فوتو: اۆتوردان
يبراگيم حاكيموۆ - 5512 اسكەري ءبولىمىنىڭ قاتارداعى جاۋىنگەرى
وسىدان جيىرما ەكى جىل بۇرىن مەنىڭ وتباسىم قازاقستانعا شەشەنستانداعى ازاماتتىق سوعىستان باس ساۋعالاپ كەلگەن ەدى. ارينە, تۋعان ەلىن تاستاپ كەتۋ مەنىڭ اتا-انام ء ۇشىن وڭايعا سوقپادى. ىشكى قاقتىعىستاردان كۇيىسى كەتىپ, بەرەكەسى قاشقان ولاردىڭ تىعىرىقتان شىعار باسقا جولى بولماسا كەرەك-ءتى. نەگە ەكەنىن بىلمەدىم, ەل شىعىسىنداعى سەمەي قالاسىنا قونىس اۋدارىپتى. تارعىل تاعدىر تاۋقىمەتى تار جول, تايعاق كەشتىرگەنىمەن تامىرىن تەرەڭگە جايعان تاڭسىق ولكەدە تىنىستارى تارىلماپتى. شارۋادا شاشاۋ شىعارمايتىن اكەشىم قيۋىن قيىستىرىپ ءبىر ءىستى دوڭگەلەتىپ اكەتسە كەرەك. ايتەۋىر, مەن كويلەگى كوك, قارىنى توق وتباسىدا ومىرگە كەلدىم. سەمەي جۇرتقا بىردەن باۋىر باسىپ كەتتىك. بۇل كەۋدەمىزدەن يتەرمەي, قۇشاق اشا قارسى العان جەرگىلىكتى جۇرتتىڭ دالاداي كەڭ پەيىلىنەن بولسا كەرەك. سوندىقتان قيىن-قىستاۋ شاقتا قولداۋ تانىتقان سەمەيلىكتەرگە ايتار مەنىڭ العىسىم شەكسىز. ءوز بالاسىنان كەم كورمەيتىن قالا تۇرعىندارىنا ريزاشىلىقتان باسقا الىپ-قوسارىم جوق. مەن قورشاعان قاراشانىڭ قايىرىمدىلىعىنان بولار, مەنىڭ دە وتانعا دەگەن ماحابباتىم سونداي ىستىق. سوندىقتان بولار, بۇعانام بەكىپ, قابىرعام قاتايعان تۇستا, بەلىمدى بەكەم بۋىپ ۇلتتىق ۇلان قاتارىندا وتان الدىنداعى بورىشىمدى وتەۋدى ءجون سانادىم. دارحاندىعى دالاسىنان دارىعان قازاق جۇرتىمەن العىس كۇنىن اتاپ ءوتىپ, بەيبىت ەلدىڭ اسپانىندا مامىراجاي كۇن كەشەيىك.
بەكزات شەرماتوۆ - 5511 اسكەري ءبولىمىنىڭ قاتارداعى جاۋىنگەرى
قازاقتىڭ ماڭدايىنا بىتكەن جارىق جۇلدىزى, الىپ ويدىڭ يەسى, حاكىم اباي قۇنانباي ۇلى «قارنى توقتىق, كويلەگى كوكتىك, جۇمىسى جوقتىق ازدىرار ادام بالاسىن دەيدى» ءيا, جەگەنى الدىندا, جەمەگەنى ارتىندا قالعان جاننىڭ توعىشارلانىپ, ءومىر سۇرۋگە دەگەن قۇلشىنىسىنان ايىرىلارى حاق. دەگەنمەن, كويلەگىڭ كوگەرمەي, جۇمىسسىز جۇرسەڭ – قۋ تۇرمىستىڭ كۇيبەنىنە تۇسكەنىڭ بولىپ ەسەپتەلەدى. مىنە, مەنىڭ اكە-شەشەم دە قىرعىزستاندا بالا-شاعاسىن اسىراۋعا لايىقتى, ماردىمدى ناپاقا الاتىن جۇمىس تاپپاي سەندەلدى. ول جاقتاعى ءبىزدىڭ اۋىل تۇرعىندارى تابىستى بولامىن دەپ ماسكەۋگە سابىلسا, ال ءبىز قازاقستانداعى پاۆلودار قالاسىنا تابان تىرەدىك. انامدى تاڭقالدىرعان بۇل شەشىمدى اكەم قابىلداپتى. العاشىندا پاتەر جالداپ كۇنەلتتىك. سودان كەيىن ساۋدامەن اينالىستىق. «ەڭبەك ەتسەڭ ەمەرسىڭ» دەمەكشى, ەشكىمدى تانىمايتىن ولكەدەگى شەلەكتەپ توگىلگەن تەر سوڭىندا ءوز جەمىسىن بەردى. بۇگىندە اكە-شەشەم پاۆلودار قالاسىنداعى بىرنەشە كاسىپتىڭ يەسى اتاندى. ەندى استانا قالاسىنان دا بيزنەس كوزدەرىن اشىپ, ەلورداعا ويىسۋدى جوسپارلاپ ءجۇر. مەنىڭ ويىمشا قازاقستان مۇمكىندىكتەر مەكەنى. ەگەردە ءوزىڭ تالپىنساڭ, مەملەكەت ءاربىر تالپىنىسىڭدى باعالايدى. مەنىڭ ويىمشا, ەجەلدەن ءبىر-بىرىنە ەتەنە جاقىن قازاق پەن قىرعىز دوستىعى جىل ساناپ ارتىپ كەلەدى. سوندىقتان بىرلىگىمىز جاراسقان جەردە ماعىنالى عۇمىر كەشۋدى اللا ءناسىپ ەتكەندەي. وسى ورايدا, وتباسىمدى اياعىنان نىق تۇرعىزىپ, اكەمدى اتپال ازاماتقا, انامدى ىسكەر ايەلگە اينالدىرعان قازاقستانعا ايتار العىسىم زور. بۇيىعى كۇيدە بوتەنسىپ كەلگەن قايمانانى, قاپسىرا قۇشاعىڭا العانىڭ ءۇشىن قايىرىمدىلىعى مەن كەڭپەيىلدىگى, دانالىعى مەن قوناقجايلىعىڭ ءۇشىن قازاق حالقىنا تاعى دا ءبىر مارتە العىس ايتامىن. مەن اۋلەتىمنىڭ الەۋەتىن ارتتىرىپ, ءوسىپ-ونگەن ەلدىڭ شەكاراسىن جاۋدان قورعاپ, تىنىشتىعىن كۇزەتۋگە دايىنمىن.
يلدار گاينەتدينوۆ - 6699 اسكەري ءبولىمىنىڭ قاتارداعى جاۋىنگەرى
مەن باشقۇرت ۇلتى بولسام دا, قازاقستاندا ءوزىمدى سۋدا جۇزگەن بالىقتاي سەزىنەمىن. ويتكەنى, مەن تۇرماق, مەنىڭ اكەم دە كىندىك قانىن ەكىباستۇز قالاسىندا تامىزعان. كەشەگى تاريحقا ۇڭىلسەك, تە قازاق ەلىمەن باۋىرلاستىق قارىم-قاتىناس عاسىرلار بويى جالعاسىن تاۋىپ كەلەدى. مىسالى ۋفاداعى عاليا مەدرەسەسى تالاي قازاق جاستارىنىڭ ساۋاتىن اشقانى امبەگە ايان. بۇل قالا الاشورداعا باس قوسار قۇتتى ورىن بولدى. ء اليحان بوكەيحانوۆ ورىنبوردى ورتاق استانا قىلىپ, باشقۇرت-قازاق ءبىرتۇتاس اۆتونومياسىن قۇرماقشى بولعانىن دا بىرەۋ بىلسە بىرەۋ بىلمەس. جالپى, تۇركىتىلدەس حالىق بولعان سوڭ دا تىلەگىمىز ءبىر. سوندىقتان تىلەكتەس ەلدىڭ تۋىن تىك ۇستاۋ مەن ءۇشىن ۇلكەن ابىروي. بۇگىندە ۇلتتىق ۇلاننىڭ «شىعىس» وڭىرلىك قولباسشىلعىنا قاراستى 6699 اسكەري بولىمىندە ەل الدىنداعى ازاماتتىق بورىشىمدى وتكەرۋدەمىن. ءبىزدىڭ جاۋىنگەرلىك مىندەتتىڭ باسىم بولىگى وسكەمەن قالاسىنداعى تۇزەۋ مەكەمەلەرىن كۇزەتۋگە نەگىزدەلەدى. قارۋلاستار اراسىندا دارالانىپ, كەز كەلگەن اسكەري سىناقتان سۇرىنبەي, قويىلعان تاپسىرمالاردى دەر كەزىندە ورىنداۋعا ءاردايىم بارىمدى سالامىن. ويتكەنى, مەن وسىلايشا, تۋعان ەلگە دەگەن ءوز العىسىمدى بىلدىرگىم كەلەدى.
سەرجانت
رۇستەم مۇحامەت-راقىم
وسكەمەن قالاسى
