فوتو: ult.kz
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارىن جانە بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا ءماجىلىس دەپۋتاتتارى باستاماشىلىق جاسادى.
«زاڭ جوباسى بالالاردىڭ قاۋىپسىزدىگىن قامتاماسىز ەتۋ, ايەلدەر مەن بالالارعا قاتىستى قىلمىستاردىڭ الدىن الۋ جانە جولىن كەسۋ جونىندەگى مەملەكەتتىك ساياساتتىڭ قۇقىقتىق, ەكونوميكالىق, الەۋمەتتىك جانە ۇيىمداستىرۋشىلىق نەگىزدەرىن جەتىلدىرۋگە باعىتتالعان. اتاپ ايتقاندا, زاڭ جوباسىندا دەنساۋلىققا قاساقانا جەڭىل زيان كەلتىرۋگە, ۇرىپ-سوعۋعا, 16 جاسقا تولماعانداردى جىنىستىق قۋدالاۋعا, ءوز-وزىنە قول جۇمساۋدى ناسيحاتتاۋعا جانە باسقالارعا باعىتتالعان ارەكەتتەردى قىلمىستىق جاۋاپكەرشىلىككە تارتۋ قاراستىرىلعان», دەدى دەپۋتات جۇلدىز سۇلەيمەنوۆا.
ونىڭ ايتۋىنشا, زاڭ جوباسىمەن جۇمىس بارىسىندا دەپۋتاتتار مىنالارعا باعىتتالعان بىرقاتار تۇزەتۋلەر ەنگىزدى:
- وتباسىن قولداۋ ورتالىقتارىنىڭ تۇرمىستىق زورلىق-زومبىلىق بەلگىلەرى بار ادامدارعا قولداۋ كورسەتۋ, ولارعا ۋاقىتشا تۇرۋ مۇمكىندىگىن بەرۋ بولىگىندە قۇزىرەتتەرىن ناقتىلاۋ;
- جەڭىل زيان كەلتىرگەنى ءۇشىن جانە قىلمىستىق قۇقىق بۇزۋشىلىق جاساعان ادامداردى ۇستاۋ ءتارتىبىن رەتتەۋ;
- قوعامدىق كولىكتەن ماجبۇرلەپ تۇسىرۋگە تىيىم سالىناتىن بالالاردىڭ (16 جاسقا دەيىنگى تۇلعالاردىڭ) جاسىن انىقتاۋ;
- 16 جاسقا تولماعان ادامداردى جىنىستىق قۋدالاۋ ءۇشىن قىلمىستىق جاۋاپكەرشىلىكتى كۇشەيتۋ;
- تاتۋلاسۋىنا بايلانىستى سوتتالعان نەمەسە قىلمىستىق جاۋاپتىلىقتان بوساتىلعان ادامدارعا سوت بەلگىلەگەن ارنايى تالاپتاردى قولدانۋ شارالارىن ءتۇسىندىرۋ.
«ۇكىمەتتىڭ ۇسىنىسىمەن وبلىستاعى, رەسپۋبليكالىق ماڭىزى بار قالاداعى جانە استاناداعى بالا قۇقىقتارى جونىندەگى ۋاكىلدەردىڭ قىزمەتىن رەتتەۋگە قاتىستى تۇزەتۋلەر ەنگىزىلدى. سونىمەن قاتار دەپۋتاتتار نورمالاردى قۇقىقتىق تەحنيكاعا سايكەستەندىرۋگە باعىتتالعان رەداكتسيالىق تۇزەتۋلەر مەن تولىقتىرۋلار ەنگىزدى, بۇل زاڭ جوباسىنىڭ مازمۇنىن ساپالىق جاعىنان جاقسارتتى», دەپ اتاپ ءوتتى جۇلدىز سۇلەيمەنوۆا.
بۇدان بولەك, دەپۋتات ەلنۇر بەيسەمباەۆتىڭ پەدوفيلدەردى حيرۋرگيالىق كاستراتسيالاۋ تۋرالى رەزونانستى ۇسىنىسى پالاتادان قولداۋ تاپپادى.
