«الاقانداي اۋىلدا ءبىر ءۇيدىڭ بالاسىنداي باۋىرمال وسكەن ەل-جۇرتتىڭ بەرگەن اق باتاسى كۇش-قۋات بەرىپ, جىگەر سىيلايدى», دەپ باستادى ءسوزىن كەيىپكەرىمىز. 2008 جىلى بەيجىڭ قالاسىندا جازعى وليمپيا ويىندارى ءوتتى. تورتكۇل الەم كوز تىككەن بايراقتى باسەكەدە گرەك-ريم كۇرەسىنەن ەل نامىسىن ەلاماننىڭ اۋىلداسى اسەت مامبەتوۆ قورعايدى. اۋىل جۇرتى الەمدىك دەڭگەيدە بوزكىلەمدە بەلدەسكەن بالۋاننىڭ بۇعان دەيىنگى ءاربىر جەڭىسىنە دە بالاشا قۋاناتىن-دى. «تايلى-تۇياعىمىزبەن كوگىلدىر ەكراننان جەرلەس سپورتشىنىڭ بوزكىلەمگە شىعار ءساتىن اسىعا كۇتتىك. اسەت اعا ءۇشىن تاقىمىن قىسىپ, «اقۇدايلاعان» اعايىننىڭ ىشىندە قارا دومالاق ءبىز دە جۇردىك. اسەت اعانى جۇلدەگەر تۇعىرىنان كورگەن شاقتا توبەمىز كوككە ءبىر ەلى جەتپەي قالدى. التىنشوقىنىڭ عانا ەمەس, مۇقىم الاش ەلىنىڭ نامىسىن قورعاعان وليمپيادانىڭ قولا جۇلدەگەرىنە مەن سەكىلدى بارلىق بالا ەلىكتەدىك. ۇلكەندەر دە ءبىزدىڭ كۇش سىناسقانىمىزدى قىزىق كورىپ, «قانەكي, اسەتتىڭ ءىزىن باساتىن كىم بار؟» دەپ بەلدەستىرىپ جىبەرەتىن. ءبىز دە بىلەك تۇرە كىرىسەتىنبىز», دەيدى بىلەكتى سارباز.
كەيىننەن گرەك-ريم كۇرەسىنەن قازاقستاننىڭ ەڭبەك سىڭىرگەن سپورت شەبەرى, «قۇرمەت» وردەنىنىڭ يەگەرى اسەت سەكەن ۇلى تۋعان اۋلىنا ات باسىن بۇرىپ, جەرگىلىكتى جۇرتپەن كەزدەسەدى. سول كەزدەسۋدە اۋىل مەكتەبىنە بوزكىلەمگە قاجەتتى قۇرىلعىلاردى سىيعا تارتقان. وسىلايشا, مەكتەپتە كۇرەس ۇيىرمەسى اشىلىپ, بۇدان بىلاي بالالار دالادا ەمەس, ناعىز بالۋاندار سەكىلدى بوزكىلەمنىڭ ۇستىندە دايىندالاتىن كۇنگە جەتتى. بۇل ۋاقىتتا ءبىزدىڭ كەيىپكەرىمىز 3-سىنىپ وقۋشىسى ەكەن. كۇرەسكە دەگەن قىزىعۋشىلىعى وسىلاي باستالعان ەلامان بايموۆ سپورتتىڭ وسى ءتۇرىن جانىنا سەرىك ەتەدى. بىلىكتى باپكەردىڭ الدىن كورگەن ول سەمەي, اقتوبە قالالارىندا ۇيىمداستىرىلعان سايىستاردا باق سىنايدى. «سۇيىكتى ءادىسىم – جامباسقا سالۋ. 9-سىنىپتان كەيىن الماتى قالاسىنداعى اۆياتسيا اكادەمياسىنىڭ كوللەدجىنە تەحنيك-ەلەكتريك ماماندىعىنا وقۋعا ءتۇستىم. ماماندىعىم تەحنيك-ەلەكتريك بولعانىمەن, ۇشاقتىڭ قىر-سىرىن مەڭگەردىم. كوللەدجدە وقىپ ءجۇرىپ تە كۇرەستەن قول ۇزبەدىم», دەيدى ول. بوزكىلەمدە ءبىر اۋناسا ماۋقى باسىلمايتىن سارباز – بۇگىندە كۇرەستەن سپورت شەبەرىنە ۇمىتكەر.
اسكەري بولىمدە جۇرسە دە, سپورتتى جانىنا سەرىك ەتكەن جاۋىنگەر: «بۇل جەردە سپورت تۇرىنە بارلىق جاعداي قاراستىرىلعان. بوس ۋاقىتىمدى سپورتزالدا وتكىزەمىن. جاۋىنگەرلىك جاساق قاتارىندا كوشە ءتارتىبىن كۇزەتەمىن. سارباز ءۇشىن سپورت اسا قاجەت. ويتكەنى قىزمەت بارىسىندا ءتارتىپ بۇزۋشى قارسىلىق ءبىلدىرىپ, قول كوتەرگەن جاعدايدا تويتارىس بەرۋ قاجەت», دەيدى. سوندىقتان اسكەري بولىمدە جاياۋ جاساق قۇرامىنداعى ساربازداردى جەكپە-جەك ۇرىس-تاسىلدەرىنە ۇيرەتەدى. ونداي كەزدە ەلامان گرەك-ريم كۇرەسىندە قولداناتىن ءادىس-تاسىلدەردىڭ قيۋىن كەلىستىرىپ, جەكپە-جەككە ىڭعايلاپ الادى. بولاشاقتا ماماندىعى بويىنشا جۇمىس ىستەپ, وتاندىق اۋە سالاسىنىڭ الەۋەتىن ارتتىرعىسى كەلەتىنىن ايتقان ول: «جوعارى ءبىلىم الىپ, بوز كىلەمدە بەلدەسۋدى توقتاتپايمىن. داۋلەت تۇرلىحانوۆ, اسەت مامبەتوۆ اعالارداي وسكەن ءوڭىردىڭ وسكەلەڭ ۇرپاعىن سپورتقا باۋلىعىم كەلەدى», دەپ اعىنان جارىلدى. ءبىز ارمانى اسقاق, ماقساتى بيىك شىمىر بىلەكتى جاۋىنگەردىڭ باعىندىرار بەلەسى كوپ بولۋىن تىلەدىك.
