ءار وڭىردە جۇرگىزىلگەن كۋرس بيىل دا جالعاسىن تاۋىپ, 750 مىڭعا جۋىق ادامدى قارجىلىق ساۋاتتىلىققا وقىتۋ باستالىپ كەتتى. بۇل جونىندە تاياۋدا استانا قالاسىندا 150-دەن اسا قارجى سالاسىنىڭ ساراپشىسى باس قوسقان جيىندا ايتىلدى.
«بيىل قارجىلىق ساۋاتتىلىق نەگىزىن مەكتەپ قابىرعاسىنان باستاپ وقىتۋدى قولعا الامىز. ول ءۇشىن ۇكىمەتپەن بىرلەسىپ وقۋشىلار, كوللەدجدەر مەن جوعارى وقۋ ورىندارىنىڭ ستۋدەنتتەرى ءۇشىن وقۋ قۇرالدارى ازىرلەنەدى. جوبا اياسى كەڭەيەدى. ەلىمىزدىڭ بارلىق وڭىرىندە 750 مىڭ ادامدى, ونىڭ ىشىندە 100 مىڭ ستۋدەنت پەن 550 مىڭ وقۋشىنى وقىتۋ جوسپارلانىپ وتىر», دەيدى پارتيا حاتشىسى.
«قارىزسىز قوعام» جوبالىق كەڭسەسىنىڭ جەتەكشىسى اقمارال بەكمۇرزاەۆانىڭ ايتۋىنشا, ءوتىنىش بەرۋشىلەردى ىرىكتەۋ كەزىندە 90 كۇننەن استام مەرزىمى وتكەن نەسيەسى بار ازاماتتارعا باسىمدىق جاسالادى.
«بۇل ەلدەگى ەكونوميكالىق بەلسەندى حالىقتىڭ 77 پايىزىن قۇرايدى. ال 1,7 ملن ادامنىڭ نەسيە تولەۋ مەرزىمى ءوتىپ كەتكەن. ءبىز جۇرتشىلىققا تەك سان مەن ساناۋدى ۇيرەتىپ قانا قويماي, تاڭداۋ جاساۋ ەركىندىگىنە جول اشامىز. ويتكەنى ولار قاراجاتتى قالاي باسقارۋ كەرەگىن تۇسىنگەن سوڭ, الداعى كۇنگە جوسپار قۇرا باستايدى. ءبىزدىڭ جوبا – قارجىلىق تاۋەلسىزدىكتىڭ كىلتى», دەيدى ول.
قارجىلىق ساۋاتتىلىق جونىندەگى ساراپشى, ترەنەر جاندوس ءازىمباي تىڭداۋشىلار اراسىندا ءتۇرلى جاعدايعا تاپ بولعاندار بار ەكەنىن ايتتى.
«حالىقتىڭ باسىم بولىگى اسا قاجەتى جوق تاۋارلار مەن قىزمەتتەردى دە نەسيەگە راسىمدەي بەرگەنگە ۇيرەنىپ كەتكەن. تىڭداۋشىلار اراسىندا ورتا ەسەپپەن ءبىر ادامعا 2-3 تۇتىنۋشىلىق نەسيەدەن كەلەدى. ال نەسيە كولەمى 70 مىڭنان 2 ملن تەڭگەگە دەيىنگى ارالىقتا. كەيبىرى قارىزدى قاجەتتىلىكتەن ەمەس, ماركەتينگ ايلاسىنا الدانىپ قالىپ راسىمدەپ جىبەرگەن. تىڭداۋشىلاردىڭ ءبىرى ءتىپتى 16 نەسيەگە دەيىن راسىمدەپ تاستاعان ەكەن», دەيدى ساراپشى.
اتالعان جوبانىڭ ماقساتى دا سول – ادامدارعا وزدەرىنىڭ كىرىس-شىعىسىن ەسەپتەۋدى ۇيرەتۋ, قارجىلىق ساۋاتتىلىق الىپپەسىن مەڭگەرتۋ.
ترەنەر ايمان اقىنبەكوۆا «قارىزسىز قوعام» جوباسى اياسىندا ءدارىس العان ءار ادام جەكە قارجىلىق جاعدايىن جاقسارتۋ جوسپارىن قوسا مەڭگەرىپ شىعادى دەيدى.
ء«يا, ادامدار كوبىنە نەسيەنى توي جاساۋ ءۇشىن الادى. جالاقىسى 100 مىڭ تەڭگەگە جەتپەسە دە, قارىز قامىتىن كيۋگە اسىعىپ تۇرادى. ميكروقارجى ۇيىمدارىنا جۇگىنەدى. ەكىنشى دەڭگەيلى بانكتەن نەمەسە ميكروقارجى ۇيىمدارىنان نەسيە العان ادام ونى ەسەلەپ قايتاراتىنىن ويلاي بەرمەيدى. بۇل دا قارجىلىق ساۋاتتىلىقتىڭ ازدىعىن كورسەتەدى. جوباعا قاتىسۋشىلاردىڭ 95 پايىزى بانك پەن ميكروقارجى ۇيىمدارىندا بەرەشەگى بارلار», دەيدى ايمان اقىنبەكوۆا.
«قارىزسىز قوعام» الەۋمەتتىك جوباسى قولعا الىنعان 2023 جىلدىڭ مامىر ايىنان بەرى 65 مىڭنان استام ادام قارجىلىق ساۋاتتىلىق كۋرسىنان وتكەن. 65 پايىزىنىڭ نەسيەسى بار. ورتاشا جاسى – 43. قارىزدى قايتارۋ مەرزىمى 90 كۇننەن اسىپ كەتكەن ادامداردىڭ ۇلەسى – 18 پايىز. ءاربىر ەكىنشى قاتىسۋشىنىڭ وتباسىلىق تابىسى 100 مىڭ تەڭگەگە جەتپەيتىن كورىنەدى. سونىمەن قاتار ءدارىس الۋشىلاردىڭ ۇشتەن بىرىندە كەمى 2 نەسيەدەن بار. قاتىسۋشىلار اراسىندا بالاسىنىڭ نەسيەسىن تولەۋگە ءماجبۇر بولعان زەينەتكەرلەر دە جەتكىلىكتى.
جوباعا قاتىسۋشىلار قارجى كەڭەسشىلەرىنىڭ دارىسىنەن بولەك, enbek.kz پورتالىنا تىركەلۋ مەن جەكە كاسىپكەرلىك اشۋدان باستاپ سوتتان تىس بانكروتتىقتى سۇيەمەلدەۋ مەن بەرەشەكتى وتەۋ كەستەسىن جاساۋعا دەيىنگى ارالىقتا تۋىنداعان ماسەلەلەر بويىنشا كومەك الادى. ولار ءار قارىز الۋشىنىڭ نەسيە تاريحىن جەكە زەرتتەپ, قارىز جۇكتەمەسىن جەڭىلدەتۋ جونىندە كەڭەس بەرەدى.
