سىرداعى ازىرلىكتى كورۋگە جۇمىس ساپارىمەن كەلگەن توتەنشە جاعدايلار ءمينيسترى شىڭعىس ءارىنوۆ پەن وبلىس اكىمى نۇرلىبەك نالىباەۆ قىزىلوردا سۋ تورابىنا بارىپ, وزەندەگى سۋ دەڭگەيىن باقىلادى. بيىلعى قىس جىلى بولىپ, ارنادا وتكەن جەلتوقسان ايىنىڭ العاشقى ونكۇندىگىندە عانا مۇز ۇستاسا باستاعان. كەيىننەن وزەننىڭ وڭتۇستىك بولىگى ەرىگەنمەن, سولتۇستىك جاعى ءالى سىرەسىپ جاتىر.
وسى كۇنى ارال, قازالى, قارماقشى, جالاعاش, سىرداريا اۋداندارى مەن قىزىلوردا قالاسى ماڭىندا مۇز تولىقتاي ۇستاسىپ تۇر. شيەلى اۋدانىنىڭ جولەك ەلدى مەكەنى تۇسىندا دا مۇز بار. جاڭاقورعان اۋماعىنداعى وزەن بەتى الدەقاشان ەرىگەن.
سۋ باسۋ قاۋپى بار اۋماقتار كۇش-قۇرالدارى جەتكىلىكتى مەكەمەلەرگە بەكىتىلگەن, وسى كۇنى 364 ارنايى تەحنيكا جانە 1 102 ادام دايىن تۇر. سۋ تاسقىنىنا قارسى جاساقتالعان ماتەريالدىق-تەحنيكالىق قوردا 117,9 توننا جانار-جاعارماي, 139 902 دانا قاپ جانە باسقا دا ماتەريالدار بار. ايتقان جەردەن اۋلاق, بىراق تاسقىن قاۋپى تۋىنداي قالسا حالىقتى كوشىرۋ پۋنكتتەرى دە دايىن تۇر. وبلىس اۋماعىندا 59 ەۆاكۋاتسيالىق جيناقتاۋ جانە 69 ەۆاكۋاتسيالىق قابىلداۋ ورنى بار. جەرگىلىكتى اتقارۋشى ورگاندار مەن سۋ شارۋاشىلىعى ماماندارى تاۋلىك بويى كەزەكشىلىك ۇيىمداستىرادى.
توتەنشە جاعدايلار ءمينيسترى قىزىلوردا وبلىسىندا قاۋىپسىزدىك شارالارى بارلىق تالاپقا ساي ۇيلەستىرىلگەنىن اتاپ ءوتتى. وبلىسقا ساپارى بارىسىندا سالا باسشىسى جەرگىلىكتى ءورت ءسوندىرۋ بولىمدەرىن ارالاپ, توتەنشە جاعدايلار مينيسترلىگى اۋماقتىق بولىمشەلەرىن ماتەريالدىق-تەحنيكالىق جاراقتاندىرۋ بارىسىمەن تانىستى. «2021-2023 جىلدارعا ارنالعان تجم اۋماقتىق بولىمشەلەرى مەن ۆەدومستۆولىق باعىنىستى مەملەكەتتىك مەكەمەلەرىن ماتەريالدىق-تەحنيكالىق جاراقتاندىرۋ تۋرالى» جول كارتاسى اياسىندا وبلىستىق توتەنشە جاعدايلار دەپارتامەنتىنە 2021-2023 جىلدار ارالىعىندا وبلىس بيۋدجەتىنەن 664,5 ملن تەڭگە قارجى ءبولىنىپ, وعان 74 ماتەريالدىق-تەحنيكالىق قۇرال-جابدىق, وزگە دە قاجەتتى قۇرالدار الىندى. بۇدان بولەك, جەرگىلىكتى بيۋدجەت قاراجاتى ەسەبىنەن ليزينگپەن 14 ءورت ءسوندىرۋ ءاۆتوموبيلىن ساتىپ الۋعا «ونەركاسىپتى دامىتۋ قورى» اكتسيونەرلىك قوعامىمەن كەلىسىمشارت جاسالعان. بۇل تەحنيكالار الداعى ءساۋىر ايىندا جەتكىزىلەدى.
سالا ماماندارى وسىعان دەيىن ارال اۋدانى قامىستىباس كولىندەگى سۋدا قۇتقارۋ ستانساسى عيماراتىنىڭ سانيتارلىق جانە ورتكە قارسى نورمالارعا سايكەس ەمەستىگىن تالاي مارتە كوتەرگەن بولاتىن. عيماراتتا سۇڭگۋىرلەردى دايارلاۋ جانە تاۋلىك بويى كەزەكشىلىك اتقارۋعا جاعداي جاسالماعاندىعى بىلاي تۇرسىن, ارنايى تەحنيكا مەن جابدىقتاردى ساقتاۋعا ارنالعان ءۇي-جاي بولماعان ەدى.
وسىدان ەكى جىل بۇرىن جەرگىلىكتى بيۋدجەتتەن 54,3 ملن تەڭگە ءبولىنىپ, قۇتقارۋشىلارعا ارنالعان قۇراستىرمالى-جينالمالى ءمودۋلدى ءۇي ساتىپ الىندى.
قىزىلوردا
