مەن جاساندى ينتەللەكت مەكتەبىنىڭ نەگىزىن قالاۋشىلاردىڭ ءبىرى نيك ماكفلاي ءدارىس وقىدى.
جوبا بارىسىندا وقىلعان دارىستەردىڭ بەينەنۇسقاسى تالداۋ مەكتەبىنىڭ رەسمي YouTube ارناسىنا جاريالانادى.
