سالادا اتقارىلىپ جاتقان جۇمىستار تۋرالى ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى ولجاس ورداباەۆ باياندادى. بۇگىندە بارلىق مەملەكەتتىك ورگاندار جانىنان 44 سالالىق كەڭەس قۇرىلعان. ولاردىڭ الدىندا نارىققا قاجەتتى ماماندىقتار ءتىزىمىن قۇرۋ مىندەتى تۇر.
قازىر ماماندىقتارعا بايلانىستى كاسىبي ستاندارتتاردى بەكىتۋ بويىنشا جۇمىس قىزۋ ءجۇرىپ جاتىر. قولدانىستاعى 219 ستاندارت وزەكتەندىرىلىپ, جاڭادان 135-ءى دايىندالدى. تاعى 130-ى قارالىپ جاتىر. ەڭبەك جانە حالىقتى الەۋمەتتىك قورعاۋ ۆيتسە-ءمينيسترى بۇل ءىستى جەدەلدەتۋ قاجەتتىگىنە نازار اۋداردى. اتالعان كاسىبي ستاندارتتار بىلىكتىلىك پەن ەڭبەكاقى تاعايىنداۋ جۇيەسىن رەتكە كەلتىرۋى كەرەك.
قازىرگى ۋاقىتتا بىلىكتىلىك انىقتاماسى مەن كاسىبي ستاندارتتار قاتار قولدانىلىپ كەلەدى. 2030 جىلدان باستاپ ەڭبەك نارىعىندا تەك كاسىبي ستاندارتتار پايدالانىلماق. بولاشاق مامانداردى دايىندايتىن ءبىلىم بەرۋ ۇيىمدارى وقۋ باعدارلامالارىن كاسىبي ستاندارتتارعا سايكەستەندىرۋى قاجەت.
بۇل ءۇردىستى تسيفرلاندىرۋ «Career Enbek» پلاتفورماسى ارقىلى جۇزەگە اسىرىلماق. ال تۇلەكتەردىڭ مەڭگەرگەن ءبىلىمىن تاۋەلسىز سەرتيفيكاتتاۋ ورتالىقتارى باعالايدى. وسىلايشا, ساپالى كادر دايىنداۋ ءىسىن جەتىلدىرۋ قولعا الىنادى. ەڭبەك جانە حالىقتى الەۋمەتتىك قورعاۋ مينيسترلىگى جانىنان قۇرىلعان بىلىكتىلىك جونىندەگى ۇلتتىق ورگان اتالعان جۇمىسقا تولىق جەتەكشىلىك ەتەدى جانە سۇيەمەلدەيدى.
وتىرىس بارىسىندا كولىك, تسيفرلىق دامۋ, يننوۆاتسيا جانە اەروعارىش ونەركاسىبى, قارجى, سۋ رەسۋرستارى جانە يرريگاتسيا مينيسترلىكتەرىنىڭ كاسىبي ستاندارتتار قۇرۋ جانە سالاعا قاجەت مامانداردى دايىنداۋ ماسەلەلەرى تالقىلاندى.
ۆيتسە-پرەمەر ۇلتتىق بىلىكتىلىكتى كوتەرۋ جولىندا ستاندارتتاردىڭ سانىنا ەمەس, ساپاسىنا باسا ءمان بەرۋ كەرەكتىگىن ەرەكشە اتاپ ءوتتى.
«بۇل باعىتتا ناتيجەلى جۇمىس ىستەۋ ءۇشىن ءتيىستى زاڭ قابىلداندى. بارلىعى ونى ورىنداۋعا ءتيىس. ەكونوميكا, ەڭبەك نارىعى بىزدەن ساپالى, بىلىكتى مامان دايارلاۋدى تالاپ ەتىپ وتىر. ءبىز وعان قانشالىقتى دايىنبىز؟ سوندىقتان رەسمي شارالاردان ارىلىپ, ناقتى ىسكە كىرىسۋ قاجەت. ستاندارتتاردى ازىرلەۋ – بۇل جۇمىستىڭ تەك باسى عانا. سوعان ساي وقۋ باعدارلاماسىن وزەكتەندىرۋ, ەڭبەك نارىعى سۇرانىسىن ۇدايى قاداعالاپ, ونى قاناعاتتاندىرۋ ءۇشىن جەدەل شارا قابىلداۋ قاجەت», دەپ اتاپ ءوتتى تامارا دۇيسەنوۆا.
الداعى ۋاقىتتا كاسىبي بىلىكتىلىك جونىندەگى ۇلتتىق كەڭەس اياسىندا ءار مينيسترلىكتىڭ اتقارعان شارالارى جەكەلەي قاراستىرىلماق.
