فوتو: inbusiness.kz
قاسىم-جومارت توقاەۆ ەكونوميكالىق احۋالعا قاتىستى وزەكتى ماسەلەلەرگە توقتالدى. سونىڭ ىشىندە ينۆەستيتسيا تارتۋ ماسەلەسى ماڭىزدى ەكەنىن مالىمدەدى.
«جاڭا ينۆەستيتسيالىق كەزەڭدى باستاۋ كەرەك. ءوندىرۋ سالاسىنداعى جوبالاردان تۇسكەن پايدا قايتادان ينۆەستيتسيا رەتىندە ەكونوميكاعا سالىنىپ جاتىر. تىكەلەي شەتەل ينۆەستيتسياسى, نەگىزىنەن, وسى قاراجاتتىڭ ەسەبىنەن قامتاماسىز ەتىلىپ وتىر. نەگىزگى كاپيتالعا سالىنعان ينۆەستيتسيانىڭ ىشكى جالپى ونىمگە شاققانداعى ۇلەسى ازايىپ بارادى. بۇل كۇردەلى جاعداي دەۋگە بولادى. سەبەبى, ەكونوميكاعا جەتكىلىكتى قاراجات سالىنباي جاتىر. سونىڭ سالدارىنان, الداعى جىلدارى ەلدىڭ دامۋ قارقىنىن ساقتاپ تۇرۋدىڭ ءوزى قيىن بولۋى مۇمكىن», دەدى پرەزيدەنت.
مەملەكەت باسشىسى وسى باعىتتاعى جۇمىستاردى جانداندىرىپ, دەر كەزىندە شەشىم قابىلداۋ ينۆەستيتسيالىق شتابتىڭ نەگىزگى مىندەتى ەكەنىن ەسكە سالدى.
«ىشكى جانە سىرتقى ينۆەستيتسيانى ايتارلىقتاي كوبەيتۋ كەرەك. بۇل – جاڭادان قۇرىلعان ينۆەستيتسيالىق شتابتىڭ نەگىزگى مىندەتى. شتاب ەلگە ينۆەستيتسيا تارتۋعا قاجەتتى ءبىرتۇتاس ەكوجۇيە قالىپتاستىرۋى كەرەك. دامۋ ينستيتۋتتارىنىڭ جۇمىسىن جانداندىرىپ, بيزنەس وكىلدەرىمەن ءتيىمدى ديالوگ جۇرگىزۋگە ءتيىس. شەتەلدەگى مەكەمەلەردىڭ, ورتالىق پەن ايماقتاردىڭ اراسىندا تىعىز بايلانىس ورناتۋ قاجەت. ەڭ باستىسى, ينۆەستيتسيالىق شتاب قاجەتتى شەشىمدى دەر كەزىندە قابىلداۋى كەرەك», دەدى قاسىم-جومارت توقاەۆ.
پرەزيدەنت قازاقستانعا ينۆەستيتسيا قۇيۋعا ىنتالى كاسىپكەرلەردىڭ جۇمىسىن وڭتايلاندىرىپ,ء «بىر تەرەزە» قاعيداسىن جۇزەگە اسىرۋدىڭ ماڭىزدىلىعىن ايتتى.
«ينۆەستورلارعا, مىسالى, 50 ميلليون دوللاردان كوپ قارجى سالۋعا دايىن ءىرى كومپانيالارعا ء«بىر تەرەزە» قاعيداسىمەن جان-جاقتى قولداۋ كورسەتكەن ءجون. سونىمەن قاتار, جوبالاردىڭ ىسكە اسىرىلۋىن قاداعالايتىن ءتيىمدى مونيتورينگ جۇيەسىن ىسكە قوسۋ كەرەك. مەملەكەتتىك ورگاندار پايداسى جوق پرەزەنتاتسيالار مەن ءىس-شارالار وتكىزۋمەن اۋەستەنبەۋگە ءتيىس. مەكەمە باسشىلارىنىڭ شەتەلگە جاساعان ءاربىر ءىسساپارى ناقتى ناتيجە بەرۋگە ءتيىس. ساپار قورىتىندىسى بويىنشا ۇكىمەت باسشىلىعىنا, نەمەسە, قاجەت بولعان جاعدايدا پرەزيدەنتكە ەسەپ بەرىلۋى كەرەك», دەدى ق.توقاەۆ ۇكىمەتتىڭ كەڭەيتىلگەن وتىرىسىندا.
مەملەكەت باسشىسى ايماققا ينۆەستيتسيا تارتۋ اكىمدەرگە جۇكتەلەتىنىن جەتكىزدى.
«ينۆەستيتسيالىق جوبالاردى ىسكە اسىرۋعا قاتىستى كەدەرگىلەر, اسىرەسە, ايماقتاردا ءجيى بولىپ تۇرادى. اكىمدەر ينۆەستيتسيا تارتۋدىڭ ورنىنا ەسكى ادەتكە سالىپ, بيۋدجەت قاراجاتىنا سەنىپ وتىرادى. ال, ايماقتارعا بارىپ, جۇمىس ىستەگىسى كەلەتىن ينۆەستور كوپتەگەن توسقاۋىلعا تاپ بولادى. جەرگىلىكتى بيلىك كوپ جاعدايدا ەشقانداي ارەكەت جاسامايدى نە بولماسا ينۆەستوردى اۋرە-سارساڭعا سالادى. سونىڭ كەسىرىنەن كاسىپكەر جوباسىن كەيىنگە شەگەرەدى نەمەسە ءبىرجولا توقتاتۋعا ءماجبۇر بولادى.
ايماققا جەكە ينۆەستيتسيا تارتۋ اكىمدەردىڭ ەڭ باستى مىندەتىنىڭ ءبىرى بولۋى كەرەك. جالپى, بارلىق مەملەكەتتىك ورگان ەل ەكونوميكاسىنا مەيلىنشە كوبىرەك ينۆەستيتسيا تارتۋعا باسا ءمان بەرۋگە ءتيىس. بۇل – نەگىزگى باسىمدىق, ولاردىڭ جۇمىسى دا سوعان سايكەس باعالانۋى كەرەك. ماسەلە شتات سانىن كوبەيتىپ, جۇمىس توبىن قۇرىپ, جاڭا تۇجىرىمداما جازۋدا ەمەس. بۇل, ەڭ الدىمەن, مەملەكەتتىك اپپاراتتىڭ جۇمىس ىستەۋ ءتاسىلىن وزگەرتەتىن ناقتى رەفورما. سونى دۇرىس ءتۇسىنۋ قاجەت. ءبىز جارتى جىلدىڭ ناتيجەسى بويىنشا ينۆەستيتسيالىق شتابتىڭ جۇمىسىن قورىتىندىلايمىز. ءاربىر مينيستر مەن اكىمنىڭ وسى باعىتتا اتقارعان جۇمىسىنا ناقتى باعا بەرەمىز. تالاپ قاتاڭ بولادى», دەدى پرەزيدەنت.
