فوتو: اقوردا ءباسپاسوز قىزمەتى
ءماجىلىستىڭ جالپى وتىرىسىندا ءسوز سويلەگەن پرەزيدەنت ۇكىمەت جاڭا, ماڭىزدى ءرول اتقارىپ, تەز شەشىم قابىلداپ, ءتيىمدى قادامدار جاساۋى كەرەك ەكەنىن تىلگە تيەك ەتتى.
«حالقىمىزدىڭ يگىلىگى ءۇشىن ەكونوميكانى ىنتالاندىرۋ جانە ءارتاراپتاندىرۋ ءۇشىن باتىل, ناقتى شەشىمدەر قابىلدانۋى ءتيىس. جاڭا شىندىققا بەيىمدەلۋ كەرەك. ءبىز جاڭا سىن-قاتەرلەرگە قارسى تۇرا ءبىلۋىمىز كەرەك, بۇعان ۇكىمەت تە دايىن بولۋى شارت. ۇكىمەت قىزمەتىنە جاڭا سەرپىن بەرۋ ماڭىزدى, مۇنى جۇرتشىلىق تا كۇتىپ وتىرعان ەدى. وسىعان بايلانىستى مەن ءاليحان سمايىلوۆتىڭ وتستاۆكاعا كەتۋىن قابىلدادىم. ونىڭ باسشىلىعىنداعى ۇكىمەت بارلىق سالادا تۇراقتىلىقتى قامتاماسىز ەتتى», دەپ ءتۇسىندىردى قاسىم-جومارت توقاەۆ.
ەسكە سالايىق, 2024 جىلدىڭ 5 اقپانىندا مەملەكەت باسشىسى ۇكىمەتتى وتستاۆكاعا جىبەرۋ تۋرالى جارلىققا قول قويعان ەدى.
