سۋرەتتەردى تۇسىرگەن – دميتري ەروفەەۆ
تالدىقورعان قالاسىندا كوپتەن كۇتكەن «بەلسەندى ۇزاق ءومىر ءسۇرۋ ورتالىعى» ەسىگىن ايقارا اشتى. بۇل ءساتتى زەينەتكە شىققان جاندار اسىعا كۇتىپ ءجۇر ەدى. سەبەبى زەينەت جاسىنداعى ادامداردى الەۋمەتتەندىرۋ جانە ولاردى بەلسەندى مادەني-شىعارماشىلىق, سپورتتىق, ىسكەرلىك ومىرگە تارتۋدىڭ نەگىزگى جولى – وسى ورتالىق. بۇعان قوسا ولاردىڭ فيزيكالىق جانە پسيحولوگيالىق ساۋلىعىنا ىقپال ەتۋ ارقىلى ءومىر ءسۇرۋ ۇزاقتىعىن ارتتىرۋعا جاردەمدەسەدى.
ەڭ عاجابى, مۇنداي ورتالىق قالادا بۇرىن دا بولعان, بىراق ونىڭ جۇمىسىن جۇرگىزىپ, دامىتۋ ءۇشىن قوعامدىق ۇيىمدار اراسىندا كونكۋرس ويناتىلاتىن. جەتىسۋ وبلىسى اكىمىنىڭ ءباسپاسوز قىزمەتىنىڭ مالىمەتىنشە, ورتالىق كوممۋنالدىق مەملەكەتتىك مەكەمە فورماتىندا قايتا اشىلىپ وتىر, قازىر ونىڭ قۋاتى ەكى ەسەگە ارتىپ, 220 ورىنعا لايىقتالعان.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەرمەك ميزامباەۆتىڭ ايتۋىنشا, ءبىر عانا وبلىس ورتالىعىندا 25 مىڭعا جۋىق زەينەتكەر تۇرادى. سوندىقتان وبلىس اكىمىنىڭ تاپسىرماسى بويىنشا كمم قۇرۋ تۋرالى شەشىم قابىلداندى.
«ەڭبەك رەسۋرستارى جانە بەلسەندى ۇزاق ءومىر ءسۇرۋ ورتالىعى» كمم باسشىسى اسەت ورازبەك ۇلىنىڭ سوزىنە قاراعاندا, ورتالىق كەلۋشىلەردىڭ سۇرانىسى مەن قىزىعۋشىلىعىنا قاراي 12 قىزمەت ءتۇرىن تەگىن كورسەتىپ, 38 قىزمەتكەردى جۇمىسپەن قامتىپ وتىر.
«قارجىلىق جانە كومپيۋتەرلىك ساۋات, اعىلشىن ءتىلى, قازاق ءتىلى, توقۋ جانە تىگىن كۋرستارىن ۇيىمداستىردىق. سپورت زالى بار. يوگا, ۆوكال, شاحمات-دويبى, ۇستەل تەننيسى بويىنشا ساباقتار وتەدى. قازىر ورتالىققا ىڭعايلى ۋاقىتتا 210-نان اسا ادام كەلەدى. باسسەينگە بارۋ ماسەلەسى شەشىلىپ جاتىر. الداعى ۋاقىتتا اشىق اسپان استىندا ءىس-شارالار, ساياحاتتار وتكىزۋدى جوسپارلاپ وتىرمىز. ول ءۇشىن 16 ورىندىق اۆتوبۋس ساتىپ الىندى», دەيدى ا.ورازبەك ۇلى.
جاڭا ورتالىققا ارنايى كەلگەن 72 جاستاعى گۇلزادا بەردەشەۆا ءوز اسەرىمەن ءبولىسىپ: «بىزگە مۇندا ءبارى ۇنايدى. مەن شاحماتقا, دويبىعا, ۇستەل تەننيسىنە قىزىعامىن. بۇل جەردە ءدال ۇيدەگىدەي جىلىلىق پەن جايلىلىق بار. وسىنداي تاماشا مەكەمەنىڭ اشىلۋىنا اتسالىسقانداردىڭ بارلىعىنا العىس ايتامىن!», دەيدى زەينەتكەر.
ورتالىقتىڭ تۇراقتى كەلۋشىلەرىنىڭ ءبىرى سۆەتلانا تسىپلاكوۆا دا ءدان ريزا. «مەن ءتىل كۋرستارىنا بارعاندى ۇناتامىن. اسىرەسە قازاق ءتىلى ءپانىنىڭ مۇعالىمى ساۋلە ارنايقىزىن ەرەكشە اتاپ وتكىم كەلەدى. سول كىسىنىڭ ارقاسىندا مەملەكەتتىك ءتىلدى ءتۇسىنىپ قانا قويماي, جايلاپ سويلەي باستادىق. ماعان بۇل جەردە توقۋ, تىگىن, يوگا سياقتى قىزىعۋشىلىعىما ساي كەلەتىن ۇيىرمەلەر ۇنايدى», دەدى ول.
اتاپ وتسەك, ورتالىقتى دامىتۋعا 2024 جىلعا 300 ملن تەڭگە بولىنگەن. بۇگىنگى تاڭدا ورتالىق 16 ورىندى شاعىن اۆتوبۋس, ترەناجەرلەر, گانتەلدەر, جۇگىرۋ جولى, جاتتىعۋعا ارنالعان قۇرالدار, قابىرعا تىرەكتەرى, گيمناستيكالىق دوپتار, ۇستەل تەننيسى, شاحمات, دويبى, توعىزقۇمالاق ويناۋعا ارنالعان قۇرال-جابدىقتار, تىگىن ماشينالارى, توقىما جيىنتىقتارى, ماسساجدىق ورىندىق, جىلجىمالى پروەكتورلارعا ارنالعان ەكراندار, ستەرەو جۇيە, پروەكتورلار, ماركەر تاقتالارى جانە
باسقا دا قاجەتتىلىكتەر ساتىپ الىنعان.
قۇرىلىستىڭ جالپى اۋدانى – 1349,8 شارشى مەتر. ءبىرىنشى قاباتتا وقۋ ساباقتارىن وتكىزۋگە ارنالعان ورىندار, مەدبيكە بۇرىشى, ماسساجدىق ورىندىق, ال ەكىنشى قاباتتا سپورت زالى, ۆوكالدىق جاتتىعۋ بولمەسى, شاحمات, دويبى, تەننيس ويناۋعا ارنالعان ۇستەلدەر, تىگىن بۇرىشى بار. بارلىق قىزمەت تەگىن كورسەتىلەتىن ورتالىققا تالدىقورعاننىڭ زەينەتكە شىققان كەز كەلگەن تۇرعىنى بارا الادى. كەلۋشىلەر جەكە باسىن كۋالاندىراتىن قۇجات پەن زەينەتكەردىڭ جەكە كۋالىگىن كورسەتۋى كەرەك. بەلسەندى ۇزاق ءومىر ءسۇرۋ ورتالىعى تالدىقورعان قالاسىنداعى جەلتوقسان كوشەسى, 259-ءۇي مەكەنجايىندا ورنالاسقان.
جەتىسۋ وبلىسى
