فوتو: «قازاقستان مۇناي جابدىقتارى زاۋىتى» ءباسپاسوز قىزمەتى
2017 جىلى ىرگەسى قالانعان زاۋىتتا بۇگىنگى كۇنى قۇنى 12 ميلليارد تەڭگەنى قۇرايتىن 3 تسەح تولىققاندى جۇمىس ىستەيدى. اقتوبە قالاسىندا ورنالاسقان زاۋىتتا 12 ايدا ورتاشا ونىمدىلىگى 50 مىڭ توننا بولات قۇبىر جانە قاپتامالىق قۇبىرلار, پروفيلدەر, 3800 توننا جوعارى قىسىمدى قۇرىلعىلار, 50 پەش پەن 30 سەپاراتور, ارماتۋرالار, 24 جىلجىمالى بۇرعىلاۋ قوندىرعىسى شىعارىلادى. زاۋىت «قازمۇنايگاز», «ەمبىمۇنايگاز», «ماڭعىستاۋمۇنايگاز», «قاراجامباس», «قازاقويل», «قازاق-تۇرىكويل», «اقتوبەمۇنايگاز» مۇناي وڭدەۋ ونەركاسىپتەرىن «قارا التىن» ءوندىرۋ پروتسەسىنە قاجەت قۇرال-جابدىقپەن قامتيدى. سونداي-اق, وتاندىق قۇرىلعىلار رەسەي, قىتاي مەملەكەتتەرىنە ەكسپورتتالادى.
«قازاقستان مۇناي جابدىقتارى زاۋىتى» جشس قازاقستاندا مۇناي-گاز ونەركاسىبىن دامىتۋمەن بىرگە, ماشينا قۇراستىرۋ, جاڭا تەحنولوگيالاردى ءوندىرۋ, جاڭا ونەركاسىپتىك كاسىپورىنداردى اشۋ باعىتىندا جاڭا جۇمىس ورىندارىن ۇسىنۋ, تەحنار مامان دايارلاۋ ارقىلى دا ەل ەكونوميكاسىنىڭ دامۋىنا وڭ ىقپال ەتىپ جاتىر. بۇگىندە زاۋىتتا 220 جۇمىسشى قىزمەت ەتەدى, ونىڭ ىشىندە, 200-ءى جەرگىلىكتى تۇرعىندار بولسا قالعان 20-سى قىتاي ازاماتتارى. ولار نەگىزىنەن كونسۋلتاتيۆتىك قىزمەت كورسەتەدى.
«زاۋىت اشىلعاندا جىلىنا 10 000 توننا كولەمدى تۇتىك جانە قاپتاما قۇبىرلارىن, 20 بلوكتىق جابدىقتار جيىنتىعىن شىعارۋ ماقساتىن العا قويدىق, ءبىز باستاپقى جوسپارلارىمىزعا قول جەتكىزدىك. قازىرگى تاڭدا مۇناي-گاز قۇرىلعىلارىن ءوندىرۋ بويىنشا نارىقتىڭ ءبىر بولىگىن جابامىز. بولاشاقتا ءوندىرىس كولەمىن ۇلعايتىپ, جاڭا قۇرىلعىلار جاساۋ ءۇشىن ينۆەستيتسيا قۇيىپ جاتىرمىز. قىتايلىقتارمەن بىرلەسكەن ىنتىماعىمىزدى نىعايتۋ ارقىلى مامانداردى كاسىبي شىڭداۋ, قايتا دايارلاۋعا ىقىلاستىمىز», دەدى «قازاقستان مۇناي جابدىقتارى زاۋىتى» ساتۋ ءبولىمىنىڭ باسشىسى دانيار لەكەروۆ.
زاۋىت باسشىلىعى 2025 جىلى جاڭا ءونىم شىعاراتىن ءتورتىنشى تسەحتى ىسكە قوسۋدى كوزدەپ وتىر.
زاۋىت جۇمىسشىلارىنىڭ الەۋمەتتىك ءال-اۋقاتىن جاقسارتۋعا مۇددەلى. ولاردى تاسىمالداۋ, تۇسكى, كەشكى اسپەن قامتۋ, بىلىكتىلىگىن دامىتۋ شارالارى كاسىپورىن قاراجاتى ەسەبىنەن جۇرگىزىلەدى. قىزمەتكەرلەردىڭ كۇن ءتارتىبىن 2019 جىلدان بەرى وسى زاۋىتتا ەڭبەك ەتىپ جۇرگەن ازامات شامشيەۆ ايتىپ بەردى.
«كۇندەلىكتى 8:00-دەن 17:00-گە دەيىن جۇمىس جاسايمىز. ءبىزدىڭ زاۋىتتا ءوز ماماندىعىمىز نەگىزىندە نەمەسە قوسىمشا قىزىققان ءىس بويىنشا تاجىريبە جيناۋ ءۇشىن جۇمىس ۋاقىتىنان تىس شەبەرلىك دارىستەرى ءجيى وتكىزىلەدى. دەمالىس كۇندەرى ماماندار جۇمىستىڭ ورىندالۋ رەتىن, جاڭا ستانوكتا جۇمىس ىستەۋ ەرەجەلەرىن, ولشەمدەرگە مۇقيات بولۋ سىندى ىستەردى ۇيرەتەدى. مۇنداي كۇندەرى دە تاسىمالداۋ, اس-سۋمەن قامتۋدى زاۋىت موينىنا الادى», دەيدى 5 رازريادتى توكار ازامات شامشيەۆ.
«قازاقستان مۇناي جابدىقتارى زاۋىتى» جشس الداعى ۋاقىتتا ءونىم كولەمىن ارتتىرۋ, ساپانى جاقسارتۋ, سالاداعى جاڭاشىلدىقتاردى ونەركاسىپ وندىرىسىنە ەنگىزۋ ءۇشىن مامانداردى قىتايدىڭ ءۇرىمشى قالاسىندا ورنالاسقان سينتسزيان ۋنيۆەرسيتەتىنە تاجىريبە الماسۋعا جىبەرۋدى جوسپارلاپ وتىر.
