سۋرەتتى تۇسىرگەن – اۆتور
بيىلعى قىستا بوزانبايدىڭ تورىندە قۇسبەگىلەردىڭ سايىسى ەكىنشى رەت ءوتتى. قاراشادا حالىقارالىق دەڭگەيدە ۇيىمداستىرىلسا, بۇل جولى تەك قازاقستان قىراندارىنىڭ قىراعىلىعىن انىقتايتىن سايىس بولدى. اقپانداعى اق بورانعا قاراماستان, ەلىمىزدىڭ ءار وڭىرىنەن 70-تەن استام بۇركىت پەن 40-تان استام قارشىعا جانە يتەلگى اكەلىندى. بەس كۇنگە سوزىلعان سايىستىڭ العاشقى كۇنى ساڭقىلداتىپ قۇس كوتەرگەن قۇسبەگىلەر تانىستىرىلىپ, جەرەبە تارتىلدى. قاسقىر ىشىك, ساپتاما ەتىك, تۇلكى تىماق كيگەن بۇركىتشىلەر كەلە جاتقاندا, رۋحىڭ اسقاقتاپ, ارقالانا تۇسەتىنىڭ راس. پرەزيدەنت تە ۇلتتىق سيپاتتاعى دۇنيەنى كەڭىنەن دارىپتەي ءتۇسۋىمىز كەرەك دەدى ەمەس پە؟! ال بوزانباي اۋىلى قۇسبەگىلەر ورتاسىنا اينالىپ كەلە جاتقالى قاشان. ونىڭ ۇستىنە ەلىمىزگە عانا ەمەس, الەمگە بەلگىلى بۇركىتشى ايشولپان نۇرعايىپقىزىنىڭ وتباسى سوناۋ موڭعوليادان وسى اۋىلعا قونىس اۋداردى. ارىگە ۇڭىلسەك, بوزانبايدا وزبەك ماناپوۆ دەگەن اككى قۇسبەگى وتكەن. ونىڭ قۇسبەگىلىگى تۋرالى كەڭەس وكىمەتى تۇسىندا جاپونيانىڭ جۋرناليستەرى دە كەلىپ رەپورتاج جاساعان ەكەن. سوعان قاراعاندا, بوزانباي قۇت قونعان, قۇس قونعان قاسيەتتى مەكەن سەكىلدى.
– قۇسبەگىلىك ونەرگە قىزىعۋشىلىق ارتىپ كەلەدى. ەل كولەمىندە كوپتەگەن جارىستار ءوتىپ جاتىر. سونىڭ ىشىندە سوڭعى كەزدە شىعىس قازاقستاندا قۇسبەگىلىك ونەر قاناتىن كەڭگە جايىپ كەلەدى. بيىل ەكىنشى رەت ەلىمىزدىڭ قۇسبەگىلەرى بوزانبايدا باس قوسىپ وتىر. بۇل اۋىلدا ەلگە بەلگىلى بىرقاتار بۇركىتشىلەر تۇرادى. ول دا شىعىستا قۇسبەگىلىك ونەردىڭ دامۋىنا ۇلكەن اسەر ەتەدى دەپ ويلايمىن. بىلەسىزدەر مە, بۇل اۋىلدا تاعى ءبىر كىشكەنتاي بۇركىتشى قىزىمىز تۇرادى. ەسىمى ايزەرە. وسىنىڭ ءبارىن ەسكەرىپ ءحVىى رەسپۋبليكالىق بۇركىتشىلەر چەمپيوناتىن بوزانبايدا وتكىزۋدى ءجون كوردىك. جارىس جەڭىمپازدارى استانادا وتەتىن دۇنيەجۇزىلىك كوشپەلىلەر ويىنىنا قاتىسادى, – دەيدى
قر «قۇسبەگىلىك» بۇركىتشىلەر فەدەراتسياسىنىڭ ۆيتسە-پرەزيدەنتى باعدات مۇپتەكەقىزى.
جارىس ناتيجەسىندە, سوناۋ اتىراۋدان ات ارىتىپ كەلگەن قۇسبەگى سارمات ابدىكارىم ۇلىنىڭ قىرانى جارىستىڭ چەمپيونى اتاندى. ەكىنشى ورىندى الماتىلىق ايان سەيىتجان قانجىعاسىنا باستى. جۇلدەلى ءۇشىنشى ورىندى پاۆلودارلىق الان ىسقاقوۆتىڭ بۇركىتى تەگەۋرىنگە ءىلدى. سونىمەن قاتار قارشىعا مەن يتەلگى ۇشىرعانداردىڭ دا جۇلدەلەرى انىقتالدى.
– بوران قىراننىڭ قاناتىمەن ەرە جۇرەتىن تابيعي قۇبىلىس. قار, بوران اڭشىلار ءۇشىن قيىندىق ەمەس. قالاي بولعاندا دا ناعىز قىراندار فينالعا شىعىپ, جەڭىسكە جەتتى. «شىعىس التاي» بۇركىتشىلەر فەدەراتسياسىن بىرنەشە جىل باسقارىپ, وڭىردە قۇسبەگىلىكتىڭ دامۋىنا وزىندىك ۇلەسىمدى قوستىم. ەندى شىعىس پەن اباي ءبولىنىپ جاتىر. الداعى ۋاقىتتا دا اكىمدىك قولداۋ كورسەتىپ وتىرسا, مۇنداعى بۇركىتشىلەر جەمىستى جۇمىس ىستەيدى, – دەپ, بۇركىتشى تاتتىمبەت كاپ ۇلى سەنىم ءبىلدىردى.
بوزانبايعا جاڭا قونىس اۋدارعان قۇسبەگى نۇرعايىپ ىرىس ۇلىنىڭ ايتۋىنشا, بولاشاقتا بۇل اۋىلدا بۇركىتشىلەر ورتالىعى اشىلادى. ورتالىق قۇسبەگىلىكپەن عانا شەكتەلمەيدى, سونداي-اق ۇلتتىق ونەردى, سالت-ءداستۇردى ناسيحاتتاۋعا باعىتتالادى.
ءسويتىپ, ەلىمىزدىڭ تۇكپىر-تۇكپىرىنەن جينالعان جۇزگە جۋىق قۇسبەگى قالبا سىلەمىندە قىراندارىن قالىقتاتىپ قايتتى. ءيا, قولعا قىران قوندىرعان بۇركىتشىلەر قۇس قانا كوتەرىپ جۇرگەن جوق, ۇلتتىق رۋحتى دا بيىكتەتەدى.
شىعىس قازاقستان وبلىسى,
ۇلان اۋدانى,
بوزانباي اۋىلى
