اتالعان ءىس-شاراعا الماتى قالاسىنداعى رەسپۋبليكالىق دوستىق ۇيىنە قاراستى «ۆاتانداش» قىرىم تاتارلارىنىڭ مادەني ورتالىعى, قازاقستان كۇردتەرىنىڭ «باربانگ» قاۋىمداستىعى, «رەنەسسانس» الماتى مادەني-ەتنيكالىق قوعامى, «ۆەنز» پولياك مادەنيەتىنىڭ ورتالىعى», الماتى وبلىسىنىڭ «ۆايناح» شەشەن-ينگۋش بىرلەستىگى, «ۆوشال» ينگۋش ەتنو-مادەني ورتالىعى» ت.ب ەتنو-مادەني بىرلەستىكتەردىڭ وكىلدەرى قاتىستى.
ءىس-شارا اياسىندا ۇيىمداستىرىلعان حالىقتىق-قولدانبالى ونەر كورمەسى كوپشىلىكتى ءتانتى ەتتى. جينالعاندار مۋزەي قابىرعاسىنداعى تاريحي جادىگەرلەردى تاماشالاپ, ءار ەتنوس وزدەرىنىڭ حالىقتىق مادەني داستۇرلەرىنەن سىر شەرتتى.
العىس ايتۋ كۇنى – ەڭ الدىمەن ەلىمىزدە تىنىشتىق, ءوزارا سەنىمدىلىك پەن قازاق ەلىنە دەگەن قۇرمەتتىڭ ورنىعۋىنا نەگىز بولعان پرەزيدەنتتىڭ بەيبىتشىلىك پەن كەلىسىم ساياساتىنىڭ سالتاناتتى سيمۆولى ەكەنىن العا تارتقان قحا-مۇشەلەرى يگى شاراعا ۇيىتقى بولعان مۋزەي ۇجىمىنا ريزاشىلىعىن ءبىلدىردى.
ء«بىزدىڭ مۋزەيدىڭ قورىندا, تاريحتاعى كۇردەلى كەزەڭدەردە قازاق جەرىنە كەلىپ پانا تاپقان سان تاراۋ تاعدىرلاردىڭ ءومىر تىنىسىنان حابار بەرەتىن ءبىرشاما جادىگەرلەر ساقتالعان. ولاردى جيناقتاۋعا سول تۇستاعى مۋزەي باسشىلارى كوپ ەڭبەك سىڭىرگەن. اتالعان جادىگەرلەردى بيىل ارنايى جاساقتالاتىن ەكسپوزيتسيالىق زالعا ورنالاستىرۋدى كوزدەپ وتىرمىز. بۇگىنگى شارانىڭ ماقساتى – قازاق جەرىندەگى كوپتەگەن ەتنوستاردىڭ ىنتىماعىن ودان ءارى نىعايتىپ, تاتۋلىقتى تۋ ەتكەن وتانداستارىمىزدىڭ تاريحتاعى بەينەسىنە ءبىر ءسات ءۇڭىلۋ ءھام وتكەنگە سالاۋات ايتۋ. ءارى بۇگىنگى باسقوسۋ مادەنيەت جانە اقپارات مينيسترلىگى باستاپ بەرگەن يگى چەللەنجدى قولداۋ باعىتىندا ۇيىمداستىرىلىپ وتىر.
حالقىمىز قيىن-قىستاۋ زاماندا وزگەلەردىڭ باسىنا تۇسكەن اۋىرتپالىقتى قايىسپاي بىرگە كوتەرە ءبىلدى, بۇل بۇگىنگى تاڭدا ەلىمىزدەگى ءتۇرلى ۇلت وكىلدەرىنىڭ اراسىنداعى ادامگەرشىلىك قارىم-قاتىناستىڭ ونەگەلى ولشەمىنە اينالدى», دەيدى قر مەملەكەتتىك ورتالىق مۋزەيىنىڭ ديرەكتورى راشيدا حاريپوۆا.
مادەني-تانىمدىق ءىس-شارادا ءتۇرلى ەتنوستاردىڭ ۇلتتىق كيىمدەرى كوپشىلىك نازارىنا ۇسىنىلىپ, جينالعاندار كەش تاقىرىبىن ايشىقتاعان اسەرلى بەينەروليكتى بىرگە تاماشالادى.
