فوتو: Aqorda.kz
مەملەكەت باسشىسىنىڭ ايتۋىنشا, كوممۋنالدىق-ەنەرگەتيكالىق سەكتوردى جاڭعىرتۋ جۇمىستارىن جەدەلدەتۋ كەرەك. ەلدى مەكەندەردىڭ تىنىس-تىرشىلىگىنە قاجەتتى بارلىق جۇيە ۇزدىكسىز جۇمىس ىستەۋىن قامتاماسىز ەتۋ ماڭىزدى. بۇل – ۇكىمەت پەن اكىمدىكتەردىڭ نەگىزگى مىندەتىنىڭ ءبىرى. الايدا, جىل سايىن جىلىتۋ ماۋسىمىندا سول ءبىر پروبلەمالار قايتالانا بەرەدى. پرەزيدەنتتىڭ ايتۋىنشا, مەملەكەتتىك ورگاندار قاتەلىكتەر مەن ولقىلىقتاردان ساباق الماي ءجۇر. سونىڭ كەسىرىنەن وسى سالا قازىرگى مۇشكىل حالگە جەتىپ وتىر. الماتىداعى ەكىنشى جىلۋ ەلەكتر ورتالىعىنداعى بۋ-گاز قوندىرعىسىنىڭ قۇرىلىسى سوزىلىپ كەتكەن.
«ەكىباستۇزداعى ءبىرىنشى گرەس-ءتىڭ ەنەرگوبلوگىن قالپىنا كەلتىرە الماي جۇرگەنىمىزگە ون جىلدان استى (2012 جىلدان بەرى). سونداي-اق ەكىباستۇزداعى ەكىنشى گرەس-ءتى كەڭەيتۋ جانە كۇردەلى جوندەۋ جوباسى ۋاقتىلى جۇزەگە اسىرىلماي جاتىر. ۇكىمەت, ەڭ الدىمەن, بيىل اپاتتى جاعدايداعى 19 جىلۋ ورتالىعىن جاڭعىرتۋ جۇمىستارىن اياقتاۋعا ءتيىس. سونىمەن قاتار قۋاتى 700 مەگاۆاتتان اساتىن قوسىمشا قۋات كوزىمەن قامتاماسىز ەتۋ كەرەك. بەلگىلەنگەن مەرزىمدى شەگەرۋگە بولمايدى», دەدى پرەزيدەنت.
پرەزيدەنتتىڭ سوزىنشە, جالپى, ەلىمىز ەلەكتر, جىلۋ, سۋ ءوندىرۋ جانە جەتكىزۋ قۋاتىنىڭ تاپشىلىعىن سەزىنىپ وتىرعانى جاسىرىن ەمەس. بالقاش جىلۋ ەلەكتر ورتالىعى قۇرىلىسىنىڭ اياقتالماي قالۋى, تابيعي مونوپوليا سۋبەكتىلەرىنىڭ اشىق جۇمىس ىستەمەۋى, سونداي-اق تاريفتەردىڭ ءوسىمىن قولدان تەجەۋ – وسىنىڭ ءبارى كەزىندە جىبەرىلگەن قاتەلىكتەردىڭ سالدارى.
مەملەكەت باسشىسى تاريف توڭىرەگىندەگى ماسەلەلەرگە دە توقتالا كەتتى.
«ەڭ الدىمەن, تاريفتەر ۇزاق مەرزىمگە بەلگىلەنۋى كەرەك. بۇل مەجەلى ۋاقىت ىشىندە سالىنعان ينۆەستيتسيانى اقتاپ, ينفراقۇرىلىم نىساندارىن ءتيىستى قالىپتا ساقتاۋعا مۇمكىندىك بەرەدى. تابيعي مونوپوليا سۋبەكتىلەرىنە ءتاريفتى بەلگىلى ءبىر تابىس نورماسىنا ساي ەسەپتەپ, بەكىتۋگە رۇقسات بەرۋ قاجەت. ءتيىمدى باقىلاۋ جۇرگىزۋ اسا ماڭىزدى. مۇنى وسى سالاداعى بۇكىل ۇدەرىستى تولىق تسيفرلاندىرۋ ارقىلى عانا قامتاماسىز ەتۋگە بولادى», دەدى پرەزيدەنت.
ودان بولەك جيىندا رەسۋرستاردى ەسەپتەۋ جانە دەرەكتەردى ونلاين رەجيمدە بەرۋ جۇيەسىن ەنگىزۋ ماسەلەسى كوتەرىلدى. قاسىم-جومارت كەمەل ۇلىنىڭ پايىمىنشا, تاريفتەردى ءوسىرۋ تۇتىنۋشىلارعا اتاۋلى سۋبسيديا بەرۋ ىسىمەن قاتار جۇرۋگە ءتيىس. بۇل ۇدەرىستى بارىنشا جەڭىلدەتىپ, اۆتوماتتاندىرعان ءجون.
«ۇكىمەت ەلدىڭ كوممۋنالدىق-ەنەرگەتيكالىق ينفراقۇرىلىم نىساندارىن قايتا قالپىنا كەلتىرىپ, دامىتۋ ءۇشىن ناقتى كەشەندى شارالار ازىرلەۋى كەرەك. سونىمەن قاتار اكىمدەر قالانى اباتتاندىرۋ جۇمىستارىن بەلسەندى قولعا الىپ, ونىڭ لاستانۋىنا جول بەرمەۋى قاجەت. ەڭ الدىمەن, ءىرى قالالاردا قاتتى تۇرمىستىق قالدىقتاردى قايتا وڭدەيتىن زاۋىتتار سالۋ كەرەك. ول ءۇشىن ينۆەستور تارتۋ ماڭىزدى. سونداي-اق كوگالداندىرۋ ىسىمەن اينالىسۋ قاجەت. قازىر بۇل جۇمىس ويداعىداي جۇرگىزىلمەي جاتىر. ەلەكتر قۋاتى, جىلۋ, سۋ, جالپى ءتيىمدى كوممۋنالدىق شارۋاشىلىق – باستى يگىلىگىمىز. ونىڭ قولجەتىمدى بولۋى حالىقتىڭ تۇرمىس ساپاسىنا تىكەلەي اسەر ەتەدى. بۇل – سالاداعى قوردالانعان بارلىق ماسەلەنى كەزەڭ-كەزەڭىمەن شەشۋگە مۇمكىندىك بەرەتىن ماڭىزدى ءارى كەشەندى رەفورما», دەدى قاسىم-جومارت توقاەۆ.
