ينتەرنەت جەلىسى جۇيتكىپ تۇرعانىمەن, تاڭعى شايىن گازەت وقي وتىرىپ ىشەتىن وقىرماندارىمىز بارشىلىق. اسىرەسە اۋىلدىق جەرلەردە گازەت-جۋرنالدى كۇتىپ ءجۇرىپ وقيدى.
كۇنى كەشە بەرەل اۋىلدىق كىتاپحاناسىندا وتكەن رۋحاني شاراعا قاتىسقان اۋىلدىقتار اقپاراتتى قالتا تەلەفوننان گورى گازەتتەن العان اناعۇرلىم ءتيىمدى ەكەنىن ايتقان. اكتسيا ماقساتى دا تەلەفوندى ءبىر ساتكە ىسىرا تۇرىپ, گازەت بەتتەرىنەن تانىمدىق, رۋحاني دۇنيەلەردى وقۋعا شاقىرۋ ەدى. كىتاپحاناشى ايناگۇل شاياحمەتتىڭ ايتۋىنشا, اۋىلدا ينتەرنەت بولعانىمەن, باسپاسوزگە جازىلۋ ناۋقانىندا وزدەرى ءسۇيىپ وقيتىن گازەتتەرىنە جازىلىپ, جىل بويى ۇزدىكسىز الىپ وتىرادى.
«بەرەلگە ينتەرنەت تارتىلعانىمەن, اۋىلدىقتاردىڭ بۇرىنعىداي قالاپ وقيتىن گازەتتەرى بار, جىلدا جازىلاتىن ادەتتەرى بار. كىتاپحاناعا جاڭادان كىتاپ تۇسسە, ونى دا وقىپ تاۋىساتىن وقىرماندارىمىز جوق ەمەس. سولارعا قاراپ, كىتاپ, گازەت وقۋ مادەنيەتىنىڭ بارىنا قۋانامىز» دەيدى كىتاپحاناشى ايناگۇل شاياحمەت.
ءيا, ينتەرنەت وركەنيەتى كەلگەنىمەن, گازەت وقۋ مادەنيەتىنەن اجىراپ قالماۋىمىز كەرەك. گازەتكە باسىلعان اقپارات ەرتەڭگى كۇنى تاريحتا قالماي ما؟ اقپاراتتان وزگە قۇندىلىعىن جويمايتىن قانشاما دۇنيە بار. ال ەكران بەتىندەگى جازبالاردىڭ سان عاسىر ساقتالاتىنىنا كىم كەپىل؟
«باسپاسوزگە جازىلۋ ناۋقانى باستالا سالا «ەگەمەنىمىزگە» جازىلىپ قويامىن. گازەتكە جازىلۋ ادەتىم. ءار ءنومىرى كەلگەن سايىن كوزىلدىرىگىمدى ءىلىپ الىپ, پاراقتاپ وتىرىپ وقيمىن. ءبىرىنشى بەتتەن پروبلەمالىق ماقالالارعا دەيىن بەرىلەدى» دەيدى بەرەل اۋىلىنىڭ تۇرعىنى ورالبەك ابەنوۆ.
ايتا كەتەرلىگى, كاتونقاراعاي ءوڭىرى گازەت وقۋدا الدارىنا جان سالمايدى. ونى جىل سوڭىنداعى ستاتيستيكالىق دەرەكتەر كورسەتىپ وتىر.
شىعىس قازاقستان وبلىسى,
كاتونقاراعاي اۋدانى,
بەرەل اۋىلى
