ماسەلەنىڭ ءمانىسىن «AMANAT» پارتياسىنىڭ بەلسەندىلەرى انىقتادى. ولار 1986 جىلى پايدالانۋعا بەرىلگەن سانجار جاندوسوۆ اتىنداعى قاسكەلەڭ كاسىپتىك تەحنيكالىق كوللەدجىنە مونيتورينگ جۇمىستارىن جۇرگىزدى. 300 ورىنعا شاقتالعان ستۋدەنتتەر ءۇيى 38 جىلعا جۋىق ۋاقىتتان بەرى كۇردەلى جوندەۋ كورمەگەن. قابىرعالارىنىڭ سىلاعى ءتۇسىپ, جيھازى ب ۇلىنگەن بۇل جاتاقحانادا بۇگىندە 50-گە تارتا ستۋدەنت تۇرادى.
«7 ماماندىق بويىنشا 600-گە تارتا شاكىرتكە كاسىپتىك ءبىلىم بەرىپ وتىرعان ىرگەلى مەكەمەنىڭ جاي-كۇيى سىن كوتەرمەيدى. جاتاقحانا قابىرعالارىنىڭ سىلاعى ءتۇسىپ, اس ءۇي مەن تازالىق بولمەلەرىنىڭ توزىعى جەتىپ تۇر. سۋ جۇيەلەرىنىڭ دە جاعدايى تىم ناشار. وعان قوسا, قالانىڭ قاق ورتاسىندا تۇرىپ ينتەرنەت جەلىسىنە قوسىلماعان», دەيدى وبلىستىق ءماسليحات دەپۋتاتى اسەل زايروۆا.
ال كوللەدج ديرەكتورى ءبىلىم ورداسىندا ينتەرنەت بارىن, تەك جىلدامدىعى ناشار ەكەنىن ايتىپ, اقتالدى.
«ينتەرنەتتىڭ جىلدامدىعى تومەن. سوندىقتان اشىلماي تۇرعان شىعار. نەگىزىندە ينتەرنەت بار. ماتەريالدىق بازا دا جەتكىلىكتى. بىراق جاڭارتۋدى قاجەت ەتەدى. عيماراتتى كۇردەلى جوندەۋدەن وتكىزۋگە كوپتەن بەرى ءوتىنىم بەرىپ كەلەمىز. الايدا, قارجى قاراستىرىلماي جاتىر», دەيدى كوللەدج ديرەكتورى رۇستەمبەك باكىروۆ.
مونيتورينگ توبى ودان ءارى قاسكەلەڭ مادەنيەت كوللەدجىنە دە ايالدادى. مۇنداعى ستۋدەنتتەر ءۇيى 55 جىل بۇرىن سالىنعان. 2014 جىلى كۇردەلى جوندەۋدەن وتكەن. الايدا, 70 ورىنعا شاقتالعان جاتاقحانا توسەكتەرى ءتورت اياعىنان ازەر تۇرعانىن جاسىرۋعا بولمايدى. توسەنىشەرى دە ەسكى, شۇرىق-تەسىك. ەلەكتر جۇيەسىندە دە قاۋىپسىزدىك تالاپتارى ساقتالماعان. كەي تۇستارىنىڭ اشىق جاتقانى دا بايقالادى.
«ستۋدەنتتەر لاس توسەنىشتەردى قولدانۋعا ءماجبۇر. ءبىز بارعان قوس مەكەمەنىڭ مۇشكىل جاعدايى كوپتەن بەرى ايتىلىپ, كوتەرىلىپ كەلەدى. ءبىلىم باسقارماسىنا دەپۋتاتتىق ساۋال دا جولدانعان بولاتىن. وكىنىشكە قاراي, جاۋاپ ءالى كۇنگە دەيىن جوق», دەيدى اماناتتىق دەپۋتات اسەل زايروۆا.
مونيتورينگتىك توپ مۇشەلەرى الداعى ۋاقىتتا وڭىردەگى بارلىق ورتا ارنايى وقۋ ورىندارىنداعى جاتاقحانالار تۇگەلگە دەرلىك تەكسەرىلەتىندىگىن تىلگە تيەك ەتتى.
