فوتو: ۇكىمەتتىڭ ءباسپاسوز قىزمەتى
دەنساۋلىق ساقتاۋ ءمينيسترى اقمارال ءالنازاروۆا ۇلتتىق جوبا 655 جاڭا العاشقى مەديتسينالىق-سانيتاريالىق كومەك نىسانىن (مەديتسينالىق پۋنكتىلەر, فەلدشەرلىك-اكۋشەرلىك پۋنكت, دارىگەرلىك امبۋلاتوريالار) سالۋدى, 32 كوپبەيىندى ورتالىق اۋداندىق اۋرۋحانالاردى جاڭعىرتۋدى, سونداي-اق اۋىلداعى دەنساۋلىق ساقتاۋ نىساندارى ءۇشىن 1 100 مەديتسينا قىزمەتكەرىن دايارلاۋدى كوزدەيتىنىن اتاپ ءوتتى.
بۇگىنگى تاڭدا 92 مەديتسينالىق-سانيتاريالىق العاشقى كومەك وبەكتىسىنىڭ قۇرىلىسى اياقتالعان, 7 مەديتسينالىق مەكەمە بويىنشا جۇمىستار جالعاسىپ جاتىر, جىل سوڭىنا دەيىن تاعى 556 نىساندى پايدالانۋعا بەرۋ جوسپارلانىپ وتىر. ۇلتتىق جوبانىڭ قالعان باعىتتارى بويىنشا قاجەتتى راسىمدەر مەن پروتسەستەر ءجۇرىپ جاتىر.
ولجاس بەكتەنوۆتىڭ ايتۋىنشا, قازىرگى ۋاقىتتا جوبالاردىڭ ساراپتاماسى كەشىكتىرىلىپ جاتىر. بۇدان باسقا ۇلىتاۋ جانە قوستاناي وبلىستارىندا وبەكتىلەردى سالۋ مەرزىمدەرى اۋىستى.
اتالعان ماسەلەلەر بويىنشا ونەركاسىپ جانە قۇرىلىس ءمينيسترى قانات شارلاپاەۆ, سونداي-اق وڭىرلەر اكىمدەرى بەرىك ابدىعالي ۇلى مەن قۇمار اقساقالوۆ تۇسىنىكتەمە بەردى.
ولجاس بەكتەنوۆ «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىن جۇزەگە اسىرۋ ماسەلەسى ۇكىمەتتە بىرنەشە رەت قارالعانىن, بىراق ازىرگە ناقتى ناتيجە جوق ەكەنىنە توقتالدى.
«وتكەن جىلى 309 وبەكتىنى سالۋ جوسپارلانعان ەدى. دەنساۋلىق ساقتاۋ مينيسترلىگى باقىلاۋدى السىرەتىپ الدى. اكىمدىكتەر دە قۇرىلىس ورىندارىن انىقتاۋ, جەر ۋچاسكەلەرىن ۋاقىتىلى ءبولۋ بويىنشا ءتۇرلى سىلتاۋ ايتىپ, ماسەلەنى شۇعىل شەشۋگە نيەت تانىتقان جوق. جوبالاۋ قۇجاتتارىن راسىمدەۋ مەن ساراپتاما ماسەلەلەرى دە تىم كەشەۋىلدەپ كەتتى. سوندىقتان اۋىلدىق جەرلەردەگى مەديتسينا وبەكتىلەرىنىڭ قۇرىلىسىن باستاۋ مەرزىمدەرى بۇزىلدى», دەدى پرەمەر-مينيستر.
ۇكىمەت باسشىسىنىڭ ايتۋىنشا, بىلتىر اكىمدىكتەر تيپتىك جوبالاردى جەرگىلىكتى جەرگە بايلانىستىرۋعا ءتيىس ەدى, بۇل جۇمىس تا اياقسىز قالدى. جالپى بيىل 239 وبەكتىنىڭ جوبالىق قۇجاتتاماسى دايىن, ونىڭ 109-ى بويىنشا عانا مەردىگەر كومپانيالار ايقىندالدى. قالعاندارى ازىرگە ناقتى ىستەن گورى, جالاڭ ءسوز كۇيىندە قالىپ وتىر.
«قۇرىلىس جۇمىستارىن الداعى ناۋرىز-ءساۋىر ايلارىندا باستاۋ قاجەت. دەنساۋلىق ساقتاۋ مينيسترلىگى بولسا, ولاردى قارجىلاندىرۋ ءۇشىن بيۋدجەتتىك وتىنىمدەردى بەرۋگە اسىعار ەمەس. اكىمدىكتەر دە قارجىلاندىرۋ ماسەلەلەرىن شەشە الماي كەلەدى. ءالى كۇنگە دەيىن كوپبەيىندى ورتالىق اۋداندىق اۋرۋحانالاردى كۇردەلى جوندەۋ جۇمىستارى باستالعان جوق. سونداي-اق ولارعا مەديتسينالىق جابدىقتار ساتىپ الۋ ىسىندە دە جاعداي ءماز ەمەس. مۇنداي پروتسەدۋرالار كوپ ۋاقىتتى الادى», دەدى ۇكىمەت باسشىسى.
وعان قوسا ولجاس بەكتەنوۆ ۇلتتىق جوبا ءۇشىن جيھاز جانە قۇرىلىس ماتەريالدارىن جەتكىزۋگە وتاندىق وندىرۋشىلەردى تارتۋ قاجەتتىگىنە نازار اۋداردى. اتاپ ايتقاندا, «سامۇرىق-قازىنا» قورى مەن ونىڭ ەنشىلەس ۇيىمدارى وتاندىق تاۋارلار مەن قىزمەتتەردى كەڭىنەن ساتىپ الىپ, ءوزىمىزدىڭ وتاندىق تاۋار وندىرۋشىلەرگە قولداۋ كورسەتۋگە ءتيىس.
«وتكەن اپتادا عانا جەڭىل ونەركاسىپ قاۋىمداستىعىنىڭ باسشىسى ابدىكارىموۆا سالتانات «سامۇرىق-قازىنا» قورىنىڭ تاۋار ساتىپ الۋ ساياساتىن سىنعا الىپ, كونكۋرستاردا شيكىلىكتىڭ بارىن ايتىپ, شاعىمداندى. مەن كاسىپكەرلەردىڭ پىكىرىن قولدايمىن. ءبىز وسى سالاداعى جاعدايدى تۇبەگەيلى وزگەرتىپ, وتاندىق وندىرۋشىلەردى قولداۋ جۇيەسىن قۇرۋعا ءتيىسپىز», دەدى پرەمەر-مينيستر.
سونىمەن قاتار ۇكىمەت باسشىسى ۇلتتىق جوبا بويىنشا جاعدايدى جاقسارتۋ ءۇشىن جۇمىس قارقىنىن بارىنشا كۇشەيتۋ قاجەتتىگىن ايتتى. اتاپ ايتقاندا, ءاربىر وبەكتىنىڭ قۇرىلىسىن قۇجاتتاردى دايىنداۋ, قارجىلاندىرۋ كەزەڭىنەن باستاپ, ۋاقىتىلى تاپسىرعانعا دەيىن كۇندەلىكتى باقىلاۋعا الۋ قاجەت. سونداي-اق مەديتسينالىق جابدىقتارمەن جانە پەرسونالمەن قامتاماسىز ەتۋ ماسەلەسى دە نازاردان تىس قالماۋعا ءتيىس.
ۇكىمەت باسشىسى وبلىس اكىمدىكتەرىنە ونەركاسىپ جانە قۇرىلىس مينيسترلىگىمەن بىرگە 1 ساۋىرگە دەيىن جوبالارعا ۆەدومستۆودان تىس كەشەندى ساراپتاما جۇرگىزۋدى اياقتاۋدى تاپسىردى.
«دەنساۋلىق ساقتاۋ, قارجى مينيسترلىكتەرى مەن اكىمدىكتەر جوبالاردى قارجىلاندىرۋ ماسەلەسىن جەدەل شەشۋگە ءتيىس», دەپ تۇيىندەدى ولجاس بەكتەنوۆ.
