فوتو: spb.mk.ru
زاڭ جوبالارىنا زورلىق-زومبىلىققا, باسقا دا قاتىگەزدىككە نەمەسە ادامنىڭ ار-نامىسىن قورلاۋعا جول بەرمەۋ ماقساتىندا بىرقاتار نورما قوسىلدى.
«بىرىنشىدەن, دەنساۋلىققا جەڭىل زيان كەلتىرگەنى ءۇشىن 200 اەك دەيىن ايىپپۇل تۇرىندەگى جازا نە 200 ساعاتقا دەيىن قوعامدىق جۇمىستارعا تارتۋ نەمەسە 50 تاۋلىككە دەيىن قاماۋعا الۋ, ۇرىپ-سوققانى ءۇشىن 80 اەك-كە دەيىن ايىپپۇل نە 80 ساعاتقا دەيىن قوعامدىق جۇمىستارعا تارتۋ نەمەسە 25 تاۋلىككە دەيىن قاماۋعا الۋ», دەپ حابارلادى ءماجىلىستىڭ ءباسپاسوز قىزمەتى.
جاڭادان ەنگىزىلگەن نورمالار نەگىزىندە كامەلەتكە تولماعان نە دارمەنسىز كۇيدەگى ادامدى ازاپتاۋ, دەنساۋلىعىنا اۋىر جانە ورتاشا زيان كەلتىرگەنى ءۇشىن جازانىڭ «باس بوستاندىعىن شەكتەۋگە» قاتىستى بالاما ءتۇرى الىنىپ تاستالىپ, تەك باس بوستاندىعىنان ايىرۋ جازاسى تاعايىندالماق.
جاس بالانى ولتىرگەنى نەمەسە پەدوفيليا ءۇشىن ء«ومىر بويى باس بوستاندىعىنان ايىرۋ» جازاسى قولدانىلادى.
دەپۋتاتتار پەدوفيلدەر مەن جاس بالانى ولتىرگەن قاسكويدى قىلمىستىق جازاعا تارتۋ تەتىگىن قاتاڭداتۋ ماسەلەسىن ءبىراۋىزدان قولدادى. ناتيجەسىندە, ەندى بالالارعا زورلىق-زومبىلىق كورسەتكەن قىلمىسكەر مەن ولاردى ولتىرگەندەر ءومىر بويى باس بوستاندىعىنان ايىرىلادى.
زاڭ جوباسىن تالقىلاعاندار كامەلەتكە تولماعاندارعا قاتىستى نەمەسە وتباسىندا اكىمشىلىك, قىلمىستىق قۇقىق بۇزۋشىلىق جاساعان ادامداردىڭ مىنەز-قۇلقىنا ەرەكشە تالاپتار قولدانۋ تۋرالى ءىس-شارالاردى دا ورتاعا سالدى. اتاپ ايتقاندا, قاماۋدا وتىرعان قىلمىسكەرگە سوت شەشىمى بويىنشا پسيحولوگيالىق كومەك كورسەتىلۋى مۇمكىن.
