پرەزيدەنت قاسىم-جومارت توقاەۆ تۇركىستان قالاسىنداعى ۇلتتىق قۇرىلتايدىڭ ەكىنشى وتىرىسىندا «بالالار كىتاپحاناسى» اتتى جاڭا باعدارلامانى جۇزەگە اسىرۋدى تاپسىردى. مەملەكەت باسشىسى «بالالار ءۇشىن سمارتفوننىڭ كىتاپتى الماستىرۋىنا رۇقسات ەتۋگە بولمايدى. بۇگىندە ەلىمىزدىڭ مەكتەپ كىتاپحانالارىندا 130 ميلليون كىتاپ بار. الايدا ولاردىڭ اراسىندا كوركەم ادەبيەتتىڭ ۇلەسى 40 ميلليون عانا. بۇل – ەلىمىز ءۇشىن وتە تومەن كورسەتكىش», دەپ وزەكتى ماسەلەنى كوتەرگەن ەدى. وسى تۇيتكىلدىڭ شەشىمىن تاپقان استانا قالاسىنىڭ ءبىلىم باسقارماسى «8 مينۋتتىق كوركەم ادەبيەت وقۋ» جوباسىن ازىرلەگەن ەدى. بۇگىندە بۇل باستاما ەلوردانىڭ بارلىق ءبىلىم بەرۋ ۇيىمىندا جۇرگىزىلىپ جاتىر. وقۋشىلار ءار اۋىسىمنىڭ الدىندا ساباق باستالماس بۇرىن 8 مينۋت ۋاقىتىن كىتاپ وقۋعا ارنايدى. جىلدىڭ سوڭىنا دەيىن ولار وتاندىق ادەبيەت پەن الەم ادەبيەتىنىڭ ەڭ وزىق ءارى تاڭداۋلى شىعارمالارىمەن تانىسادى. ءار اي سايىن كىتاپتىڭ تاقىرىپتارى اۋىسىپ وتىرادى. ماسەلەن, بالالار قاراشا ايىندا ۇلتتىق مۇددەنى قالىپتاستىرۋ, تۋعان جەر, مەملەكەتشىلدىك, ەل تاريحىن قۇرمەتتەۋ تاقىرىبىنداعى كىتاپتار وقىسا, جەلتوقسان ايىندا ازاماتتىق بولمىستى قالىپتاستىراتىن شىعارمالاردى وقىعان. قاڭتار ايىندا وتباسىلىق قۇندىلىقتار, اتا-اناعا دەگەن ماحاببات, ادامگەرشىلىك مىنەز-ق ۇلىق نورمالارىنا تاربيەلەيتىن شىعارمالار بولسا, اقپان ايىندا سالاماتتى ءومىر سالتىن ۇستانۋ, جان مەن ءتان تازالىعىنىڭ ساقتالۋى, قورشاعان ورتاعا قامقورلىق تانىتۋ تاقىرىبىنداعى كىتاپتاردى وقىپ جاتىر.
– جوبا جاپون تاجىريبەسىنەن الىندى. ىسساپارمەن جاپونياعا بارعانىمىزدا «8 مينۋتتىق كىتاپ وقۋ» باعدارلاماسىمەن تانىستىق. اتالعان باعدارلامانى زەرتتەي كەلە, ساباقتىڭ الدىندا كىتاپ وقۋ – اكادەميالىق كورسەتكىشتەردى جاقسارتۋعا جانە وقۋعا دەگەن قىزىعۋشىلىقتى ارتتىرۋعا كومەكتەسەتىنىن بىلدىك. سونىمەن قاتار ۇلىبريتانيا استاناسى لوندون قالاسىنداعى مەكتەپتەردە دە بالالاردىڭ ساۋاتتىلىعىن قالىپتاستىرۋعا 6 مينۋتتىق كىتاپ وقۋ جۇزەگە اسىرىلادى ەكەن. بۇل تاجىريبە ءبىزدىڭ ءبىلىم بەرۋ جۇيەسىنە دە قاجەت دەپ ساناپ, وقۋ جىلىنىڭ 2-توقسانىنان باستاپ استانا قالاسى بويىنشا ءبىلىم بەرۋ ۇيىمدارىنا ەنگىزدىك. بۇل تاجىريبەنى پەداگوگيكالىق زەرتتەۋلەر قولدايدى. جوبا ارتىقشىلىعى كىتاپحاناشىلار, سىنىپ جەتەكشىلەرى مەن ءپان مۇعالىمدەرىنىڭ بىرلەسكەن جۇمىسى نىعايدى. باستالعانىنا 4 اي بولعان جوبا بۇگىندە جاقسى ناتيجەلەر كورسەتىپ جاتىر. سونىڭ ىشىندە وقۋشىلاردىڭ ءبىر-بىرىمەن انا تىلىندە سويلەسۋى, كوركەم ادەبيەتكە دەگەن قىزىعۋشىلىقتارىنىڭ ارتۋى كوڭىل قۋانتادى. سونداي-اق ساباققا كەشىگىپ كەلۋ ماسەلەسى بىرتە-بىرتە ازايىپ كەلەدى, – دەيدى استانا قالاسى اكىمدىگىنىڭ «ادىستەمەلىك ورتالىعى» باسشىسى سىندار داۋەشوۆا.
راسىندا, بۇنداي تاعىلىمدى جوبالاردىڭ ارقاسىندا كەلەشەكتە وقۋشىلاردىڭ سويلەۋ مادەنيەتى دامىپ, ويىن ەركىن جەتكىزەتىن بولادى. ءبىلىم بەرۋ ۇيىمدارى اتالعان باستامانى ەرەكشە قابىلداپ, جوبا ەنگىزىلگەن ساتتەن باستاپ بىردەن ىسكە كىرىسكەن. سونداي ءبىلىم ورداسىنىڭ ءبىرى – ءنازىر تورەقۇلوۆ اتىنداعى №35 مەكتەپ-ليتسەيى. ۇستازداردىڭ ايتۋىنشا, اۋەلگىدە وقۋشىلار بۇل وزگەرىسكە ۇيرەنە الماعان. قاعاز كىتاپ وقۋدان باس تارتىپ, ەلەكتروندى كىتاپتاردى وقۋدى ۇسىنعان ەكەن.
– باستاپقىدا اتالعان جوبانى ىسكە اسىرۋ وقۋشىلار ءۇشىن قيىن بولدى. بۇعان دەيىن سمارتفونعا ابدەن ۇيرەنگەن بالالار قاعاز كىتاپتى وقۋدى قيىنسىندى. شىعارمالاردىڭ اۋديونۇسقالارىن تاۋىپ, تىڭداي سالۋدى دا ۇسىندى. دەگەنمەن كىتاپحاناشىلار مەن ۇستازدار قاۋىمى وقۋشىلاردى وقۋعا ىنتالاندىرۋعا كوپتەگەن جۇمىس جۇرگىزدى. ءار قاباتقا كىتاپ سورەلەرىن قويىپ, وقىعان شىعارمانى بالانىڭ ساناسىنا تەرەڭىرەك ءسىڭىرۋ ماقساتىندا تالداۋعا ارنالعان ءتۇرلى ءىس-شارا ۇيىمداستىردىق. ناتيجەسى كوڭىل قۋانتادى. بۇگىندە بەرىلگەن تاقىرىپتارعا بايلانىستى شىعارمالاردى ءپان مۇعالىمدەرى كىتاپحاناشىلارمەن اقىلداسا ۇسىنادى, – دەيدى ءنازىر تورەقۇلوۆ اتىنداعى №35 مەكتەپ-ليتسەيىنىڭ ديرەكتورى زاۋرەش ادىلبەكوۆا.
بالالاردىڭ كىتاپ وقۋعا دەگەن قىزىعۋشىلىعىن وياتاتىن جوبا جىل سوڭىنا دەيىن جالعاسىن تابادى. «كىتاپ وقۋدان تىيىلساق, وي ويلاۋدان دا تىيىلار ەدىك» دەپ ايگىلى جازۋشى عابيت مۇسىرەپوۆ ايتقانداي, كىتاپ ءبىزدىڭ سەرىگىمىزگە اينالۋعا ءتيىس. الەمدىك دەڭگەيدە تاجىريبەسى بار جوبا تەك ەلوردامىزدا عانا ەمەس, ەلىمىزدىڭ بارشا ءبىلىم بەرۋ ۇيىمدارىندا جالعاسىن تاپسا, نۇر ۇستىنە نۇر بولار ەدى.
ەركەناز قورداباي,
ل.ن.گۋميلەۆ اتىنداعى ەۇۋ ستۋدەنتى
