فوتو: ۆيدەوسكرين
«بەلگىسىز ەر ادام 4 كىشكەنتاي بالانى بايلاپ, ۇرىپ-سوعىپ, ازاپتاپ, پىشاقتاعان, ونى ۇستاۋ شارالارى جۇرگىزىلىپ جاتىر», دەگەن جازبا جۇرتتىڭ ۇرەيىن ۇشىردى.
وسىعان بايلانىستى الماتى وبلىستىق پوليتسيا دەپارتامەنتىنىڭ باستىعى باۋىرجان الەنوۆ كۇدىكتىنىڭ قولعا تۇسكەنى تۋرالى حابارلادى.
«كامەلەتكە تولماعان بالالارعا شابۋىل جاساعان كۇدىكتى قاماۋعا الىندى. قازىرگى ۋاقىتتا ول اۋداندىق پوليتسيانىڭ ۋاقىتشا ۇستاۋ يزولياتورىندا وتىر, تەرگەۋ ارەكەتتەرى جۇرگىزىلىپ جاتىر. ايتا كەتەيىك, كۇدىكتى الماتى وبلىسى, قاراساي اۋدانىندا ۇستالدى. تەرگەۋ بارىسى مەنىڭ جەكە باقىلاۋىما الىندى. وزگە اقپارات قازاقستان رەسپۋبليكاسى قىلمىستىق-پروتسەسسۋالدىق كودەكسىنىڭ 201-بابىنىڭ ەرەجەلەرىنە سايكەس جاريا ەتۋگە جاتپايدى», دەدى ول.
وبلىستىق دەنساۋلىق ساقتاۋ باسقارماسىنىڭ وكىلدەرىنە حابارلاسىپ, كۇدىكتىنىڭ قولىنان جاپا شەككەن بالالاردىڭ دەنساۋلىعى تۋرالى بىلگەن ەدىك.
«جامبىل اۋداندىق ورتالىق اۋرۋحاناسىنىڭ قابىلداۋ بولىمىنە 15.02.2024 جىلى ساعات كەشكى 19.40 شاماسىندا جەدەل جاردەم بريگاداسى 4 بالانى جەتكىزدى. 12 مەن 13 جاس ارالىعىنداعى ەكى بالادا جۇمساق تىندەردىڭ كوگەرۋى انىقتالدى. بارلىق مەديتسينالىق تەكسەرۋلەردەن وتكەننەن كەيىن ولار امبۋلاتوريالىق ەمدەلۋگە جىبەرىلدى.
10 جاسار بالانى حيرۋرگ پەن تراۆماتولوگ دارىگەرلەر تەكسەرىپ, دەنە جاراقاتىن الماعانىن انىقتادى.
8 جاسار بالانى جامبىل اۋداندىق ورتالىق اۋرۋحانادان تەكسەرۋدەن وتكىزگەننەن كەيىن الماتى وبلىستىق بالالار كلينيكالىق اۋرۋحاناسىنا جىبەرىپ, ماماندار تەكسەرىپ, ستاتسيونارعا جاتقىزدى. بالادا جۇمساق تىندەردىڭ كوگەرۋى, تەرى استىنداعى گەماتومالار, بەت ايماعىندا, كوزدىڭ اينالاسىندا جانە مويىندا جاراقات ىزدەرى بار. ەم الىپ جاتىر», دەگەن جاۋاپ الدىق.
ال الماتى وبلىسى بويىنشا بالا قۇقىعى جونىندەگى ۋاكىل ايگۇل ەسىمبەكوۆا كۇدىكتىنىڭ قولىنان قورلىق كورگەن 4 بالانىڭ ءبىرى اۋرۋحاناعا جاتقىزىلسا, قالعان 3-ءۋى انالارىنىڭ جانىندا ەكەندىگىن, ولارمەن مەكتەپ پسيحولوگتارى جۇمىس ىستەپ جاتقاندىعىن ايتتى.
الماتى وبلىسى
