Freedom Life وسك ماماندارىنىڭ ايتۋىنشا, كەي ەلدەن وندىرىستەگى جازاتايىم وقيعالاردان ساقتاندىرۋ مەديتسينالىق ساقتاندىرۋمەن ۇيلەستىرىلگەن, ءبىراز ەلدە كورپوراتيۆتىك ساقتاندىرۋ جاڭادان پايدا بولعان جانە دامۋ كەزەڭىندە. ماسەلەن, اقش وندىرىسىندە 2022 جىلى 4,5 ملن-عا جۋىق جاراقات پەن اۋرۋ جاعدايى تىركەلىپتى. جۇمىس بەرۋشىلەر وندىرىستەگى جازاتايىم وقيعالاردان مىندەتتى ساقتاندىرۋ باعدارلاماسىنان باسقا, قىزمەتكەرلەردىڭ دەنساۋلىق احۋالىن انىقتاۋعا جانە سوزىلمالى اۋرۋلارىن ەمدەۋگە كومەكتەسەتىن باعدارلامالارىن قولدانادى. اتالعان باعدارلامالار دەنساۋلىق تاۋەكەلىن باعالاۋدى, بيومەتريالىق سكرينينگ جانە دەنساۋلىقتى نىعايتۋ باعدارلامالارىن قامتيدى.
قىتايدا 2021 جىلى تەك 354 ملن ادام قىزمەتكەرلەردى الەۋمەتتىك ساقتاندىرۋ باعدارلاماسىنا قاتىسقان. وندىرىستە جاراقاتتانعان نەمەسە كاسىبي اۋرۋعا شالدىققان قىزمەتكەرلەر تولىق ەڭبەكاقى الۋعا جانە ەمدەلۋ كەزەڭىندە اي سايىن تولەنەتىن جەڭىلدىكتەردى پايدالانۋعا قۇقىلى. الەۋمەتتىك ساقتاندىرۋ مەديتسينالىق, ساۋىقتىرۋ جانە تاماقتانۋ شىعىندارىن وتەيدى.
فرانتسيادا ەڭبەككە ورنالاستىرىلعان حالىقتىڭ 96 پايىزى قىزمەتكەردى مىندەتتى ساقتاندىرۋ ءپوليسىن يەلەنگەن. قىزمەتكەرلەر ءۇشىن جۇمىستاعى ساقتاندىرۋ جاعدايلارىن قامتۋ, سونىڭ ىشىندە, مەديتسينالىق قىزمەت كورسەتۋ بويىنشا كەڭ اۋقىمدى قامتۋلار ۇسىنىلادى. جەڭىل جاراقاتتار نەمەسە اۋرۋ كەزىندە, پاتسيەنتتەرگە ەمدەلۋ جانە قالپىنا كەلۋ شىعىندارى 70 پايىزعا دەيىن قايتارىلادى. دەنساۋلىعى اۋىر جاعدايلاردا شىعىندارى 100 پايىز وتەلەدى.
«بىرىككەن اراب امىرلىگىندە قىزمەتكەرلەردى ساقتاندىرۋ جاقىندا پايدا بولدى. بۇرىن كومپانيالار ءاربىر جالداعان قىزمەتكەرى بويىنشا بانك كەپىلدەمەسىن 3 مىڭ ديرحام (366,2 مىڭ تەڭگە) كولەمىندە تولەيتىن. 2022 جىلدىڭ ماۋسىمىنان باستاپ زاڭناماعا وزگەرتۋلەر ەنگىزىلدى. اتالعان كەپىلدەمە ورنىنا جۇمىس بەرۋشىلەرگە قىزمەتكەرلەردى ساقتاندىرۋ شارتىن جاساسۋ مۇمكىندىگى بەرىلدى (WPP Insurance). ال ۋرۋگۆايدا ەڭبەككە قابىلەتتى حالىقتىڭ 90 پايىزىنان استامى ساقتاندىرىلعان. قىزمەتكەرلەردى الەۋمەتتىك قامتاماسىز ەتۋ جۇيەسى جيىنتىق تۇردە قولدانىلادى جانە وندىرىستەگى جازاتايىم وقيعالاردان ساقتاندىرۋ, جۇمىسسىزدىقتى ساقتاندىرۋ, مەديتسينالىق ساقتاندىرۋدى قامتيدى», دەلىنەدى زەرتتەۋدە.
ال بىزدەگى الەۋمەتتىك مەديتسينالىق ساقتاندىرۋ قورىنىڭ مالىمەتى بويىنشا, 2023 جىلى مىندەتتى الەۋمەتتىك مەديتسينالىق ساقتاندىرۋ باعدارلاماسىنا سايكەس 16,6 ملن ادام ساقتاندىرىلدى. قازىرگى ساتتە قىزمەتكەرلەردى مىندەتتى مەديتسينالىق ساقتاندىرۋ مولشەرلەمەسى ەڭبەكاقى مولشەرىنىڭ 3 پايىزىن قۇرايدى. اتالعان سوما قىزمەتكەردىڭ ەڭبەكاقىسىنان شەگەرىلمەيدى, ونى جۇمىس بەرۋشى تولەيدى.
«قىزمەتكەردى ەڭبەك (قىزمەتتىك) مىندەتتەرىن اتقارۋ كەزىندە جازاتايىم وقيعالاردان مىندەتتى ساقتاندىرۋ تۋرالى» زاڭعا سايكەس ءار جۇمىس بەرۋشى ءوز قىزمەتكەرىمەن ساقتاندىرۋ شارتىن جاساسۋى كەرەك. ساقتاندىرۋ مەرزىمى – 12 اي. قۇنى جەكە بەلگىلەنەدى جانە ەكونوميكالىق قىزمەت ءتۇرى مەن جىلدىق ەڭبەكاقى تولەم قورىنا بايلانىستى.
ۇلتتىق بانك ستاتيستيكاسىنا سايكەس, قىزمەتكەردى وندىرىستەگى جازاتايىم وقيعالاردان مىندەتتى ساقتاندىرۋ بويىنشا 2023 جىلى ساقتاندىرۋ سىيلىقاقىسىنىڭ كولەمى 87 ملرد تەڭگەنى قۇراعان, بۇل 2022 جىلمەن سالىستىرعاندا 22,9 پايىزعا ارتىق. 2023 جىلى ساقتاندىرۋ جارناسىنىڭ كولەمى 14,9 ملرد تەڭگە بولدى (2022 جىلمەن سالىستىرعاندا, 145,7 پايىزعا كوپ).
