سۋرەتتى تۇسىرگەن – ىنتىماق تولقىن
ايتا كەتەيىك, «اۋىل مەكتەبى Powered by NIS» جوباسىنىڭ قاتىسۋشىسى – س.لاستاەۆ اتىنداعى ورتا مەكتەبى بۇل باعدارلاماعا ەنگەن اۋىل مەكتەپتەرىنىڭ ىشىندەگى ازىرگە العاشقى ءبىلىم ۇياسى. «Global Teaching Labs» باعدارلاماسى اياسىندا ماسساچۋسەتس ينستيتۋتىنىڭ الدىڭعى قاتارلى ستۋدەنتتەرى جىل سايىن ەۋرازيا ەلدەرىندەگى مەكتەپتەردەن ءىس-تاجىريبەدەن وتۋگە اتتانادى. 9 قاڭتاردان ماسساچۋسەتس تەحنولوگيالىق ينستيتۋتىنىڭ ەكى ۇزدىك ستۋدەنتى س.لاستاەۆ اتىنداعى ورتا مەكتەپكە كەلگەن. امەريكالىق ستۋدەنتتەردىڭ جوسپارىندا وقۋشىلارعا بەلگىلەنگەن پاندەر بويىنشا ساباق بەرۋ عانا ەمەس, ولارمەن جانە ۇستازدار ۇجىمىمەن باعدارلامالاۋ نەگىزىندە توپتىق جۇمىس جۇرگىزۋ دە بار. قوس ستۋدەنت كاتونقاراعاي اۋىلىنداعى مەكتەپتە ءبىر ايعا جۋىق باعدارلامالاۋ, فيزيكا, اعىلشىن جانە اقپاراتتىق تەحنولوگيادان ساباق بەرەدى.
– مەن ەكىنشى, حاننا ءۇشىنشى كۋرستا وقيمىز. نەگىزگى ماماندىعىم – فيزيكا ءپانىنىڭ مۇعالىمى. دوسىم حاننا بولسا, كومپيۋتەرلىك ديزاين بويىنشا ءبىلىم الىپ جاتىر. بۇل ءبىزدىڭ «Global Teaching Labs» باعدارلاماسى اياسىندا وزگە ەلگە جاساعان العاشقى ساپارىمىز. اتالعان باعدارلاماعا قاتىسۋعا ءوزىمىز نيەت بىلدىردىك. قازاقستان تۋرالى وسى ۋاقىتقا دەيىن سىرتتاي عانا ءبىلىپ كەلدىك. ۋنيۆەرسيتەتتە وقيتىن قازاقستاننان كەلگەن قۇربى, دوستارىمىز دا جوق ەمەس. سوندىقتان بولار وسى ەلگە قىزىعۋشىلىعىمىز اۋىپ تۇردى, – دەيدى الەكساندر ەدۋارد شەرستنەۆ.
ولاردى استانانىڭ اۋەجايىنا تۇسە سالىسىمەن ءبىلىم بەرۋدى تۇراقتى دامىتۋ قورىنداعى دوستارى قۇشاق جايا قارسى الىپ, قوناقجايلىلىق تانىتقان. ەرتەسىندە وسكەمەنگە, ودان ءارى كاتونقاراعاي اۋىلىنا جەتكەن. س.لاستاەۆ مەكتەبىنە كەلگەندەگى ماقساتتارى – وزدەرىنىڭ ءبىلىمىن, قارىم-قابىلەتتەرىن مۇنداعى وقۋشىلارعا ۇيرەتۋ, سولارمەن ءبولىسۋ, اعىلشىن تىلىنە دەگەن قىزىعۋشىلىقتارىن ارتتىرۋ. ەڭ باستىسى, مەكتەپ وقۋشىلارىنىڭ بىلىمگە دەگەن ىنتالارىن ارتتىرعىسى كەلەدى.
– وقۋشىلارعا الەمنىڭ ۇلكەن ءارى تاڭعاجايىپ ەكەنىن, ولار ءوز مۇمكىندىكتەرىن بارىنشا پايدالانىپ, جارقىن جەتىستىكتەرگە جەتە الاتىنىن ايتقىمىز كەلەدى. ءبارى دە وزدەرىنىڭ قولىندا. ول ءۇشىن قازىر بارلىق جاعداي مەن مۇمكىندىك جەتەرلىك, – دەيدى الەكساندر ەدۋارد شەرستنەۆ.
شەتەلدىك ستۋدەنتتەر وزدەرىنە جۇكتەلگەن ءپان ساباقتارىن اعىلشىن جانە ورىس تىلدەرىندە جۇرگىزەدى. نەگىزگى ساباقتاردان بولەك, الەكساندر مەن حاننا مەكتەپ ىشىندە ۇيىمداستىرىلاتىن دەبات, پىكىرتالاس الاڭدارى, دوڭگەلەك ۇستەل سياقتى ءىس-شارالارعا قاتىسىپ, وقۋشىلارمەن تىلدىك قارىم-قاتىناس ورناتىپ ءجۇر. مەكتەپ شاكىرتتەرى دە امەريكالىق ستۋدەنتتەردىڭ ساباقتارىنا قىزىعۋشىلىق تانىتىپ, اعىلشىن ءتىلىن مەڭگەرۋدەگى تاجىريبەلەرىن ارتتىرىپ كەلەدى.
امبەگە تانىستىرا كەتەيىك, الەكساندر مەن حاننا سولتۇستىك امەريكانىڭ كاليفورنيا شتاتىندا تۋىپ-وسكەن. الەكساندردىڭ ۇلتى – ورىس, حاننا – كورەي قىزى. الەكساندردىڭ اكەسى رەسەيدىڭ چەليابى قالاسىندا تۋعان ەكەن. ايتۋىنشا, قازاقستاندا بۇعان دەيىن ءوزى بولىپ كورمەسە دە, تۋىستارىنىڭ كەيبىرى وسىندا ءالى كۇنگە دەيىن تۇرادى.
– مەكتەپ وقۋشىلارىنىڭ قازىردىڭ وزىندە اعىلشىن تىلىنە دەگەن قىزىعۋشىلىقتارى جوعارى. ساباقتا پىكىر الماسامىز, اڭگىمەلەسەمىز. ءوزىمىز دە ولاردان قازاق ءتىلىن ۇيرەنىپ ءجۇرمىز. قازىردىڭ وزىندە «اس بولسىن», «ساۋ بولىڭىز», «سالەمەتسىز بە؟» دەگەن سىندى سوزدەردى ۇيرەنىپ الدىق. اۋىلدىڭ بالالارى جان-جاقتى, ءبىلىمدى ەكەنىنە كوزىمىز جەتىپ وتىر. بۇل ءبىزدى قاتتى قۋانتادى. بۇدان كەيىن دە ءبىز كاتونقاراعايلىق وقۋشىلارمەن جانە ۇستازدارمەن ۇنەمى بايلانىستا بولامىز, – دەيدى حاننا پارك.
امەريكانىڭ ستۋدەنتتەرى التايعا كەلگەندەرىنە شىن قۋانىشتى. مۇنداي سۇلۋ تابيعاتتى كورۋدىڭ ءوزى باقىت دەسەدى. باسا ايتا كەتەرلىگى, س.لاستاەۆ مەكتەبى ءبىلىم بەرۋدى تۇراقتى دامىتۋ قورى مەن «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ «اۋىل مەكتەبى» بىرلەسكەن جوباسىنا قاتىسىپ وتىرعانىنا بيىل بەسىنشى جىل. 2019 جىلى «ايتاس» حولدينگىنىڭ قولداۋىمەن بۇل مەكتەپتىڭ ءبىلىم بەرۋ كابينەتتەرى جاڭارتىلعان بولاتىن.
شىعىس قازاقستان وبلىسى,
كاتونقاراعاي اۋدانى
